ຂ່າວຫຼ້າສຸດ

ທ່ານອະດີດປະທານປະເທດ ເນັ້ນ ນວ ຕ້ອງສ້າງຮາກຖານບ້ານໃຫ້ມີຄວາມເຂັ້ມແຂງ

523 11 ມ.ກ. 2019 ຂ່າວໜ້າ​ໜຶ່ງ
ທ່ານອະດີດປະທານປະເທດ ເນັ້ນ ນວ ຕ້ອງສ້າງຮາກຖານບ້ານໃຫ້ມີຄວາມເຂັ້ມແຂງ

    ທ່ານ ຈູມ​ມາ­ລີ ໄຊ​ຍະ​ສອນ ອະ­ດີດ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ລົງ​ຢ້ຽມ­ຢາມ ແລະ ພົບ​ປະ​ພະ­ນັກ­ງານ​ຫຼັກ​ແຫຼ່ງ ນະ­ຄອນ­ຫຼວງ​ວຽງ​ຈັນ (ນວ) ວັນ​ທີ 10 ມັງ­ກອນ 2018 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສິນ​ລະ​ວົງ ຄຸດ​ໄພ­ທູນ ກ່າວ​ວ່າ: ປີ 2018 ນວ ຍັງ​ເປັນ​ອີກ​ບ່ອນ​ໜຶ່ງ​ທີ່​ມີ​ການ​ລົງ­ທຶນ​ຄຶກ­ຄື້ນ ຕົວ​ເລກ​ອະ­ນຸ­ມັດ​ການ​ລົງ­ທຶນ​ບັນ­ລຸ 18.000 ຕື້​ກີບ ລວມ​ຍອດ​ຜະ­ລິດ​ຕະ​ພັນ​ພາຍ​ໃນ (GDP) ເຕີບ​ໂຕ  9,3% ສະ­ເລ່ຍ​ໃສ່​ຫົວ​ຄົນ 5.300 ໂດ​ລາ​ສະ­ຫະ­ລັດ ຫຼື ປະ­ມານ 45,44 ລ້ານ​ກີບ ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ບັນ­ລຸ 1.222,71 ຕື້​ກີບ ເຖິງ​ວ່າ​ປີ 2018 ຈະ​ໄດ້​ຮັບ​ຜົນ​ກະ­ທົບ​ຈາກ​ໄພ​ທຳ​ມະ​ຊາດ ແຕ່​ຫົວ­ໜ່ວຍ​ທຸ­ລະ​ກິດ​ສ່ວນ​ໃຫຍ່​ຍັງ​ຄົງ​ຢູ່​ໄດ້ ແລະ ມີ​ຫຼາຍ​ຫົວ­ໜ່ວຍ​ເກີດ​ຂຶ້ນ​ໃໝ່ ນວ ໄດ້​ປະ­ຕິ­ບັດ​ນະ­ໂຍ­ບາຍ​ຂອງ​ລັດ­ຖະ­ບານ​ໃນ​ການ​ສົ່ງ­ເສີມ​ສິນ­ຄ້າ ODOP SMEs ເສດ­ຖະ­ກິດ​ຄອບ­ຄົວ ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ​ແຫ່ງ​ຊາດ ເປັນ­ຕົ້ນ ການ​ອຳ­ນວຍ​ຄວາມ​ສະ­ດວກ​ໃນ​ການ​ດຳ­ເນີນ​ທຸ­ລະ​ກິດ​ແບບ​ປະ­ຕູ​ດຽວ ວ່ອງ­ໄວ ໂປ່ງ​ໃສ​ຂຶ້ນ​ຕື່ມ ການ​ພັດ­ທະ­ນາ​ວັດ­ທະ­ນະ­ທຳ​ສັງ­ຄົມ ການ​ພັດ­ທະ­ນາ ແລະ ຄຸ້ມ​ຄອງ​ຕົວ​ເມືອງ ການ​ບໍ­ລິ­ຫານ​ຄຸ້ມ​ຄອງ​ລັດ ຄວາມ​ໝັ້ນ­ຄົງ ແລະ ການ​ພົວ­ພັນ​ຮ່ວມ​ມື​ກັບ​ນະ­ຄອນ ແຂວງ ປະ­ເທດ ເພື່ອນ​ມິດ ແລະ ອົງ​ການ­ຈັດ­ຕັ້ງ​ສາ­ກົນ ກໍ່​ໄດ້​ຮັບ​ການ​ພັດ­ທະ­ນາ​ໃຫ້​ດີ​ຂຶ້ນ.

    ພ້ອມ​ດຽວ​ກັນ​ນີ້ ກໍ່​ຍັງ​ມີ​ຫຼາຍ​ບັນ­ຫາ​ທີ່​ບໍ່​ທັນ​ບັນ­ລຸ​ຄາດ­ໝາຍ ເຊັ່ນ: GDP ວາງ​ຄາດ­ໝາຍ 10,5% ແຕ່​ບັນ­ລຸ 9,3% ຄາດ​ຄະ­ເນ​ນັກ​ທ່ອງ​ທ່ຽວ 2 ລ້ານ​ຄົນ ບັນ­ລຸ 1,8 ລ້ານ​ຄົນ ອຸ­ບັດ​ຕິ​ເຫດ​ຄາດ​ຄະ­ເນ​ຫຼຸດ​ລົງ 20% ບັນ­ລຸ​ພຽງ 8% ການ​ສ້ອມ­ແປງ​ເສັ້ນ­ທາງ​ບໍ່​ທັນ​ໄດ້​ດີ ບັນ­ຫາ​ສຳ­ຄັນ ນວ ຍັງ​ຊົງ​ຕົວ​ຢູ່​ໃນ​ສະ­ພາ­ວະ​ຂອງ​ຄວາມ​ດ້ອຍ​ພັດ­ທະ­ນາ​ຫຼາຍ​ຈຸດ ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ​ເຖິງ​ວ່າ​ບໍ່​ໃຫຍ່ ແຕ່​ຍັງ​ປາ­ກົດ​ຂຶ້ນ​ຫຼາຍ​ຢ່າງ ເປັນ­ຕົ້ນ ອຸ­ບັດ​ຕິ​ເຫດ ໄພ​ສັງ­ຄົມ ການ​ຄ້າ​ມະ­ນຸດ ຂີ້­ລັກ ຄົນ​ຂໍ­ທານ ແລະ ອື່ນໆ ເຊິ່ງ​ຈະ​ຕ້ອງ​ໄດ້​ເລັ່ງ​ແກ້​ໄຂ​ໃນ­ຕໍ່­ໜ້າ.     

    ຈາກ​ນັ້ນ ທ່ານ ຈູມ​ມາ­ລີ ໄຊ​ຍະ​ສອນ ກໍ່​ໄດ້​ໂອ້​ລົມ ເຊິ່ງ​ບາງ​ຕອນ​ທ່ານ​ກ່າວ​ວ່າ: ບັນ­ດາ​ນິ­ຕິ​ກຳ ແລະ ນະ­ໂຍ­ບາຍ​ຕ່າງໆ​ໄດ້​ເອົາ​ລົງ​ເຜີຍ­ແຜ່​ຢູ່​ຂັ້ນ​ບ້ານ ແຕ່​ຢູ່​ຂັ້ນ​ບ້ານ​ຍັງ​ມີ​ຫຼາຍ​ກໍ­ລະ­ນີ​ບໍ່​ໄດ້​ຮັບ​ການ​ແກ້​ໄຂ ສະ­ແດງ​ອອກ ຍັງ​ມີ​ບາງ​ກຸ່ມ​ບ້ານ​ຜູ້​ເປັນ​ເລ­ຂາ ເປັນ​ຄະ­ນະ​ບ້ານ ນາຍ­ບ້ານ​ຕ່າງ​ກັນ ແລະ ມີ​ຜູ້​ບຳ­ນານ​ຍັງ​ເປັນ​ເລ­ຂາ ນອກ​ນີ້ ຍັງ​ບໍ່​ໄດ້​ກຳ­ນົດ​ລະ­ອຽດ​ສະ­ເພາະ​ກ່ຽວ​ກັບ​ບ້ານ​ໃຫຍ່ ຕົວ​ເມືອງ​ນ້ອຍ ມາດ­ຖານ​ບຸ​ຄາ​ລາ​ກອນ ການ​ພັດ­ທະ­ນາ​ບ້ານ ແລະ ເມືອງ ຍັງ​ບໍ່​ໄດ້​ເປັນ​ເອ­ກະ​ພາບ​ກັນ ຜ່ານ​ມາ​ຄວາມ​ພົ້ນ​ທຸກ​ຢູ່​ໃນ​ຄອບ­ຄົວ​ມີ​ຄວາມ​ເຫັນ​ຕ່າງ​ກັນ ຕາມ​ດຳ­ລັດ 384 ຂອງ​ນາ­ຍົກ­ລັດ­ຖະ­ມົນ­ຕີ ຢາກ​ເພີ່ມ​ຂຶ້ນ​ຕື່ມ​ກ່ຽວ​ກັບ​ລາຍ​ຮັບ​ຂອງ​ຄອບ­ຄົວ ຄອບ­ຄົວ​ພົ້ນ​ທຸກ ບ້ານ​ພົ້ນ​ທຸກ​ຍັງ​ມີ​ການ​ກຳ­ນົດ​ລວມໆ ຄະ­ນະ​ພັກ​ຮາກ​ຖານ​ຂັ້ນ​ບ້ານ​ຍັງ​ບໍ່​ທັນ​ໄດ້​ຮັບ​ການ​ປັບ­ປຸງ ເຊິ່ງ​ບ້ານ​ເປັນ​ຂັ້ນ​ໜຶ່ງ​ຂອງ​ລັດ ແຕ່​ຍັງ​ບໍ່​ມີ​ຄວາມ​ເດັດ­ຂາດ​ໃຫ້​ສ້າງ​ເປັນ​ລັດ​ໜຶ່ງ ມັນ​ຕ້ອງ​ມີ​ນະ­ໂຍ­ບາຍ​ສະ­ເພາະ​ຂອງ​ບ້ານ ຜ່ານ​ມາ​ເຮັດ​ບໍ່​ໄດ້ ດັ່ງ­ນັ້ນ ຕາມ​ເງື່ອນ­ໄຂ​ທິດ​ພັດ­ທະ­ນາ ເລ­ຂາ​ພັກ​ບ້ານ​ກັບ​ນາຍ­ບ້ານ​ເປັນ​ອັນ​ດຽວ ຕ້ອງ​ສ້າງ​ໃຫ້​ມີ​ພື້ນ­ຖານ​ໜັກ​ແໜ້ນ​ຢູ່​ຂັ້ນ​ບ້ານ ເມື່ອ​ມີ​ພື້ນ­ຖານ​ມີ​ຄວາມ​ຊຳ­ນິ​ຊຳ­ນານ​ຢູ່​ບ້ານ ຜູ້​ທີ່​ເປັນ​ນາຍ­ບ້ານ​ຈະ​ກ້າວ​ຂຶ້ນ​ເປັນ​ເລ­ຂາ​ພັກ​ເມືອງ​ໄດ້ ຜູ້​ທີ່​ເປັນ​ເລ­ຂາ​ພັກ​ເມືອງ​ມີ​ຄວາມ​ຊຳ­ນິ​ຊຳ­ນານ​ເຮັດ​ວຽກ​ໄດ້ ຈະ​ກາຍ­ເປັນ​ຄະ­ນະ​ນຳ​ຂັ້ນ​ແຂວງ ນະ­ຄອນ­ຫຼວງ​ໄດ້ ເອີ້ນ​ວ່າ ການ​ສືບ​ທອດ​ຢ່າງ​ຕໍ່​ເນື່ອງ ນອກ​ນີ້ ການ​ສ້າງ​ພັກ​ປອດ​ໃສ ເຂັ້ມ­ແຂງ​ຮອບ­ດ້ານ ຕ້ອງ​ຕິດ​ພັນ​ກັບ​ການ​ສ້າງ​ບ້ານ​ພັດ­ທະ­ນາ ຕາມ 4 ເນື້ອ​ໃນ 4 ຄາດ­ໝາຍ​ຂອງ​ພັກ​ວາງ​ອອກ.

ຂ່າວທີ່ກ່ຽວຂ້ອງ