ທະນາຄານ​ກາງ​ຣັດ​ເຊຍ ຄ່ອຍໆ​ຫຼຸດຜ່ອນ​ການ​ຂຶ້ນ​ກັບ​ເງິນ​ໂດ​ລາ​ສະຫະລັດ

463 14 ມ.ກ. 2019 ຂ່າວຕ່າງປະເທດ
ທະນາຄານ​ກາງ​ຣັດ​ເຊຍ ຄ່ອຍໆ​ຫຼຸດຜ່ອນ​ການ​ຂຶ້ນ​ກັບ​ເງິນ​ໂດ​ລາ​ສະຫະລັດ

    ບົດ​ລາຍ​ງານ​ຂອງ​ທະນາຄານ​ກາງ​ຣັດ​ເຊຍ (RCB) ໃຫ້​ຮູ້​ວ່າ ໄລ່​ມາ​ຮອດ​ທ້າຍ​ເດືອນ​ມິຖຸນາ ປີ 2018 RCB ໄດ້​ຫຼຸດ​ອັດຕາ​ສ່ວນ​ເງິນ​ໂດ​ລາ​ສະຫະລັດ​ຢູ່​ໃນ​ການ​ສຳຮອງ​ເງິນຕາ​ຕ່າງປະເທດ​ຂອງ​ຣັດ​ເຊຍ ລົງ​ຢ່າງ​ແຮງ ໂດຍ​ລົງ​ໄປ​ຍັງ​ເຫຼືອ​ທີ່ 24,4% ໃນ​ຂະນະ​ທີ່​ເງິນ​ເອີ​ໂຣ ແລະ ​ເງິນ​ຢວນ (ສະກຸນ​ເງິນ​ຂອງ​ຈີນ) ເພີ່ມ​ຂຶ້ນ 32% ແລະ 14,7% ຕາມ​ລຳດັບ.

    ໃນ​ໄຕ​ມາດ​ທີ 2/2018 ຊັບ​ສິນ​ສຳຮອງ​ດ້ວຍ​ເງິນຕາ​ຕ່າງປະເທດ ແລະ​ຄຳ ຂອງ RCB ກໍ​ຫຼຸດ​ລົງ​ຈາກ 460 ຕື້​ໂດ​ລາ​ສະຫະລັດ ມາ​ຍັງ​ເຫຼືອ​ທີ່ 458,1 ຕື້​ໂດ​ລາ​ສະຫະລັດ. ການ​ລົງທຶນ​ເຂົ້າ​ໃນ​ເງິນ​ຢວນ ທີ່​ປ່ຽນ​ອອກ​ເປັນ​ເງິນ​ໂດ​ລາ​ສະຫະລັດ ໄດ້​ເພີ່ມ​ຂຶ້ນ​ກວ່າ 44 ຕື້​ໂດ​ລາ​ສະຫະລັດ (ເກືອບ​ທົບ 3 ເທົ່າ​ຕົວ) ການ​ລົງທຶນ​ເຂົ້າ​ໃນ​ເງິນ​ເອີ​ໂຣ ເພີ່ມ​ຂຶ້ນ 45% (ເທົ່າ​ກັບ 44 ຕື້​ໂດ​ລາ​ສະຫະລັດ) ໃນ​ຂະນະ​ທີ່​ລົງທຶນ​ເຂົ້າ​ໃສ່​ເງິນ​ໂດ​ລາ​ສະຫະລັດ ຫຼຸດ​ລົງ​ເຄິ່ງ​ໜຶ່ງ (ເທົ່າ​ກັບ 100 ຕື້​ໂດ​ລາ​ສະຫະລັດ).

    ທ່ານ ອານ​ໂຕນ ຊີ​ລົວ​ນອບ ລັດຖະມົນຕີ​ກະຊວງ​ການ​ເງິນ​ຣັດ​ເຊຍ ເວົ້າ​ວ່າ RCB ມີ​ແຜນການ​ຫຼຸດຜ່ອນ​ການ​ສຳຮອງ​ເງິນ​ໂດ​ລາ​ສະຫະລັດ ເພື່ອ​ປ້ອງ​ກັນ​ກໍລະນີ​ທີ່​ຂີ້ຮ້າຍ​ທີ່​ສຸດ ກໍ​ຄື​ວ່າ  ສ  ອາ​ເມ​ຣິ​ກາ ງົດ​ການ​ສະໜອງ​ເງິນ​ໂດ​ລາ​ສະຫະລັດ ເຂົ້າ​ໄປ​ໃນ​ເສດຖະກິດ​ຂອງ​ຣັດ​ເຊຍ. ໃນ​ຂະນະ​ດຽວ​ກັນ ທ່ານ ຊີ​ລົວ​ນອບ ໃຫ້ການ​ຕີ​ລາຄາ​ວ່າ ການ​ຊຳລະ​ດ້ວຍ​ເງິນ​ຣຸບ (ສະກຸນ​ເງິນ​ຂອງ​ຣັດ​ເຊຍ) ກໍ​ສາມາດ​ຖື​ໄດ້​ວ່າ​ເປັນ​ມາດ​ຕະການ​ປ້ອງ​ກັນ.

ຂ່າວທີ່ກ່ຽວຂ້ອງ