ອັດຕາ​ຫວ່າງ​ງານ​ໃນ Eurozone ສືບຕໍ່​ຫຼຸດ​ລົງ

348 14 ມ.ກ. 2019 ຂ່າວຕ່າງປະເທດ
ອັດຕາ​ຫວ່າງ​ງານ​ໃນ Eurozone ສືບຕໍ່​ຫຼຸດ​ລົງ

    ອົງການ​ສະຖິຕິ​ເອີ​ຣົບ (Eurostat) ໄດ້​ປະກາດ​ຕົວ​ເລກ​ອອກ​ມາ​ເມື່ອ​ວັນ​ທີ 9 ມັງກອນ​ນີ້ ໃຫ້​ຮູ້​ວ່າ ອັດຕາ​ຄົນ​ຫວ່າງ​ງານ​ຢູ່​ໃນ​ເຂດ​ໃຊ້​ເງິນ​ເອີ​ໂຣ (Eurozone) ໃນ​ເດືອນ​ພະຈິກ ປີ 2018 ໄດ້​ຫຼຸດ​ລົງ ທ່າມກາງ​ຈຳນວນ​ຄົນ​ທີ່​ບໍ່​ມີ​ວຽກ​ເຮັດ​ງານ​ທຳ​ໃນ​ທະວີບ​ເອີ​ຣົບ ເຂົ້າ​ໄປ​ໃກ້​ແດນ​ກ່ອນ​ເກີດ​ວິ​ກິດ​ການ​ການ​ເງິນ 2007-2008. ອັດຕາ​ຫວ່າງ​ງານ​ຢູ່​ໃນ Eurozone ໄດ້​ຫຼຸດ​ລົງ​ໄປ​ທີ່ 7,9% ໃນ​ເດືອນ​ພະຈິກ ປີ 2018 ນັບ​ວ່າ​ເປັນ​ລະດັບ​ຕ່ຳ​ສຸດ​ໃນ​ຮອບ 10 ປີ​ທີ່​ຜ່ານ​ມາ. ອັດຕາ​ສ່ວນ​ດັ່ງກ່າວ ພວມ​ເປັນ​ໄປ​ໃນ​ທິດ​ທີ່​ຫຼຸດ​ລົງ​ຢ່າງ​ສະ​ໝ່ຳ​ສະເໝີ ນັບ​ແຕ່​ເວລາ​ທີ່​ລົງ​ສູ່​ຕ່ຳ​ກວ່າ​ແດນ​ສັນຍາ​ລັກ​ທີ່ 10% ໃນ​ເດືອນ​ກັນຍາ ປີ 2016 ເປັນຕົ້ນ​ມາ.

    ຈາກ​ຂໍ້​ມູນ​ໃໝ່​ຫຼ້າ​ສຸດ​ດັ່ງກ່າວ ເຫັນ​ວ່າ​ອັດຕາ​ຫວ່າງ​ງານ​ຂອງ Eurozone ພວມ​ກ້າວ​ເຂົ້າ​ໃກ້ ຫຼັກ​ໝາຍ​ສະເລ່ຍ​ທີ່ 7,5% ຊຶ່ງ​ບັນທຶກ​ໄວ້​ກ່ອນ​ວິ​ກິດ​ການ​ການ​ເງິນ​ລະຫວ່າງ​ປີ  2007-2008 ພ້ອມ​ກັນ​ນັ້ນ​ກໍ​ເປັນ​ການ​ກ້າວ​ໄປ​ໄກ​ຈາກ​ລະດັບ​ສູງ​ເປັນ​ປະຫວັດ​ການ​ທີ່ 12,1% ທີ່​ບັນທຶກ​ໄວ້ ຢູ່​ໃນ​ເວລາ​ທີ່​ວິ​ກິດ​ການ​ໜີ້​ສິນ ກ້າວ​ເຂົ້າ​ສູ່​ໄລຍະ​ມືດ​ມົນ​ທີ່​ສຸດ ໃນ​ປີ 2013.

    Eurostat ໃຫ້​ຮູ້​ວ່າ 19 ປະເທດ​ທີ່​ເປັນ​ສະມາຊິກ Eurozone ນັ້ນ​ມີ​ເຢຍ​ລະ​ມັນ ເປັນ​ປະເທດ​ທີ່​ມີ​ອັດຕາ​ຫວ່າງ​ງານ​ໃນ​ເດືອນ​ພະຈິກ ປີ 2018 ຢູ່​ທີ່​ລະດັບ​ຕ່ຳ​ສຸດ ຄື​ຢູ່​ທີ່  3,3%. ໃນ​ຂະນະ​ດຽວ​ກັນ ເກ​​ັຣກ ເປັນ​ປະເທດ​ທີ່​ມີ​ອັດຕາ​ສ່ວນ​ຜູ້​ອອກແຮງ​ງານ​ບໍ່​ມີ​ວຽກ​ເຮັດ​ງານ​ທຳ​ຢູ່​ໃນ​ລະດັບ​ສູງ​ສຸດ ຄື​ຢູ່​ທີ່ 18,6%.

    ເມື່ອ​ເບິ່ງ​ໄປ​ໃນ​ຂອບ​ເຂດ​ທົ່ວ​ສະຫະພາບ​ເອີ​ຣົບ (EU) ແລ້ວ ອັດຕາ​ຫວ່າງ​ງານ​ຂອງ​ທົ່ວ​ກຸ່ມ​ນີ້ ໃນ​ເດືອນ​ພະຈິກ ປີ 2018 ຢູ່​ທີ່ 6,7% ຊຶ່ງ​ເກືອບ​ວ່າ​ບໍ່​ມີ​ການ​ປ່ຽນແປງ ເມື່ອ​ທຽບໃສ່​ໃນ​ເດືອນ​ກ່ອນ​ໜ້າ​ນັ້ນ. ນີ້​ຍັງ​ເປັນ​ລະດັບ​ຕ່ຳ​ສຸດ ນັບ​ແຕ່​ເວລາ​ທີ່​​ີ Eurostat ເລີ່ມ​ດຳເນີນ​ການ​ເຮັດ​ສະຖິຕິ ໃນ​ປີ 2000 ເປັນຕົ້ນ​ມາ. 

ຂ່າວທີ່ກ່ຽວຂ້ອງ