ຂ່າວຫຼ້າສຸດ

ຂ່າວ​ສັ້ນ

292 15 ມ.ກ. 2019 ຂ່າວຕ່າງປະເທດ
ຂ່າວ​ສັ້ນ

    ຝຣັ່ງ: ວັນ​ທີ 12 ມັງກອນ​ນີ້ ຮ້ານ​ຂາຍ​ເຂົ້າຈີ່​ແຫ່ງ​ໜຶ່ງ ຢູ່​ໃຈກາງ​ນະຄອນຫຼວງ​ປາ​ຣີ (ປະເທດ​ຝຣັ່ງ) ໄດ້​ເກີດ​ເຫດ​ລະເບີດ​ຢ່າງ​ຮ້າຍ​ແຮງ ສົ່ງ​ຜົນ​ເຮັດ​ໃຫ້​ມີ​ຜູ້​ເສຍ​ຊີວິດ 3 ຄົນ ໃນ​ນັ້ນ​ເປັນ​ເຈົ້າ​ໜ້າທີ່​ດັບ​ເພີງ 2 ຄົນ ແລະ​ນັກ​ທ່ອງ​ທ່ຽວ​ຊາວ​ແອັດ​ສະ​ປາຍ 1 ຄົນ ພ້ອມ​ທັງ​ມີ​ຜູ້​ໄດ້​ຮັບ​ບາດເຈັບ 47 ຄົນ ໃນ​ນັ້ນ​ຢູ່​ໃນ​ອາການ​ສາຫັດ 10 ຄົນ. ອົງການ​ໄອ​ຍະ​ການ​ປາ​ຣີ ໄດ້​ດຳເນີນ​ການ​ສືບສວນ​ສອບ​ສວນ​ຫາ​ສາເຫດ​ທີ່​ພາໃຫ້​ເກີດ​ເຫດ​ລະເບີດ​ຄັ້ງ​ນີ້​ແລ້ວ ໂດຍ​ຢືນຢັນ​ວ່າ ອຸບັດເຫດ​ຄັ້ງ​ນີ້ ມີ​ສ່ວນ​ກ່ຽວຂ້ອງ​ກັບ​ການ​ຮົ່ວ​ໄຫຼ​ຂອງ​ອາຍ​ແກ​​ັສ​ທຳ​ມະ​ຊາດ ຊຶ່ງ​ເປັນ​ທີ່​ເດັ່ນ​ຊັດ​ແລ້ວ​ວ່າ ນີ້​ຄື​ອຸບັດເຫດ​ທີ່​ເກີດ​ຂຶ້ນ​ຢ່າງ​ບັງເອີນ.

   ໂອ​ຕຣິດ: ເຫດການ​ຫິມະ​ເຈື່ອນ ໄດ້​ເກີດ​ຂຶ້ນ​ເມື່ອ​ວັນ​ທີ 13 ມັງກອນ​ນີ້ ທີ່​ເຂດ​ຫຼິ້ນ​ສະ​ກີ​ນ້ຳ​ແຂງ​ແຫ່ງ​ໜຶ່ງ ໃນ​ແຂວງ ໂວ​ຣາ​​ລ​ເບີກ (ພາກ​ຕາເວັນຕົກ​ຂອງ​ປະເທດ ໂອ​ຕຣິດ) ສົ່ງ​ຜົນ​ໃຫ້​ຊາວ​ເຢຍ​ລະ​ມັນ ເສຍ​ຊີວິດ 3 ຄົນ ແລະ ​ຫາຍ​ສາບ​ສູນ​ອີກ 1 ຄົນ. ສະພາບ​ຫິມະ​ຕົກ​ໜາ​ຕຶບ ຢູ່​ໃນ​ເຂດ​ສາຍພູ ແອ​​ລ (Alps) ໃນ​ປະເທດ ໂອ​ຕຣິດ ໄດ້ແກ່​ຍາວ​ມາ​ຕະຫຼອດ​ອາທິດ​ທີ່​ຜ່ານ​ມາ ເຮັດ​ໃຫ້​ເຈົ້າ​ໜ້າທີ່​ຕ້ອງ​ໄດ້​ຍົກ​ລະດັບ​ແຈ້ງ​ເຕືອນ​ກ່ຽວ​ກັບ​ຫິມະ​ເຈື່ອນ ຈາກ​ລະດັບ 3 ຂຶ້ນ​ເປັນ​ລະດັບ 5 ເມື່ອ​ຫິມະ​ຕົກ​ຫຼາຍ ເຮັດ​ໃຫ້​ເສັ້ນທາງ​ຫຼາຍ​ສາຍ​ຢູ່​ອ້ອມແອ້ມ​ເຂດ​ນັ້ນ ເປັນ​ອຳມະພາດ.

    ນີ​ເຊຣີ: ໂຄສົກ​ຂອງ​ຕຳຫຼວດ​ໃນ​ລັດ ເອ​ກີ​ຕີ (ພາກ​ໃຕ້​ນີ​ເຊຣີ) ແຈ້ງ​ໃຫ້​ຮູ້​ວ່າ​ລົດ​ຂົນສົ່ງ​ຄັນ​ໜຶ່ງ ຊຶ່ງ​ບັນທຸກ​ເຂົ້າສານ ໄດ້​ເກີດ​ເສຍ​ຫຼັກ ແລ່ນ​ພຸ່ງ​ຕຳ​ຜູ້​ຄົນ​ຢູ່​ໃນ​ຕະຫຼາດ​ແຫ່ງ​ໜຶ່ງ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ ຢ່າງ​ໜ້ອຍ 20 ຄົນ ຊຶ່ງ​ຜູ້​ທີ່​ໄດ້​ຮັບ​ເຄາະ​ຮ້າຍ​ເຫຼົ່ານັ້ນ ສ່ວນ​ຫຼາຍ​ເປັນ​ຜູ້​ທີ່​ພວມ​ຊື້​ຂາຍ​ສິນຄ້າ ຢູ່​ບໍລິເວນ​ຂອບ​ທາງ.

    ເຢຍ​ລະ​ມັນ: ຂ່າວສານ ຊິນ​ຮວາ ລາຍ​ງານ​ອ້າງ​ຕາມ​ສື່ສານ​ໃນ​ເຢຍ​ລະ​ມັນ ໃຫ້​ຮູ້​ວ່າ ເຮືອບິນ​ຂະໜາດ​ນ້ອຍ​ລຳ​ໜຶ່ງ ໄດ້​ເກີດ​ອຸບັດເຫດ​ຕົກ​ເມື່ອ​ວັນ​ທີ 12 ມັງກອນ​ນີ້ ຢູ່​ໃນ​ພື້ນ​ທີ່​ລັດ ບຣັນ​ເດນ​ເບີກ (ເຢຍ​ລະ​ມັນ) ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 2 ຄົນ.

    ເອ​ກົວ​ດໍ: ສື່ສານ​ໃນ​ທ້ອງຖິ່ນ ລາຍ​ງານ​ວ່າ ມີ​ຜູ້​ເສຍ​ຊີວິດ 18 ຄົນ ແລະ​ບາດເຈັບ 12 ຄົນ ຈາກ​ເຫດການ​ໄຟ​ໄໝ້ ທີ່​ເກີດ​ຂຶ້ນ​ໃນ​ວັນ​ທີ 12 ມັງກອນ​ນີ້ ທີ່​ສູນ ບຳບັດ​ຄົນ​ເຈັບ "New Life" ໃນ​ນະຄອນ ກົວ​ຢາ​ກິນ (ພາກ​ຕາເວັນຕົກ​ຂອງ​ເອ​ກົວ​ດໍ) ຊຶ່ງ​ປິ່ນປົວ​ສະເພາະ​ໃຫ້​ແກ່​ຜູ້​ທີ່​ອອກ​ຈາກ​ການ​ຕິດ​ເຫຼົ້າ ແລະ ຢາ​ເສບ​ຕິດ.

ຂ່າວທີ່ກ່ຽວຂ້ອງ