ຈັນທະຈອນ ຍ້າຍຮ່ວມ ຣະຍອງເອັບຊີ ບານເຕະໄທລີກ 2

185 16 ມ.ກ. 2019 ວົງຈອນກີລາ
ຈັນທະຈອນ ຍ້າຍຮ່ວມ ຣະຍອງເອັບຊີ ບານເຕະໄທລີກ 2

    ອີງ​ຕາມ​ຂໍ້​ມູນ​ຈາກ​ສະ­ໂມ­ສອນ​ຣະ​ຍອງ​ເອັບ​ຊີ ທີມ​ໃນ​ການ​ແຂ່ງ­ຂັນ​ເຕະ­ບານ​ໄທ​ລີກ 2 ຂອງ​ປະ­ເທດ​ໄທ ໃນ​ວັນ​ທີ 15 ມັງ­ກອນ 2019 ໃຫ້​ຊາບ​ວ່າ: ປັດ­ຈຸ­ບັນ​ສະ­ໂມ­ສອນ​ຣະ​ຍອງ​ເອັບ​ຊີ ໄດ້​ນັກ​ເຕະ​ທັງ​ໝົດ 26 ຄົນ​ເປັນ​ທີ່​ຮຽບ​ຮ້ອຍ ໂດຍ​ມີ​ນັກ­ກີ­ລາ​ພາຍ​ໃນ​ປະ­ເທດ 21 ຄົນ ແລະ ຕ່າງ​ຊາດ 5 ຄົນ ເຊິ່ງ​ໃນ 5 ຄົນ​ນັ້ນ ແມ່ນ​ໄດ້​ບັນ­ລຸ​ຂໍ​ຕົກ­ລົງ​ຄວ້າ​ຕົວ​ທ້າວ ຈັນ­ທະ​ຈອນ ທິ​ໂນ​ລາດ ກອງ​ກາງ​ສະ­ໂມ­ສອນ ປກສ ເອັບ​ຊີ​ທີມ​ອັນ​ດັບ 2 ຂອງ​ການ​ແຂ່ງ­ຂັນ​ເຕະ­ບານ​ແປບ​ຊີ ລາວ​ພຣີ​ເມຍ​ລີກ 2018 ເຂົ້າ​ມາ​ຢູ່​ໃນ​ທີມ​ເປັນ​ໂກ​ຕ້າ​ອາ​ຊຽນ.

    ສຳ­ລັບ ຈັນ­ທະ​ຈອນ ທິ​ໂນ​ລາດ ແມ່ນ​ນັກ​ເຕະ​ແຂວງ​ຈຳ­ປາ​ສັກ ເປັນ​ນັກ­ກີ­ລາ​ເຍົາ­ວະ​ຊົນ​ຮຸ່ນ​ອາ­ຍຸ​ບໍ່​ເກີນ 19 ປີ​ຂອງ​ທີມ​ຊາດ​ລາວ ທີ່​ຜ່ານ​ມາ​ເຄີຍ​ຢູ່​ຮ່ວມ​ສະ­ໂມ­ສອນ​ໃນ​ລາວ​ພຣີ​ເມຍ​ລີກ​ມາ​ຫຼາຍ​ສະ­ໂມ­ສອນ​ແລ້ວ ເປັນ­ຕົ້ນ ສະ­ໂມ­ສອນ CSC ຈຳ­ປາ​ເອັບ​ຊີ ດີ​ເຄ​ເອັບ​ຊີ ແລະ ສະ­ໂມ­ສອນ ປກສ ເອັບ​ຊີ.

    ປັດ­ຈຸ­ບັນ ມີ​ນັກ​ເຕະ​ຈາກ​ລາວ​ເຊັນ​ສັນ­ຍາ​ເປັນ​ທາງ​ການ​ທີ່​ຫຼິ້ນ​ຢູ່​ລີກ​ປະ­ເທດ​ໄທ 7 ຄົນ ປະ­ກອບ​ມີ: ທ້າວ ສຸກ​ອາ­ພອນ ວົງ​ຈຽງ​ຄຳ (ໄຊ​ນາດ ເອັຟ​ຊີ ໄທ​ລີກ 1) ທ້າວ ຈັນ­ທະ​ຈອນ ທີ​ໂນ​ລາດ (ຣະ​ຢອງ ເອັຟ​ຊີ ໄທ​ລີກ 2) ທ້າວ ພຸດ​ທະ​ໄຊ ໂຄ​ຈະ­ເລີນ (ນະ­ຄອນ​ປະ­ຖົມ ເອັຟ​ຊີ ໄທ​ລີກ 3) ທ້າວ ແສງ​ວິ­ໄລ ຈັນ­ທະ​ສິ­ລິ (ໄທ​ລີກ 4) ທ້າວ ທົດ​ນີ​ລາດ ສີ​ບຸນ​ເຮືອງ (ພັດ​ທະ​ລຸງ ເອັຟ​ຊີ ໄທ​ລີກ 4) ທ້າວ ມິດ​ສະ​ດາ ສາຍ​ໃຕ້​ຟ້າ (ປັດ​ຕາ​ນີ ເອັຟ​ຊີ ໄທ​ລີກ 4) ແລະ ທ້າວ ພັດ­ທະ­ນາ ພົມ​ມະ​ເທດ (ອະ​ຄາ​ເດ​ມີ ຊົນ​ບູ​ຣີ ເອັຟ​ຊີ).

ຂ່າວທີ່ກ່ຽວຂ້ອງ