ຣັກບີ້ລາວ ກຽມຈັດແຂ່ງຂັນດີເຮັດແອວທ້າຍເດືອນນີ້

235 16 ມ.ກ. 2019 ວົງຈອນກີລາ
ຣັກບີ້ລາວ ກຽມຈັດແຂ່ງຂັນດີເຮັດແອວທ້າຍເດືອນນີ້

    ທ່ານ ປີ​ຊາ ວົງ​ເດືອນ​ເພັງ ຜູ້​ຈັດ­ການ​ຝ່າຍ​ພັດ­ທະ­ນາ​ກີ­ລາ​ຣັກ​ບີ້ ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ ໃຫ້​ສຳ­ພາດ​ວັນ​ທີ 15 ມັງ­ກອນ 2019 ວ່າ: ໃນ​ວັນ​ທີ 26-27 ມັງ­ກອນ ນີ້ ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ ກຽມ​ຈະ​ຈັດ­ການ​ແຂ່ງ­ຂັນ​ຣັກ​ບີ້​ດີ​ເຮັດ​ແອວ ນະ­ຄອນ­ຫຼວງ​ວຽງ​ຈັນ 10 ຄົນ ເຊິ່ງ​ຈະ​ແຂ່ງ­ຂັນ​ກັນ​ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ເລີ່ມ​ແຕ່​ເວ­ລາ 8:30-17:00 ໂມງ ຈະ​ແຂ່ງ­ຂັນ​ກັນ​ທັງ​ໝົດ 2 ຮຸ່ນ ປະ­ກອບ​ມີ​ຮຸ່ນ​ທີມ​ຊາຍ 12 ທີມ ແລະ ຮຸ່ນ​ທີມ​ຍິງ 6 ທີມ.

    ຈຸດ­ປະ­ສົງ​ເພື່ອ​ສ້າງ​ຂະ​ບວນ​ການ​ແຂ່ງ­ຂັນ​ໃຫ້​ທຸກ​ສະ­ໂມ­ສອນ​ໄດ້​ເຄື່ອນ​ໄຫວ ແລະ ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ເພື່ອ​ຊ່ວຍ​ໃນ​ການ​ພັດ­ທະ­ນາ​ລະ­ດັບ​ຂີດ​ຄວາມ​ສາ­ມາດ​ຂອງ​ນັກ­ກີ­ລາ ກໍ່​ຄື ບຸ​ຄະ­ລາ​ກອນ​ຂອງ​ສະ­ຫະ­ພັນ​ກີ­ລາ​ຣັກ​ບີ້​ແຫ່ງ​ຊາດ​ລາວ ທີ່​ຈັດ­ການ​ແຂ່ງ­ຂັນ​ໃຫ້​ທຽບ​ເທົ່າ​ການ​ແຂ່ງ­ຂັນ​ລະ­ດັບ​ສາ­ກົນ ນອກ​ນັ້ນ ຍັງ​ເປັນ​ການ​ປະ­ຕິ­ບັດ​ຕາມ​ທິດ​ຊີ້​ນຳ​ຂອງ​ຂັ້ນ​ເທິງ ກໍ່​ຄື ການ​ສົ່ງ­ເສີມ​ປີ​ທ່ອງ​ທ່ຽວ​ລາວ ເພາະ​ການ​ແຂ່ງ­ຂັນ​ຄັ້ງ​ນີ້ ຈະ​ມີ​ທີມ​ຈາກ​ຕ່າງ­ປະ­ເທດ​ຫຼາຍ​ທີມ​ເຂົ້າ​ຮ່ວມ​ນຳ​ອີກ.

ຂ່າວທີ່ກ່ຽວຂ້ອງ