ຂ່າວຫຼ້າສຸດ

ໄດມ້ອນ ຈະພັດທະນາຕົນເອງ ເປັນນັກເທັນນິດອາຊີບ

279 16 ມ.ກ. 2019 ວົງຈອນກີລາ
ໄດມ້ອນ ຈະພັດທະນາຕົນເອງ ເປັນນັກເທັນນິດອາຊີບ

    ຕາມ​ການ​ໃຫ້​ສຳ­ພາດ​ຂອງ​ທ່ານ ຕຸ້ຍ ບຸນ​ທະ­ລາ ຜູ້​ປົກ­ຄອງ​ຂອງ​ທ້າວ ໄດ​ມ້ອນ ບຸນ​ທະ­ລາ ໃນ​ວັນ​ທີ 15 ມັງ­ກອນ 2019 ໃຫ້​ຊາບ​ວ່າ: ຕະ­ຫຼອດ​ໄລ­ຍະ​ການ​ເລີ່ມ​ກີ­ລາ​ເທັນ​ນິດ​ຂອງ​ລູກ​ຊາຍ​ມາ​ໄດ້​ປີ​ປາຍ ເລີ່ມ​ແຕ່​ທ້າຍ​ປີ 2017 ສາ­ມາດ​ເຫັນ​ວ່າ​ລູກ​ຊາຍ​ມີ​ຄວາມ​ເອົາ­ໃຈ­ໃສ່​ສູງ​ຕໍ່​ກີ­ລາ​ນີ້​ເປັນ​ພິ­ເສດ ສະ­ນັ້ນ​ຈຶ່ງ​ສົ່ງ­ເສີມ​ລູກ​ຊາຍ​ຢ່າງ​ເຕັມ­ທີ່ ເພື່ອ​ເຮັດ​ແນວ­ໃດ​ຈະ​ໃຫ້​ຝັນ​ຂອງ​ລູກ​ຊາຍ​ຢາກ​ເປັນ​ນັກ­ກີ­ລາ​ລະ­ດັບ​ມື​ອາ­ຊີບ.

    ແນວ­ໃດ​ກໍ່​ດີ​ປີ 2019 ວາງ​ແຜນ​ຈະ​ນຳ­ພາ​ລູກ​ຊາຍ​ອອກ​ເຄື່ອນ​ໄຫວ​ຮ່ວມ​ແຂ່ງ­ຂັນ​ທັງ​ພາຍ​ໃນ ແລະ ຕ່າງ­ປະ­ເທດ ຫວັງ​ສ້າງ​ປະ­ສົບ​ການ​ໃຫ້​ໄດ​ມ້ອນ ມີ​ການ​ພັດ­ທະ­ນາ​ຈົນ​ກາຍ­ເປັນ​ນັກ­ກີ­ລາ​ເທັນ​ນິດ​ທີ່​ມີ​ຄວາມ​ຊຳ­ນິ​ຊຳ­ນານ ສາ­ມາດ​ກ້າວ​ໄປ​ສູ່​ລະ­ດັບ​ມື​ອາ­ຊີບ​ໃນ­ຕໍ່­ໜ້າ​ໃຫ້​ໄດ້​ໄວ​ທີ່​ສຸດ ເພື່ອ​ເປັນ​ໃບ​ໜ້າ​ໃໝ່​ໃຫ້​ວົງ​ການ​ກີ­ລາ​ເທັນ​ນິດ​ລາວ ແນ­ໃສ່​ສ້າງ​ຜົນ­ງານ​ໃນ​ເວ­ທີ​ອາ​ນຸ​ພາກ​ພື້ນ ແລະ ສາ­ກົນ​ໃນ​ອະ­ນາ­ຄົດ.

    ສຳ­ລັບ​ລາຍ­ການ​ທຳ​ອິດ​ທີ່​ໄດ້​ສົ່ງ​ໄດ​ມ້ອນ ເຂົ້າ​ຮ່ວມ​ແຂ່ງ­ຂັນ​ປີ 2019 ແມ່ນ​ລາຍ­ການ​ຢູ​ທີ​ອາ ໄທ​ແລນ ເທັນ​ນິດ​ທົວ 2019 ຢູ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ໃນ​ວັນ​ທີ 12-13 ມັງ­ກອນ 2019 ລາຍ­ການ​ນີ້ ເພື່ອ​ສະ​ສົມ​ຄະ­ແນນ​ຈັດ​ອັນ​ດັບ​ໃຫ້​ນັກ­ກີ­ລາ ວ່າ​ໃຜ​ຈະ​ສາ­ມາດ​ໄດ້​ກາຍ­ເປັນ​ນັກ­ກີ­ລາ​ເທັນ​ນິດ​ມື 1 ມື 2 ມື 3 ແລະ ມື​ຕ່າງໆ​ຕາມ​ລຳ­ດັບ​ຂອງ​ລາຍ­ການ​ດັ່ງ­ກ່າວ ແຕ່​ໜ້າ​ເສຍ​ດ່າຍ ໄດ​ມ້ອນ ຖືກ​ຈັດ​ໄປ​ແຂ່ງ­ຂັນ​ກັບ​ນັກ­ກີ­ລາ​ຮຸ່ນ​ອາ­ຍຸ 14 ປີ ເຊິ່ງ​ລູກ​ຊາຍ​ເອງ​ມີ​ອາ­ຍຸ​ພຽງ 9 ປີ​ປາຍ​ເທົ່າ​ນັ້ນ ເຫດ­ຜົນ​ທີ່​ເຂົາ​ຈັດ​ໃສ່​ຍ້ອນ​ວ່າ​ສີ­ມື​ຂອງ ໄດ​ມ້ອນ ແມ່ນ​ຢູ່​ໃນ​ລະ­ດັບ​ຮຸ່ນ​ນີ້.

    ລາຍ­ການ​ດັ່ງ­ກ່າວ ມີ​ນັກ­ກີ­ລາ​ຈາກ​ຫຼາຍ​ປະ­ເທດ​ເຂົ້າ​ຮ່ວມ ໂດຍ​ແບ່ງ​ອອກ​ເປັນ 3 ກຸ່ມ ສະ­ເພາະ​ກຸ່ມ​ຂອງ​ໄດ​ມ້ອນ ມີ 5 ຄົນ ໂດຍ​ແມ່ນ​ນັກ­ກີ­ລາ​ຄົນ​ໄທ​ໝົດ 4 ຄົນ ຜ່ານ​ການ​ແຂ່ງ­ຂັນ ໄດ​ມ້ອນ ສາ­ມາດ​ເອົາ​ຊະ­ນະ​ນັກ­ກີ­ລາ​ໄທ​ໄດ້​ເຖິງ 2 ຄົນ 4-0 ແລະ 4-1 ເກມ ແລະ ເສຍ 2 ຄົນ 1-4 ແລະ 0-4 ເກມ ຜົນ­ງານ​ດັ່ງ­ກ່າວ ໄດ​ມ້ອນ ຕີ​ດີ​ຫຼາຍ​ແຕ່​ສູ້​ແຮງ​ເຂົາ­ເຈົ້າ​ບໍ່​ໄດ້ ແຖມ​ມາ­ຕີ​ເດີ່ນ​ມາດ­ຕະ­ຖານ​ຂອງ​ຜູ້​ໃຫຍ່​ອີກ ແນວ­ໃດ​ກໍ່​ຕາມ ປະ­ສົບ​ການ​ຄື​ບົດ­ຮຽນ​ອັນ​ລ້ຳ​ຄ່າ ໃນ​ວັນ​ທີ 26-27 ມັງ­ກອນ 2019 ຈະ​ສືບ­ຕໍ່​ສົ່ງ ໄດ​ມ້ອນ ເຂົ້າ​ຮ່ວມ​ລາຍ­ການ​ນີ້​ຈັດ​ເປັນ​ຄັ້ງ​ທີ 2 ທີ່​ນະ­ຄອນ­ຫຼວງ​ບາງ­ກອກ​ຕື່ມ​ອີກ.

ຂ່າວທີ່ກ່ຽວຂ້ອງ