ຂ່າວຫຼ້າສຸດ

ລັດ​ນີວ​ຢອກ ປັບ​ຂຶ້ນ​ອະ​ຍຸ​ຂັ້ນ​ຕ່ຳ​ທີ່​ສາມາດ​ຊື້​ຢາສູບ​ໄດ້

319 17 ມ.ກ. 2019 ຂ່າວຕ່າງປະເທດ
ລັດ​ນີວ​ຢອກ ປັບ​ຂຶ້ນ​ອະ​ຍຸ​ຂັ້ນ​ຕ່ຳ​ທີ່​ສາມາດ​ຊື້​ຢາສູບ​ໄດ້

      ວັນ​ທີ 12 ມັງກອນ​ທີ່​ຜ່ານ​ມາ ທ່ານ ແອນ​ດຣີວ ກູ​ໂອ​ໂມ ຜູ້​ວ່າການ​ລັດ​ນີວ​ຢອກ ຂອງ ສ ອາ​ເມ​ຣິ​ກາ ໄດ້​ນຳ​ປະກາດ​ແຜນການ ກ່ຽວ​ກັບ​ການ​ປັບ​ຂຶ້ນ​ອາຍຸ​ຂັ້ນ​ຕ່ຳ​ທີ່​ສາມາດ​ຊື້​ຢາສູບ ແບບ​ດັ້ງເດີມ ແລະ ​ຢາສູບ​ເອ​ເລັກ​ໂຕຣ​ນິກ​ໄດ້ ຈາກ 18 ປີ ຂຶ້ນ​ເປັນ 21 ປີ. ຄາດ​ວ່າ ແຜນການ​ດັ່ງກ່າວ ຈະ​ໄດ້​ນຳ​ເຂົ້າ​ສູ່​ງົບປະມານ​ປີ 2019.

    ຖະແຫຼງການ​ສະບັບ​ໜຶ່ງ ຈາກ​ຫ້ອງ​ວ່າການ ຂອງ​ຜູ້​ວ່າການ​ລັດ​ນີວ​ຢອກ ໃຫ້​ຮູ້​ວ່າ ການເຄື່ອນໄຫວ​ດັ່ງກ່າວ ແມ່ນ​ເພື່ອ​ຊ່ວຍ​ສະກັດ​ກັ້ນ ສະພາບ​ການ​ທີ່​ຊາວ​ໜຸ່ມ​ເຍົາວະ​ຊົນ ທີ່​ມີ​ອາຍຸ​ຕ່ຳ​ກວ່າ​ແດນ​ອະນຸຍາດ​ມີ​ຢາສູບ​ແບບ​ດັ້ງເດີມ ແລະ​ຜະລິດ​ຕະ​ພັນ​ຢາສູບ​ເອ​ເລັກ​ໂຕຣ​ນິກ ມາ​ຈາກ​ໝູ່​ເພື່ອນ ທີ່ຢູ່​ໃນ​ໄວ​ສູງ​ກວ່າ 18 ປີ. ການ​ສະເໜີ​ດັ່ງກ່າວ ຍັງ​ຮຽກຮ້ອງ​ໃຫ້​ຢຸດຕິ​ການ​ຂາຍ​ບັນດາ​ຜະລິດ​ຕະ​ພັນ​ຢາສູບ ຢູ່​ໃນ​ຮ້ານ​ຂາຍ​ຢາ ເພາະວ່າ​ມັນ “ບົ່ງ​ບອກ​ເຖິງ​ຄວາມ​ບໍ່​ຊັດ​ເຈນ ທີ່​ວ່າ​ຜະລິດ​ຕະ​ພັນ​ຢາ​ນັ້ນ​ມີ​ຄວາມ​ປອດ​ໄພ.”

    ຂໍ້​ມູນ​ຈາກ​ຫ້ອງ​ວ່າການ ຂອງ​ຜູ້​ວ່າການ​ລັດ​ນີວ​ຢອກ ໃຫ້​ຮູ້​ວ່າ ການ​ບໍລິໂພກ​ຢາສູບ ເປັນ​ສາເຫດ​ອັນ​ດັບ​ໜຶ່ງ​ຂອງ​ການ​ເສຍ​ຊີວິດ ທີ່​ສາມາດ​ປ້ອງ​ກັນ​ໄດ້​ຢູ່​ພາຍ​ໃນ​ລັດ​ນີ້ ແລະ​ມີ​ຊາວ​ໜຸ່ມ​ເຍົາວະ​ຊົນ​ໃຊ້​ຢາສູບ ທັງ​ຢາສູບ​ແບບ​ດັ້ງເດີມ ແລະ​ຢາສູບ​ເອ​ເລັກ​ໂຕຣ​ນິກ ນັບ​ມື້​ນັບ​ຫຼາຍ​ຂຶ້ນ. ໃນ​ໄລຍະ​ປີ 2014-2018 ຊາວ​ໜຸ່ມ​ເຍົາວະ​ຊົນ ໃຊ້​ຢາສູບ​ເອ​ເລັກ​ໂຕຣ​ນິກ ເພີ່ມ​ຂຶ້ນ​ຈາກ 10,5% ເປັນ 27,4%. ຜູ້​ວ່າການ​ລັດ​ນີວ​ຢອກ ເວົ້າ​ວ່າ ຊາວ​ໜຸ່ມ​ເຍົາວະ​ຊົນ​ກວ່າ​ເຄິ່ງ​ໜຶ່ງ ຫຼົງ​ຄິດ​ວ່າການ​ໃຊ້​ຢາສູບ​ເອ​ເລັກ​ໂຕຣ​ນິກ ນັ້ນ​ບໍ່​ມີ​ຜົນ​ຮ້າຍ.

   ຜົນ​ການ​ຄົ້ນຄວ້າ ທີ່​ຈັດ​ທຳ​ໂດຍ​ສູນ​ຄວບ​ຄຸມ ແລະ ​ສະກັດ​ກັ້ນ​ພະຍາດ ຂອງ ສ ອາ​ເມ​ຣິ​ກາ ໃຫ້​ຮູ້​ວ່າ ການ​ເພີ່ມ​ອາຍຸ​ຂັ້ນ​ຕ່ຳ​ໃນ​ການ​ຊື້​ຢາສູບ ຈາກ 18 ປີ ຂຶ້ນ​ເປັນ 21 ປີ ໄດ້​ຮັບ​ການ​ສະໜອງ​ຕອບ​ຈາກ 3/4 ຂອງ​ຊາວ​ອາ​ເມ​ຣິ​ກັນ ໃນ​ໄວ​ຜູ້​ໃຫຍ່.

ຂ່າວທີ່ກ່ຽວຂ້ອງ