ຂ່າວຫຼ້າສຸດ

ປະຊາຊົນ​ອູ​ແກຣນ 62% ເຊື່ອ​ວ່າ​ປະເທດ​ຊາດ​ພວມ​ຫຼົງ​ທາງ

507 17 ມ.ກ. 2019 ຂ່າວຕ່າງປະເທດ
ປະຊາຊົນ​ອູ​ແກຣນ 62% ເຊື່ອ​ວ່າ​ປະເທດ​ຊາດ​ພວມ​ຫຼົງ​ທາງ

     ແຫຼ່ງ​ຂ່າວ Sputniknews ລາຍ​ງານ​ວ່າ ການ​ສຳ​ຫຼວດ ທີ່​ຈັດ​ທຳ​ໂດຍ​ສະ​ຖາ​ບັນ​ຄົ້ນຄວ້າ ແລະ ​ພະ​​ຍ​ກອນ​ຂອງ​ອູ​ແກຣນ ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 11 ມັງກອນ​ທີ່​ຜ່ານ​ມາ ໃຫ້​ຮູ້​ວ່າ ປະຊາຊົນ​ອູ​ແກຣນ 62% ເຊື່ອ​ວ່າ​ປະເທດ​ຂອງ​ຕົນ​ພວມ​ຫຼົງ​ທາງ.

    ຜົນ​ຂອງ​ການ​ສຳ​ຫຼວດ​ດັ່ງກ່າວ ໃຫ້​ຮູ້​ຕື່ມ​ວ່າ ມີ​ພຽງ 28% ຂອງ​ຜູ້​ທີ່​ຖືກ​ຊັກ​ຖາມ​ເຊື່ອ​ວ່າ ອູ​ແກຣນ​ພວມ​ເດີນ​ຕາມ​ແນວທາງ​ທີ່​ຖືກຕ້ອງ ແລະ 10% ຂອງ​ຈຳນວນ​ຜູ້​ທີ່​ຖືກ​ຊັກ​ຖາມ ບໍ່​ໄດ້​ມີ​ຄຳ​ຕອບ​ທີ່​ຈະແຈ້ງ​ອອກ​ມາ.

   ການ​ສຳ​ຫຼວດ​ຂ້າງ​ເທິງ​ນັ້ນ ດຳເນີນ​ໄປ​ດ້ວຍ​ການ​ຊັກ​ຖາມ​ປະຊາຊົນ 2.016 ຄົນ ໃນ​ທົ່ວ​ປະເທດ​ອູ​ແກຣນ ໃນ​ໄລຍະ​ແຕ່​ວັນ​ທີ 26 ທັນວາ 2018 ຫາ​ວັນ​ທີ 4 ມັງກອນ 2019.

   ໃນ​ຂະນະ​ດຽວ​ກັນ ການ​ຄາດ​ຄະເນ​ໃໝ່​ຫຼ້າ​ສຸດ ຂອງ​ທະນາຄານ​ໂລກ (WB) ໃຫ້​ຮູ້​ວ່າ ຈັງຫວະ​ຄວາມ​ເຕີບ​ໂຕ ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຢູ່​ໃນ​ອູ​ແກຣນ ຈະ​ລົງ​ໄປ​ຍັງ​ເຫຼືອ​ທີ່ 2,9% ເປັນ​ການ​ຫຼຸດ​ລົງ​ຢ່າງ​ແຮງ ເມື່ອ​ທຽບໃສ່​ລະດັບ​ຄາດ​ຄະເນ 3,5% ຊຶ່ງ WB ນຳ​ອອກ​ມາ​ເມື່ອ​ເດືອນ​ຕຸລາ​ປີ​ກາຍ.

ຂ່າວທີ່ກ່ຽວຂ້ອງ