ເບິ່ງບ້ານເຂົາເອົາບົດຮຽນ 17/01/2019

179 17 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້ ຂໍ​ສະ­ເໜີ​ກ່ຽວ​ກັບ​ນະ­ໂຍ­ບາຍ​ເພີ່ມ​ເງິນ­ເດືອນ​ຂັ້ນ​ຕ່ຳ ສຳ­ລັບ​ນັກ​ໜັງ­ສື­ພິມ​ທີ່ ເນ​ປານ ເລື່ອງ​ການ​ເພີ່ມ​ເງິນ​ແຮງ​ງານ​ຂັ້ນ​ຕ່ຳ​ຢູ່ ນິວ​ຢອກ ສ ອາ​ເມ​ຣິ​ກາ ແລະ ສຸດ​ທ້າຍ​ແມ່ນ​ຂ່າວ​ການ​ຈັບ​ກຸ່ມ​ແກ້ງ​ຈັດ​ສົ່ງ​ອົບ​ພະ​ຍົບ​ເຂົ້າ ແອັດ​ສະ​ປາຍ.

    ທີ່ ເນ​ປານ: ມີ​ຂ່າວ​ແຕ່​ເດືອນ​ຕຸ­ລາ​ປີ­ຜ່ານ­ມາ​ວ່າ ລັດ­ຖະ­ບານ ເນ​ປານ ໄດ້​ຕົກ­ລົງ​ເພີ່ມ​ເງິນ­ເດືອນ​ຂັ້ນ​ຕ່ຳ​ສຳ­ລັບ​ນັກ​ໜັງ­ສື­ພິມ ແລະ ຄົນ​ສື່ ຂຶ້ນ 25% ແນ່­ນອນ​ຂ່າວ​ນີ້​ໄດ້​ເຮັດ​ໃຫ້​ມວນ​ຊົນ​ຄົນ​ທີ່​ເຮັດ​ວຽກ​ສື່​ໃນ​ທົ່ວ​ປະ­ເທດ ເນ​ປານ ມີ​ຮອຍ​ຍິ້ມ​ເປິ່ນ​ເວີ່ນ ເຕັມ​ໃບ​ໜ້າ ນະ­ໂຍ­ບາຍ​ດີໆ​ດັ່ງ­ກ່າວ​ໄດ້​ເລີ່ມ​ມີ​ຜົນ​ສັກ­ສິດ ໃນ​ເດືອນ​ຕຸ­ລາ​ປີ­ຜ່ານ­ມາ​ນີ້ ສະ­ແດງ​ໃຫ້​ເຫັນ​ວ່າ ທາງ​ການ​ຂອງ​ປະ­ເທດ​ນີ້ ເອົາ­ໃຈ­ໃສ່​ເລື່ອງ​ປາກ-ທ້ອງ​ຂອງ​ຄົນ​ໃນ​ຂະ­ແໜງ​ທີ່​ມັກ​ເຍີ້ຍ​ກັນ​ວ່າ​ເປັນ “ອາ­ຊີບ​ໄສ້​ແຫ້ງ” ຄື​ດຽວ​ກັບ​ທ້ອງ​ແມງ​ຈັກ­ຈັ່ນ ທີ່​ໄດ້​ແຕ່​ຮ້ອງ​ແຕ່​ທ້ອງ​ແວບ ຕາມ​ປົກ­ກະ­ຕິ​ເງິນ­ເດືອນ​ຂັ້ນ​ຕ່ຳ​ຂອງ​ນັກ​ໜັງ­ສື­ພິມ ແລະ ຄົນ​ສື່​ໃນ ເນ​ປານ ນັ້ນ​ມີ​ພຽງ 19.500 ຣູ​ປີ​ຕໍ່​ເດືອນ (1 ໂດ​ລາ​ສະ­ຫະ­ລັດ ແລກ​ໄດ້​ປະ­ມານ 90 ຣູ​ປີ).

    ທີ່ ສະ­ຫະ­ລັດ​ອາ​ເມ​ຣິ​ກາ: ເຊັ່ນ​ດຽວ​ກັບ​ຢູ່ ເນ​ປານ ທາງ​ການ ສ ອາ​ເມ​ຣິ​ກາ ກໍ່​ໄດ້​ເພີ່ມ​ເງິນ­ເດືອນ​ຂັ້ນ​ຕ່ຳ​ໃຫ້​ແຮງ​ງານ ຕ່າງ​ແຕ່​ວ່າ​ບໍ່​ແມ່ນ​ສະ­ເພາະ​ມວນ​ຊົນ​ຄົນ​ສື່ ການ​ເພີ່ມ​ເງິນ­ເດືອນ​ຂັ້ນ​ຕ່ຳ​ໃນ​ຄັ້ງ​ນີ້ ແມ່ນ​ສະ­ເພາະ​ແຮງ​ງານ ຢູ່​ມະ­ຫາ​ນະ­ຄອນ​ນິວ​ຢອກ​ເທົ່າ​ນັ້ນ (ໜັງ­ສື­ພິມ​ປະ­ເທດ​ລາວ 8 ມັງ­ກອນ 2019) ເງິນ­ເດືອນ​ຂັ້ນ​ຕ່ຳ​ທີ່​ປັບ​ຂຶ້ນ​ນີ້ ແມ່ນ 15 ໂດ​ລາ​ຕໍ່​ຊົ່ວ­ໂມງ ຂ່າວ​ບອກ​ວ່າ ການ​ປັບ​ຂຶ້ນ​ເງິນ­ເດືອນ​ຂັ້ນ​ຕ່ຳ​ຄັ້ງ​ນີ້ ແມ່ນ​ເພື່ອ​ຫຼຸດ­ຜ່ອນ​ອັດ­ຕາ​ຄວາມ­ທຸກ​ຍາກ​ໃນ​ເມືອງ​ໃຫຍ່ ລະ­ດັບ​ທີ 1 ຂອງ​ປະ­ເທດ ລາຍ​ລະ­ອຽດ​ກ່ຽວ​ກັບ​ລະ­ບຽບ​ການ ເພີ່ມ​ເງິນ­ເດືອນ​ຂັ້ນ​ຕ່ຳ​ມີ​ຢູ່​ວ່າ ບັນ­ດາ​ວິ​ສາ​ຫະ​ກິດ​ທີ່​ມີ​ພະ­ນັກ­ງານ ຢ່າງ​ໜ້ອຍ 11 ຄົນ​ຂຶ້ນ​ໄປ ຕ້ອງ​ໄດ້​ປັບ​ຂຶ້ນ​ເງິນ­ເດືອນ​ຂັ້ນ​ຕ່ຳ 15 ໂດ​ລາ/ໂມງ ນັບ​ແຕ່​ວັນ​ທີ 31 ເດືອນ​ຕຸ­ລາ 2018 ເປັນ­ຕົ້ນ​ໄປ ສຳ­ລັບ​ວິ​ສາ​ຫະ​ກິດ​ທີ່​ມີ­ແຮງ​ງານ ໜ້ອຍ​ກວ່າ 11 ຄົນ ຕ້ອງ​ປັບ​ຂຶ້ນ​ເງິນ­ເດືອນ​ຂັ້ນ​ຕ່ຳ 13,5 ໂດ​ລາ/ໂມງ ແລະ ຕ້ອງ​ປັບ​ຂຶ້ນ​ເປັນ 15 ໂດ​ລາ/ໂມງ ໃຫ້​ເທົ່າ​ກັບ​ວິ​ສາ​ຫະ​ກິດ ທີ່​ມີ­ແຮງ​ງານ ແຕ່ 11 ຄົນ​ຂຶ້ນ​ໄປ ພາຍ​ໃນ​ທ້າຍ​ເດືອນ​ທັນ­ວາ 2019.

    ທີ່ ແອັດ​ສະ​ປາຍ: (ສະ​ເປນ) ບັນ­ຫາ​ເຈັບ​ຫົວ​ສຳ­ລັບ​ບັນ­ດາ​ປະ­ເທດ​ໃນ ເອີ​ຣົບ ກໍ່​ແມ່ນ​ເລື່ອງ​ອົບ​ພະ​ຍົບ​ຈາກ​ເຂດ​ຕາ­ເວັນ​ອອກ​ກາງ ແລະ ອາ​ຟຣິ​ກາ ຫຼັ່ງ­ໄຫຼ​ເຂົ້າ​ໄປ​ຢູ່​ອາ­ໄສ​ນຳ ໃນ​ນັ້ນ ລວມ​ທັງ​ປະ­ເທດ ແອັດ​ສະ​ປາຍ ທີ່​ເປັນ​ເປົ້າ​ໝາຍ​ປາຍ­ທາງ​ໜຶ່ງ​ຂອງ​ຊາວ​ອົບ​ພະ​ຍົບ ຂ່າວ​ຕ່າງ­ປະ­ເທດ ໃນ​ວັນ​ທີ 11 ເດືອນ​ມັງ­ກອນ​ນີ້​ໃຫ້​ຮູ້​ວ່າ: ທາງ​ການ ແອັດ​ສະ​ປາຍ ໄດ້​ບຸກ​ເຂົ້າ​ກວດ​ຄົ້ນ​ເຮືອນ​ພັກ​ແຫ່ງ​ໜຶ່ງ ແລະ ສາ­ມາດ​ຈັບ​ກຸມ​ຜູ້​ຕ້ອງ​ສົງ​ໃສ ຈຳ­ນວນ 8 ຄົນ ໃນ​ເມືອງ ອັນ​ເມ​ເຣຍ ແຂວງ​ອັນ​ຕາ​ລູ​ເຊຍ ທັງ 8 ຄົນ ທີ່​ຈັບ​ໄດ້​ແມ່ນ​ສ່ວນ​ໜຶ່ງ​ຂອງ​ກຸ່ມ​ແກ້ງ​ທີ່​ຊອກ​ລາຍ​ໄດ້ ດ້ວຍ​ການ​ຈັດ​ສົ່ງ​ອົບ​ພະ​ຍົບ​ຂ້າມ​ທະ­ເລ ເມ​ດີ​ເຕ​ຣາ​ເນ ເພື່ອ​ເຂົ້າ​ໄປ ແອັດ​ສະ​ປາຍ ໂດຍ​ພວກ​ເຂົາ​ໄດ້​ຮີດ​ໄຖ​ເງິນ ຈຳ­ນວນ 2.000 ເອີ​ໂຣ​ຕໍ່​ຄົນ ຈາກ​ຊາວ​ອົບ​ພະ​ຍົບ​ຂ່າວ​ບອກ​ວ່າ ພວກ​ກຸ່ມ​ແກ້ງ​ມີ​ລາຍ​ໄດ້ ປະ­ມານ 25.000 ເອີ​ໂຣ ຈາກ​ແຕ່​ລະ​ຖ້ຽວ ເຮືອ​ຂົນ­ສົ່ງ​ຊາວ​ອົບ​ພະ​ຍົບ​ເຂົ້າ​ໄປ ແອັດ​ສະ​ປາຍ ນັບ​ແຕ່​ເດືອນ​ສິງ­ຫາ 2018 ເຖິງ​ປັດ­ຈຸ­ບັນ ກຸ່ມ​ແກ້ງ​ໄດ້​ລັກ­ລອບ​ຈັດ​ສົ່ງ​ອົບ​ພະ​ຍົບ​ເຂົ້າ​ໄປ ແອັດ​ສະ​ປາຍ ຈຳ­ນວນ 500 ຄົນ​ແລ້ວ.

ຂ່າວທີ່ກ່ຽວຂ້ອງ