ປູກມັນເພົາຂາຍ ສ້າງລາຍຮັບ 100 ກວ່າລ້ານກີບຕໍ່ປີ

156 17 ມ.ກ. 2019 ຂ່າວໜ້າ​ໜຶ່ງ
ປູກມັນເພົາຂາຍ ສ້າງລາຍຮັບ 100 ກວ່າລ້ານກີບຕໍ່ປີ

    ພັກ ແລະ ລັດ­ຖະ­ບານ​ລາວ ຍາມ​ໃດ​ກໍ່​ໄດ້​ເອົາ­ໃຈ­ໃສ່​ຊຸກ­ຍູ້ ແລະ ສົ່ງ­ເສີມ​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ເຮັດ​ການ​ຜະ­ລິດ​ເປັນ​ບັນ­ຫາ​ທີ່​ສຳ­ຄັນ ເພື່ອ​ສ້າງ​ເສດ­ຖະ­ກິດ​ໃຫ້​ຄອບ­ຄົວ​ມີ​ຢູ່​ມີ​ກິນ ຜະ­ລິດ​ຫຼາຍ​ກາຍ­ເປັນ​ສິນ­ຄ້າ ສ້າງ​ໃຫ້​ຄອບ­ຄົວ​ມີ​ລາຍ​ຮັບ​ເພີ່ມ ກ້າວ​ສູ່​ການ​ມີ​ຊີ­ວິດ​ດີ​ຂຶ້ນ ແລະ ຫຼຸດ​ພົ້ນ​ຈາກ​ຄວາມ­ທຸກ​ຍາກ.

    ປ້າ ບົວ​ຄຳ ລະ­ຄອນ​ໄຊ ປະ­ຊາ­ຊົນ​ບ້ານ​ຊຽງ​ຄວນ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ແມ່ນ​ຜູ້​ໜຶ່ງ​ທີ່​ໄດ້​ຢຶດ​ຖື​ອາ­ຊີບ​ການ​ຜະ­ລິດ​ເປັນ​ສິນ­ຄ້າ ເປັນ­ຕົ້ນ ການ​ເຮັດ​ນາ ແລະ ເຮັດ​ສວນ ຫຼັງ​ຈາກ​ການ​ເກັບ​ກ່ຽວ​ເຂົ້າ­ນາ​ສຳ­ເລັດ​ຕາມ​ລະ­ດູ​ການ​ແລ້ວ ກໍ່​ໄດ້​ສືບ­ຕໍ່​ເຮັດ​ສວນ​ປູກ​ມັນ​ເພົາ ແລະ ພືດ​ຜັກ​ອື່ນໆ​ເປັນ​ອາ­ຊີບ​ເສີມ ໂດຍ​ທີ່​ບໍ່​ປ່ອຍ­ປະ​ໃຫ້​ເວ­ລາ​ເສຍ​ໄປ​ລ້າໆ.

    ປ້າ ບົວ​ຄຳ ລະ­ຄອນ​ໄຊ ໄດ້​ໃຫ້​ສຳ­ພາດ ວັນ​ທີ 15 ມັງ­ກອນ 2019 ວ່າ: ລະ­ດູ​ນີ້ ເປັນ​ໄລ­ຍະ​ຂອງ​ການ​ເກັບ​ກູ້​ຜົນ​ຜະ­ລິດ​ມັນ​ເພົາ ໂດຍ​ຈະ​ສັງ­ເກດ​ເຫັນ​ການ​ວາງ​ຂາຍ​ຢູ່​ຕະ­ຫຼາດ​ທົ່ວ​ໄປ ແລະ ສະ­ຖານ­ທີ່​ອື່ນໆ​ສະ­ເພາະ​ໄລ­ຍະ​ນີ້​ເທົ່າ​ນັ້ນ ມັນ​ເພົາ​ສາ­ມາດ​ປູກ ແລະ ເກັບ​ກູ້​ໄດ້​ພຽງ​ເທື່ອ​ດຽວ​ຕໍ່​ປີ ເລີ່ມ​ແຕ່​ເດືອນ​ມັງ­ກອນ-ມີ­ນາ ໂດຍ​ໃຊ້​ເວ­ລາ​ປູກ 3 ເດືອນ ໄລ­ຍະ​ການ​ປູກ​ເລີ່ມ​ແຕ່​ເດືອນ​ຕຸ­ລາ-ມັງ­ກອນ ເພາະ​ມັນ​ເພົາ​ເປັນ​ພືດ​ທີ່​ບໍ່​ມັກ​ນ້ຳ ແຕ່​ປູກ​ງ່າຍ​ໃຊ້​ທຶນ​ບໍ່​ຫຼາຍ ມີ​ຄວາມ​ທົນ​ທານ​ຕໍ່​ຄວາມ​ແຫ້ງ­ແລ້ງ​ໄດ້ ແລະ ສາ­ມາດ​ສ້າງ​ລາຍ​ຮັບ​ໄດ້​ດີ ໂດຍ​ຂ້າ­ພະ­ເຈົ້າ​ໄດ້​ຢຶດ​ຖື​ອາ­ຊີບ​ນີ້​ມາ​ໄດ້ 30 ປີ​ແລ້ວ ແຕ່​ລະ​ປີ​ຫຼັງ​ຈາກ​ເກັບ​ກ່ຽວ​ຜົນ​ຜະ­ລິດ​ເຂົ້າ­ນາ​ສຳ­ເລັດ ກໍ່​ໄດ້​ຫັນ​ມາ​ປູກ​ມັນ​ເພົາ​ຂາຍ ເພື່ອ​ສ້າງ​ລາຍ​ຮັບ​ເສີມ​ໃຫ້​ຄອບ­ຄົວ​ໄດ້​ປີ​ລະ 100 ກວ່າ​ລ້ານ​ກີບ ເຮັດ​ໃຫ້​ຄອບ­ຄົວ​ຂອງ​ຂ້າ­ພະ­ເຈົ້າ​ກຸ້ມ​ຢູ່​ກຸ້ມ​ກິນ ແລະ ເປັນ​ທຶນ​ການ​ສຶກ​ສາ​ໃຫ້​ລູກ​ຫຼານ​ໄດ້​ອີກ.

    ສຳ­ລັບ​ເນື້ອ­ທີ່​ປູກ ມີ 30 ໄລ່ ພາຍ­ຫຼັງ​ປູກ​ແລ້ວ​ກໍ່​ບໍ່​ໄດ້​ຮັກ­ສາ​ຍາກ ບໍ່​ໄດ້​ຫ່ວງ​ໃນ​ການ​ຫົດ​ນ້ຳ ໃສ່​ຝຸ່ນ​ຫຍັງ​ເລີຍ ພຽງ​ແຕ່​ໝັ່ນ​ເສຍ​ຫຍ້າ​ບໍ່​ໃຫ້​ຮົກ­ເຮື້ອ ພໍ​ຮອດ​ຍາມ​ກໍ່​ສາ­ມາດ​ເກັບ​ຂາຍ​ໄດ້​ໃນ​ລາ­ຄາ​ສົ່ງ 30.000 ກີບ​ຕໍ່ 1 ໝື່ນ ຖ້າ​ເປັນ​ກິ​ໂລ​ແມ່ນ 5.000 ກີບ​ຕໍ່​ກິ​ໂລ ເຊິ່ງ​ສ່ວນ​ຫຼາຍ​ຈະ​ມີ​ແມ່​ຄ້າ​ມາ​ຮັບ​ຊື້​ເອົາ​ເອງ ແລະ ເກັບ​ກູ້​ຕາມ​ການ​ສັ່ງ​ຂອງ​ແມ່​ຄ້າ ປັດ­ຈຸ­ບັນ ເກັບ​ຂາຍ​ໄດ້​ແລ້ວ 100 ກວ່າ​ໝື່ນ.

    ນອກ­ຈາກ​ປ້າ ບົວ​ຄຳ ລະ­ຄອນ​ໄຊ ແລ້ວ ຍັງ​ມີ​ຄອບ­ຄົວ​ປ້າ ຊ້ວນ ມະ­ນີ​ວັນ ປະ­ຊາ­ຊົນ​ບ້ານ​ດຽວ​ກັນ ກໍ່​ໄດ້​ເຮັດ​ອາ­ຊີບ​ປູກ​ມັນ​ເພົາ​ຂາຍ​ໃນ​ເນື້ອ­ທີ່ 1 ໄລ່ ສ້າງ​ລາຍ​ຮັບ​ໃຫ້​ຄອບ­ຄົວ​ປີ​ລະ 20 ລ້ານ​ກີບ ເຊິ່ງ​ທ່ານ ລຳ​ພອນ ມະ­ຫາ­ຂັນ​ໄຊ ຮອງ​ນາຍ­ບ້ານ​ຊຽງ​ຄວນ ໄດ້​ກ່າວ​ວ່າ: ອຳ­ນາດ​ການ​ປົກ­ຄອງ​ພວກ​ເຮົາ​ໄດ້​ຊຸກ­ຍູ້​ປະ­ຊາ­ຊົນ ປູກ​ພືດ​ຜັກ​ສຳ­ຮອງ​ຕາມ​ລະ­ດູ​ການ ພາຍ​ໃນ​ບ້ານ ມີ 170 ກວ່າ​ຄອບ­ຄົວ​ທີ່​ທຳ​ການ​ຜະ­ລິດ ມີ​ເນື້ອ­ທີ່​ກວມ​ເອົາ​ປະ­ມານ 65%.

ຂ່າວທີ່ກ່ຽວຂ້ອງ