ຂ່າວຫຼ້າສຸດ

ຍົກລະດັບລະບົບກົນໄກການແລກປ່ຽນຊື້-ຂາຍຮຸ້ນ

275 17 ມ.ກ. 2019 ຂ່າວໜ້າ​ໜຶ່ງ

    ນັບ​ຕັ້ງ­ແຕ່​ວັນ​ທີ 10 ຕຸ­ລາ 2010 ເປັນ­ຕົ້ນ​ມາ ຕະ­ຫຼາດ​ຫຼັກ​ຊັບ​ລາວ (ຕລຊລ) ໄດ້​ເຮັດ​ໜ້າ­ທີ່​ບໍ­ລິ­ການ​ໃຫ້​ແກ່​ບັນ­ດາ​ວິ​ສາ​ຫະ​ກິດ​ທັງ​ພາກ​ລັດ ແລະ ເອ­ກະ​ຊົນ ທີ່​ຕ້ອງ­ການ​ລະ­ດົມ​ທຶນ​ເພື່ອ​ຂະ­ຫຍາຍ​ທຸ­ລະ​ກິດ​ໃຫ້​ເຂົ້າ​ມາ​ຈົດ​ທະ­ບຽນ​ໃນ ຕລຊລ ເປັນ​ສູນ​ກາງ​ໃຫ້​ບໍ­ລິ­ການ​ແລກ­ປ່ຽນ​ຊື້-ຂາຍ​ຫຼັກ​ຊັບ ຊຳ­ລະ-ສະ​ສາງ ທຸ­ລະ​ກຳ​ຫຼັກ​ຊັບ ແລະ ຮັບ​ຝາກ​ຫຼັກ​ຊັບ ໂດຍ​ມີ​ການ​ເປີດ​ຊື້-ຂາຍ​ຄັ້ງ​ທຳ​ອິດ​ນັບ​ແຕ່​ວັນ​ທີ 11 ມັງ­ກອນ 2011.

    ທ່ານ ວັນ​ຄຳ ວໍ­ລະ​ວົງ ຜູ້­ອຳ­ນວຍ­ການ​ໃຫຍ່​ຕະ­ຫຼາດ​ຫຼັກ​ຊັບ​ລາວ ຖະ­ແຫຼງ​ຂ່າວ​ໃນ​ໂອ­ກາດ ຄົບ­ຮອບ 8 ປີ ວັນ​ເປີດ​ການ​ຊື້-ຂາຍ​ຄັ້ງ​ທຳ​ອິດ ແລະ ການ​ຍົກ​ລະ­ດັບ​ລະ­ບົບ​ກົນ​ໄກ​ການ​ແລກ­ປ່ຽນ​ຊື້-ຂາຍ​ຮຸ້ນ ຂອງ ຕລຊລ ວ່າ: ໃນ​ໄລ­ຍະ 8 ປີ­ຜ່ານ­ມາ ຕລຊລ ໄດ້​ສືບ­ຕໍ່​ສຶກ​ສາ​ຄົ້ນ­ຄວ້າ​ພັດ­ທະ­ນາ​ລະ­ບົບ​ຕ່າງໆ​ຢ່າງ​ບໍ່​ຢຸດ​ຢັ້ງ ແລະ ໄດ້​ມີ​ຜົນ­ສຳ­ເລັດ​ຫຼາຍ​ດ້ານ ເປັນ­ຕົ້ນ ຕລຊລ ມີ​ບົດ­ບາດ​ເປັນ​ແຫຼ່ງ​ລະ­ດົມ​ທຶນ​ຂະ­ໜາດ​ໃຫຍ່​ໄລ­ຍະ​ຍາວ ໃຫ້​ແກ່​ນັກ​ລົງ­ທຶນ​ທີ່​ຕ້ອງ­ການ​ລະ­ດົມ​ທຶນ ແລະ ເປັນ​ບ່ອນ​ແລກ­ປ່ຽນ​ຊື້-ຂາຍ​ໃຫ້​ແກ່​ບັນ­ດາ​ນັກ​ລົງ­ທຶນ ສາ­ມາດ​ສຳ­ເລັດ​ການ​ນຳ​ເອົາ​ບໍ­ລິ­ສັດ​ເຂົ້າ​ມາ​ຈົດ​ທະ­ບຽນ​ໄດ້​ທັງ​ໝົດ 9 ບໍ­ລິ­ສັດ ມີ​ມູນ​ຄ່າ​ຕະ­ຫຼາດ​ທັງ​ໝົດ 10.344 ຕື້​ກີບ ສາ­ມາດ​ລະ­ດົມ​ທຶນ​ໄດ້​ສູງ​ເຖິງ 6.400 ຕື້​ກວ່າ​ກີບ ແລະ ມີ​ມູນ​ຄ່າ​ຊື້-ຂາຍ​ຫຼາຍ​ກວ່າ 344 ຕື້​ກີບ ນອກ​ນີ້ ໄດ້​ສຳ­ເລັດ​ການ​ນຳ​ເອົາ​ຜະ­ລິດ​ຕະ​ພັນ​ໃໝ່ ກໍ່​ຄື ພັນ­ທະ­ບັດ​ລັດ­ຖະ­ບານ​ເຂົ້າ​ມາ​ຈົດ​ທະ­ບຽນ​ຊື້-ຂາຍ​ຜ່ານ ຕລຊລ ໃນ​ວັນ​ທີ 25 ທັນ­ວາ 2018 ເຊິ່ງ​ຈຳ­ນວນ​ບັນ­ຊີ​ຫຼັກ​ຊັບ​ກໍ່​ມີ​ທ່າ​ອ່ຽງ​ເພີ່ມ​ຂຶ້ນ​ເລື້ອຍໆ ປັດ­ຈຸ­ບັນ​ມີ​ຈຳ­ນວນ​ຫຼາຍ​ກວ່າ 14.000 ບັນ­ຊີ.

    ເພື່ອ​ເປັນ​ການ​ສືບ­ຕໍ່​ພັດ­ທະ­ນາ ຕລຊລ ກໍ່​ຄື ຕະ­ຫຼາດ​ທຶນ​ລາວ​ໃຫ້​ເຂັ້ມ­ແຂງ​ກວ່າ​ເກົ່າ ທັງ​ເປັນ​ການ​ເສີມ​ສ້າງ​ສະ­ພາບ​ຄ່ອງ ສ້າງ​ສະ­ພາບ​ແວດ​ລ້ອມ​ໃນ​ການ​ລົງ­ທຶນ​ທີ່​ມີ​ຄວາມ​ສະ­ດວກ​ວ່ອງ­ໄວ​ຍິ່ງ​ຂຶ້ນ ແລະ ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ເປີດ​ການ​ຊີ້-ຂາຍ ຄົບ­ຮອບ 8 ປີ​ຂອງ ຕລຊລ ຂໍ​ຖື​ໂອ­ກາດ​ນີ້​ແຈ້ງ​ໃຫ້​ມວນ​ຊົນ​ໄດ້​ຮັບ​ຮູ້​ເຖິງ​ການ​ຍົກ​ລະ­ດັບ ແລະ ນຳ​ໃຊ້​ລະ­ບົບ​ກົນ​ໄກ​ການ​ແລກ­ປ່ຽນ​ຊື້-ຂາຍ​ຮຸ້ນ ການ​ເພີ່ມ​ປະ­ເພດ​ຄຳ​ສັ່ງ​ໃໝ່​ການ​ຊື້-ຂາຍ​ຮຸ້ນ​ຈຳ­ນວນ​ຫຼາຍ ແລະ ການ​ປັບ​ຫົວ­ໜ່ວຍ​ລາ­ຄາ​ໃໝ່​ຢ່າງ​ເປັນ​ທາງ​ການ ເຊິ່ງ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ວັນ​ທີ 11 ມັງ­ກອນ 2019 ເປັນ­ຕົ້ນ​ມາ.

    ການ​ຂະ­ຫຍາຍ​ເວ­ລາ​ການ​ແລກ­ປ່ຽນ​ຊື້-ຂາຍ​ຮຸ້ນ​ແມ່ນ​ມີ​ການ​ຂະ­ຫຍາຍ​ຈາກ 8:30-11:30 ໂມງ ມາ​ເປັນ 8:30-15:00 ໂມງ (ໂດຍ​ບໍ່​ມີ​ໄລ­ຍະ​ເວ­ລາ​ພັກ​ການ​ຊື້-ຂາຍ) ທັງ​ນີ້​ເພື່ອ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ​ຈາກ​ນັກ​ລົງ­ທຶນ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ ການ​ເປີດ​ຊ່ອງ​ທາງ​ໃຫ້​ນັກ​ລົງ­ທຶນ​ຈາກ​ປະ­ເທດ ທີ່​ມີ​ເຂດ​ເວ­ລາ​ຕ່າງ​ກັບ​ປະ­ເທດ​ລາວ ໃຫ້​ມີ​ຄວາມ​ສາ­ມາດ​ເຂົ້າ​ເຖິງ​ການ​ລົງ­ທຶນ​ໃນ ຕລຊລ ໄດ້​ສະ­ດວກ​ຍິ່ງ​ກວ່າ​ເກົ່າ ແລະ ຄາດ​ວ່າ­ການ​ຂະ­ຫຍາຍ​ຊົ່ວ­ໂມງ​ການ​ແລກ­ປ່ຽນ​ຊື້-ຂາຍ​ຮຸ້ນ ຈະ​ສາ­ມາດ​ເພີ່ມ​ສະ­ພາບ​ຄ່ອງ​ໃຫ້ ຕລຊລ ໄດ້​ສູງ​ເຖິງ 40%.

ຂ່າວທີ່ກ່ຽວຂ້ອງ