ຍີ່ປຸ່ນ ໃຫ້ທຶນຊ່ວຍເຫຼືອປັບປຸງໂຮງຮຽນ ມສ ໜອງບອນ

204 17 ມ.ກ. 2019 ຂ່າວໜ້າ​ໜຶ່ງ
ຍີ່ປຸ່ນ ໃຫ້ທຶນຊ່ວຍເຫຼືອປັບປຸງໂຮງຮຽນ ມສ ໜອງບອນ

    ລັດ­ຖະ­ບານ​ຍີ່­ປຸ່ນ ໃຫ້​ທຶນ​ຊ່ວຍ­ເຫຼືອ​ປະ­ມານ 763 ລ້ານ​ກີບ ຫຼື 89.195 ໂດ​ລາ​ສະ­ຫະ­ລັດ ໃຫ້​ແກ່​ໂຄງ­ການ​ປັບ­ປຸງ​ສູນ​ພາ­ສາ​ຍີ່­ປຸ່ນ ຢູ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ສົມ­ບູນ​ໜອງ​ບອນ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ພາຍ​ໃຕ້​ໂຄງ­ການ​ຊ່ວຍ­ເຫຼືອ​ວັດ­ທະ­ນະ­ທຳ​ຂັ້ນ​ຮາກ​ຖານ ພິ­ທີ​ເຊັນ​ຮັບ​ເອົາ​ການ​ຊ່ວຍ­ເຫຼືອ​ໄດ້​ຈັດ​ຂຶ້ນ​ວັນ​ທີ 15 ມັງ­ກອນ 2019 ທີ່​ໂຮງ­ຮຽນ ມສ ໜອງ​ບອນ ລະ­ຫວ່າງ​ທ່ານ ທາ​ເກ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ​ລາວ ແລະ ທ່ານ​ນາງ ແສງ​ພະ­ຈັນ ພິມ​ມະ​ຈັນ ຜູ້­ອຳ­ນວຍ­ການ​ໂຮງ­ຮຽນ ມສ ໜອງ​ບອນ ມີ​ທ່ານ ບັນ­ຈົງ ລັດ​ຖະ​ວັນ ຮອງ​ຫົວ­ໜ້າ​ກົມ​ສາ­ມັນ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ​ຮອງ​ເຈົ້າ­ເມືອງ​ໄຊ​ເຊດ​ຖາ ທ່ານ​ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ໂຄງ­ການ​ເພື່ອ​ປັບ­ປຸງ​ສະ­ພາບ​ແວດ​ລ້ອມ​ການ​ສຶກ​ສາ ໂດຍ​ສ້ອມ­ແປງ​ຊັ້ນ​ສອງ​ອາ­ຄານ​ຮຽນ​ເກົ່າ ແລະ ຍົກ​ລະ­ດັບ​ເຄື່ອງ​ອຳ­ນວຍ​ຄວາມ​ສະ­ດວກ​ຕ່າງໆ ໃຫ້​ຫ້ອງ​ຮຽນ ຫ້ອງ​ກິດ­ຈະ­ກຳ ແລະ ຫ້ອງ​ກຽມ​ສອນ​ພາ­ສາ​ຍີ່­ປຸ່ນ ຂອງ​ອາ­ຈານ​ທີ່​ມີ​ອຸ­ປະ­ກອນ​ການ​ຮຽນ-ການ​ສອນ​ຄົບ​ຊຸດ​ຂອງ​ໂຮງ­ຮຽນ ມສ ໜອງ​ບອນ ປັດ­ຈຸ­ບັນ​ມີ​ໂຮງ­ຮຽນ​ມັດ­ທະ­ຍົມ​ສຶກ​ສາ 3 ແຫ່ງ​ໃນ ນວ ລວມ​ທັງ​ໂຮງ­ຮຽນ ມສ ໜອງ​ບອນ ທີ່​ໄດ້​ນຳ​ເອົາ​ຫຼັກ­ສູດ​ພາ­ສາ​ຍີ່­ປຸ່ນ​ເຂົ້າ​ໄປ​ສອນ​ນັບ​ແຕ່​ສົກ­ຮຽນ 2010-2011 ໃນ​ໄລ­ຍະ​ທີ່​ລັດ­ຖະ­ບານ​ລາວ ໄດ້​ຕົກ­ລົງ​ເອົາ​ພາ­ສາ​ຍີ່­ປຸ່ນ​ເປັນ​ໜຶ່ງ​ໃນ​ພາ­ສາ​ທີ​ສອງ ໃນ​ຫຼັກ­ສູດ​ການ​ສຶກ​ສາ​ໃນ​ລະ­ດັບ​ສາ­ມັນ.

    ທ່ານ​ນາງ ແສງ​ພະ­ຈັນ ພິມ​ມະ​ຈັນ ກ່າວ​ວ່າ: ສຳ­ລັບ​ໂຄງ­ການ​ຊ່ວຍ­ເຫຼືອ​ນີ້ ຈະ​ເລີ່ມ​ລົງ­ມື​ຈັດ​ຕັ້ງ​ປະ­ຕິ­ບັດ​ໃນ​ທ້າຍ​ເດືອນ​ມັງ­ກອນ 2019 ແລະ ຄາດ​ວ່າ​ຈະ​ສຳ­ເລັດ ແລະ ຈັດ​ຕັ້ງ​ປະ­ຕິ­ບັດ​ການ​ຮຽນ-ການ​ສອນ​ໃນ​ສົກ­ຮຽນ 2019-2020 ປັດ­ຈຸ­ບັນ ຢູ່​ໃນ​ໄລ­ຍະ​ກະ­ກຽມ​ຄວາມ​ພ້ອມ​ທາງ​ດ້ານ​ບຸ​ຄະ­ລາ​ກອນ ລວມ​ທັງ​ອຸ­ປະ­ກອນ​ສື່​ການ​ຮຽນ-ການ​ສອນ​ຕ່າງໆ ເພື່ອ​ໃຫ້​ໂຄງ­ການ​ຊ່ວຍ­ເຫຼືອ​ນີ້ ໄດ້​ຮັບ​ໝາກ­ຜົນ​ຕາມ​ຄາດ­ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ