ຂ່າວຫຼ້າສຸດ

ປະຕິບັດວຽກງານຮອບດ້ານ ຕິດພັນກັບແຜນວຽກ 3 ຫຼຸດ 3 ເພີ່ມ 3 ຂະບວນການ

493 17 ມ.ກ. 2019 ຂ່າວໜ້າ​ໜຶ່ງ
ປະຕິບັດວຽກງານຮອບດ້ານ ຕິດພັນກັບແຜນວຽກ 3 ຫຼຸດ 3 ເພີ່ມ 3 ຂະບວນການ

    ກອງ​ປະ­ຊຸມ​ສະ­ຫຼຸບ​ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຮອບ­ດ້ານ ຕິດ​ພັນ​ກັບ​ຂໍ້​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ຮັກ​ນະ­ຄອນ­ຫຼວງ​ວຽງ​ຈັນ ແລະ ແຜນ​ວຽກ 3 ຫຼຸດ 3 ເພີ່ມ 3 ຂະ​ບວນ​ການ ປະ­ຈຳ​ປີ 2018 ແລະ ແຜນ­ການ​ປີ 2019 ຂອງ​ພະ​ແນກ​ພະ­ລັງ­ງານ ແລະ ບໍ່​ແຮ່ ນະ­ຄອນ­ຫຼວງ​ວຽງ​ຈັນ (ພບ ນວ) ຈັດ​ຂຶ້ນ​ວັນ​ທີ 16 ມັງ­ກອນ 2019 ຢູ່​ພະ​ແນກ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ຊົງ​ເລົາ ຢົງ​ນູ ຫົວ­ໜ້າ​ພະ​ແນກ ພບ ນວ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ ພບ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຊົງ​ເລົາ ຢົງ​ນູ ກ່າວ​ວ່າ: 1 ປີ­ຜ່ານ­ມາ ພະ​ແນກ ພບ ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ 5 ມາດ­ຖານ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ໂດຍ​ເອົາ­ໃຈ­ໃສ່​ດ້ານ​ການ­ເມືອງ-ແນວ​ຄິດ ດ້ານ​ປ້ອງ​ກັນຊາດ-ປ້ອງ​ກັນ​ຄວາມ​ສະ­ຫງົບ ດ້ານ​ເສດ­ຖະ­ກິດ ດ້ານ​ວັດ­ທະ­ນະ­ທຳ-ສັງ­ຄົມ ແລະ ມາດ­ຖານ​ວິ­ຊາ​ສະເພາະ ເຊິ່ງ​ມາດ­ຖານ​ດ້ານ​ວິ­ຊາ​ສະ­ເພາະ ໄດ້​ຊຸກ­ຍູ້-ສົ່ງ­ເສີມ​ໃຫ້​ບັນ­ດາ​ນັກ​ລົງ­ທຶນ ​ທີ່​ມີ​ຄວາມ​ສົນ­ໃຈ​ລົງ­ທຶນ​ດ້ານ​ພະ­ລັງ­ງານ​ທົດ​ແທນ ແລະ ນຳ​ໃຊ້​ພະ­ລັງ­ງານ​ສະ­ອາດ ສາ­ມາດ​ເຊັນ​ສັນ­ຍາ​ໄດ້ 7 ໂຄງ­ການ ກຳລັງ​ການ​ຕິດ​ຕັ້ງ 106 MW ເນື້ອ­ທີ່ 301 ເຮັກ­ຕາ ປັດ­ຈຸ­ບັນ​ສຳ­ເລັດ​ແລ້ວ 1 ໂຄງ­ການ ດ້ວຍ​ກຳ­ລັງ​ການ​ຕິດ​ຕັ້ງ 32 MW ໃນ​ເນື້ອ­ທີ່ 96 ເຮັກ­ຕາ ສາ­ມາດ​ສົ່ງ​ອອກ​ແຮ່​ທາດ ຜະ­ລິດ​ຕະ​ພັນ​ແຮ່​ທາດ ແລະ ສານ​ເຄ​ມີ 153.961 ໂຕນ ແລະ ສົ່ງ​ອອກ 14.9243 ໂຕນ.

    ນອກ​ນີ້ ພະ​ແນກ ພບ ຍັງ​ໄດ້​ເປັນ​ເຈົ້າ​ການ­ຈັດ­ຕັ້ງ​ປະ­ຕິ­ບັດ​ວຽກ​ຂໍ້​ແຂ່ງ­ຂັນ​ຮັກ​ຊາດ ແລະ ພັດ​ທະນາ ຕິດ​ພັນ​ກັບ​ການ​ຮັກ ນວ ຕາມ​ແຜນ​ວຽກ 3 ຫຼຸດ 3 ເພີ່ມ 3 ຂະ​ບວນ​ການ ໂດຍ​ສະ­ເພາະ ການ​ປະ­ຕິ­ບັດ 3 ຫຼຸດ ການ​ຫຼຸດ­ຜ່ອນ​ຄວາມ​ແອ​ອັດ​ໃນ​ຕົວ​ເມືອງ ຫຼຸດ­ຜ່ອນ​ບັນ­ຫາ​ຢາ​ເສບ​ຕິດ ຫຼຸດ­ຜ່ອນ​ບັນ­ຫາ​ຕ່າງໆ​ໃນ ນວ ເພີ່ມ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ການ­ເມືອງ ເພີ່ມ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ ເພີ່ມ​ຄວາມ​ສາ­ມັກ­ຄີ​ເປັນ​ນ້ຳ​ໜຶ່ງ​ໃຈ​ດຽວ 3 ຂະ​ບວນ​ການ ສ້າງ​ຂະ​ບວນ​ການ​ຕ້ານ ແລະ ແກ້​ໄຂ​ບັນ­ຫາ​ຢາ​ເສບ​ຕິດ ສ້າງ​ຂະ​ບວນ​ການ​ຈັດ​ສັນ​ຄວາມ​ເປັນ​ລະ­ບຽບ​ຮຽບ​ຮ້ອຍ​ໃນ​ສັງ­ຄົມ ແລະ ສ້າງ​ຂະ​ບວນ​ການ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ຮັກ ນວ ເຊິ່ງ​ຜ່ານ​ການ​ປະ­ຕິ­ບັດ​ວຽກ​ຕົວ​ຈິງ​ ມີ​ຫຼາຍ​ໜ້າ​ວຽກ​ໄດ້​ຮັບ​ຜົນ­ສຳ­ເລັດ​ຕາມ​ແຜນ­ການ​ວາງ​ໄວ້ ໂດຍ​ສະ­ເພາະ ການ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ຂອງ​ພະ­ນັກ­ງານ-ລັດ­ຖະ­ກອນ​ຂອງ​ຂະ­ແໜງ ພບ ທີ່​ເປັນ​ເຈົ້າ​ການ ແລະ ມີ​ສະ­ຕິ​ສູງ​ໃນ​ກາມ​ມີ​ສ່ວນ​ຮ່ວມ​ທຸກ​ກິດ­ຈະ­ກຳ ​ທີ່​ກຳ­ນົດ​ໄວ້​ຢ່າງ​ເປັນ​ຂະ​ບວນ​ຟົດ­ຟື້ນ.

    ທ່ານ ສິນ​ລະ​ວົງ ຄຸດ​ໄພ­ທູນ ໄດ້​ສະ­ແດງ​ຄວາມ​ຊົມ­ເຊີຍ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຮອບ­ດ້ານ​ຂອງ​ພະ​ແນກ ພບ ທີ່​ຍາດ​ມາ​ໄດ້​ໃນ 1 ປີ­ຜ່ານ­ມາ ເພື່ອ​ເຮັດ​ໃຫ້​ວຽກ​ງານ​ດັ່ງ­ກ່າວ ​ໄດ້​ຮັບ​ການ​ສືບ­ຕໍ່​ປະ­ຕິບັດ ແລະ ເສີມ​ຂະ­ຫຍາຍ​ໃຫ້​ນັບ​ມື້​ດີ​ຂຶ້ນ ທ່ານ​ໄດ້​ເນັ້ນ​ໃຫ້​ຄະ­ນະ​ພັກ-ຄະ­ນະ​ນຳ ພະ­ນັກ­ງານ-ວິ­ຊາ​ການ ຂະ­ແໜງ ພບ ເພີ່ມ​ທະ­ວີ​ຄວາມ​ຮັບ­ຜິດ­ຊອບ ແລະ ເປັນ​ເຈົ້າ​ການ​ເຊື່ອມ​ຊຶມ​ຕໍ່​ແນວ­ທາງ​ນະ­ໂຍ­ບາຍ​ຂອງ​ພັກ ເຂັ້ມ​ງວດ​ໃນ​ການ​ຄຸ້ມ​ຄອງ​ກວດ­ກາ​ຫົວ­ໜ່ວຍ​ມະ­ຫາ​ພາກ ຫົວ­ໜ່ວຍ​ທຸ­ລະ​ກິດ​ທີ່​ດຳ­ເນີນ​ກິດ­ຈະ­ການ​ໃນ​ຂົງ­ເຂດ ພບ ຢ່າງ​ໃກ້­ຊິດ ເພື່ອ​ໃຫ້​ເຂົາ­ເຈົ້າ​ປະ­ຕິ­ບັດ​ສິດ​ພັນ­ທະ ແລະ ກົດ­ໝາຍ​ຢ່າງ​ຖືກ­ຕ້ອງ ຊຸກຍູ້​ຢ່າງ​ຫ້າວ­ຫັນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ມາດ­ຖານ ແລະ ຂະ​ບວນ​ການ​ຮັກ​ຊາດ ແລະ ພັດ­ທະ­ນາ​ໃຫ້​ມີ​ທ່ວງ​ທ່າ​ເຕີບ​ໃຫຍ່​ເຂັ້ມ­ແຂງ ແລະ ກວ້າງ­ຂວາງ ຄຽງ​ຄູ່​ກັບ​ການ​ປະ­ຕິ­ບັດ​ວິ­ຊາ​ສະ­ເພາະ ​ຕາມ​ພາ­ລະ​ໜ້າ­ທີ່​ທີ່​ໄດ້​ຮັບ​ມອບ​ໝາຍ​ຈາກ​ຂັ້ນ​ເທິງ ​ດ້ວຍ​ຄວາມ​ຮັບ­ຜິດ­ຊອບ​ສູງ.

ຂ່າວທີ່ກ່ຽວຂ້ອງ