ທ່ານນາຍົກລັດຖະມົນຕີ ຕ້ອນຮັບເຈົ້າຂອງລາງວັນໂນເບລ ສາຂາເຄມີສາດ

343 17 ມ.ກ. 2019 ຂ່າວໜ້າ​ໜຶ່ງ
ທ່ານນາຍົກລັດຖະມົນຕີ ຕ້ອນຮັບເຈົ້າຂອງລາງວັນໂນເບລ ສາຂາເຄມີສາດ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ Aaron CIECHANOVER ເຈົ້າ​ຂອງ​ລາ­ງວັນ​ໂນ​ເບລ ສາ​ຂາ­ເຄ​ມີ​ສາດ ປະ­ຈຳ​ປີ 2004 ໃນ​ວັນ​ທີ 16 ມັງ­ກອນ 2019 ຢູ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໃນ​ໂອ­ກາດ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ວັນ​ທີ 14-19 ມັງ­ກອນ​ນີ້.

    ທ່ານ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ທ່ານ Aaron CIECHANOVER ທີ່​ໄດ້​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ໂດຍ​ສະ­ເພາະ ເຂົ້າ​ຮ່ວມ​ບັນ­ຍາຍ​ໃນ​ກອງ​ປະ­ຊຸມ​ຫົວ­ຂໍ້ “Bridge-Dialogues toward a culture of peace” ເຊິ່ງ​ການ​ເດີນ­ທາງ​ມາ​ໃນ​ຄັ້ງ​ນີ້ ເປັນ​ການ​ປະ­ກອບ­ສ່ວນ​ໃນ​ການ​ຮັດ​ແໜ້ນ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ດ້ານ​ວິ­ຊາ​ການ​ສອງ​ຝ່າຍ ໃຫ້​ແຕກ​ດອກ​ອອກ​ຜົນ​ຍິ່ງ​ຂຶ້ນ ພ້ອມ​ນີ້ ທ່ານ​ຍັງ​ໄດ້​ສະ­ແດງ​ຄວາມ​ຂອບ­ໃຈ​ມູນ​ນິ­ທິ​ສັນ­ຕິ­ພາບ​ສາ­ກົນ ທີ່​ໃຫ້­ການ​ຊ່ວຍ­ເຫຼືອ​ພັດ­ທະ­ນາ​ຂະ­ແໜງ​ສຶກ​ສາ​ຢູ່​ລາວ ແລະ ເປັນ​ຂົວ​ຕໍ່​ປະ­ສານ​ງານ​ໃນ​ການ​ນຳ­ພາ​ທ່ານ Aaron CIECHANOVER ມາ​ເຜີຍ­ແຜ່​ບົດ­ຮຽນ​ວິ­ຊາ​ການ​ອັນ​ລ້ຳ​ຄ່າ ເພື່ອ​ສ້າງ​ໜໍ່​ແໜງ​ນັກ​ເຄ​ມີ​ສາດ ແລະ ນັກ​ຄົ້ນ­ຄວ້າ​ວິ­ໄຈ​ຄົນ​ລາວ​ໜຸ່ມ​ນ້ອຍ ນອກ​ນີ້​ຍັງ​ສະ­ເໜີ​ໃຫ້​ຊຸກ­ຍູ້ ແລະ ລະ­ດົມ​ຊາວ​ໜຸ່ມ-ນັກ​ສຶກ​ສາ​ລາວ​ໃຫ້​ມີ​ຄວາມ​ຕື່ນ​ຕົວ​ຢາກ​ຮຽນ​ຮູ້ ແລະ ຄົ້ນ­ຄວ້າ-ວິ­ໄຈ​ຂະ­ແໜງ​ເຄ​ມີ​ສາດ​ໃຫ້​ຫຼາຍ​ຂຶ້ນ​ກວ່າ​ເກົ່າ ແລະ ສະ­ເໜີ​ໃຫ້​ສືບ­ຕໍ່​ແລກ­ປ່ຽນ​ການ​ຢ້ຽມ­ຢາມ​ດ້ານ​ວິ­ຊາ​ການ ລະ­ຫວ່າງ​ຄະ­ນະ​ຜູ້​ແທນ​ສອງ​ຝ່າຍ ໃນ​ລະ­ດັບ​ມະ­ຫາ­ວິ­ທະ­ຍາ­ໄລ​ຢ່າງ​ເປັນ​ປົກ­ກະ­ຕິ ເພື່ອ​ກ້າວ​ໄປ​ສູ່​ການ​ຮ່ວມ​ມື​ຄົ້ນ­ຄວ້າ-ວິ­ໄຈ ກ່ຽວ​ກັບ​ຂະ­ແໜງ​ວິ­ທະ­ຍາ­ສາດ​ໃນ​ອະ­ນາ­ຄົດ.

    ພ້ອມ​ນີ້ ທ່ານ Aaron CIECHANOVER ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ​ອັນ​ອົບ​ອຸ່ນ ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ພ້ອມ​ທັງ​ໃຫ້​ຄຳ​ໝັ້ນ​ວ່າ ຈະ​ໃຫ້­ການ​ຮ່ວມ​ມື​ຊຸກ­ຍູ້​ຄົ້ນ­ຄວ້າ-ວິ­ໄຈ​ໃນ​ຂະ­ແໜງ​ເຄ​ມີ​ສາດ ແລະ ຕັ້ງ­ໜ້າ​ເຜີຍ­ແຜ່​ໃນ​ບົດ­ຮຽນ​ວິ­ຊາ​ການ​ດ້ານ​ດັ່ງ­ກ່າວ ເພື່ອ​ໃຫ້​ນັກ­ວິ­ຊາ­ການ​ລາວ ນຳ​ເອົາ​ໄປ​ໝູນ​ໃຊ້​ໃນ​ການ​ພັດ­ທະ­ນາ​ຂະ­ແໜງ​ເຄ​ມີ​ສາດ​ຢູ່​ລາວ ໃຫ້​ນັບ​ມື້​ກ້າວ­ໜ້າ.

ຂ່າວທີ່ກ່ຽວຂ້ອງ