ຂ່າວຫຼ້າສຸດ

ປະທານາທິບໍດີ ທຣຳ ປະກາດ​ໃຊ້​ກົດໝາຍ​ວ່າ​ດ້ວຍ​ການ​ຈ່າຍ​ເງິນ​ເງິນເດືອນ​ຢ້ອນ​ຫຼັງ​ໃຫ້​ພະນັກງານ

530 18 ມ.ກ. 2019 ຂ່າວຕ່າງປະເທດ
ປະທານາທິບໍດີ ທຣຳ ປະກາດ​ໃຊ້​ກົດໝາຍ​ວ່າ​ດ້ວຍ​ການ​ຈ່າຍ​ເງິນ​ເງິນເດືອນ​ຢ້ອນ​ຫຼັງ​ໃຫ້​ພະນັກງານ

    ທຳ​ນຽບ​ຂາວ​ແຈ້ງ​ໃຫ້​ຮູ້ເມື່ອ​ວັນ​ທີ 16 ມັງກອນ​ນີ້​ວ່າ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ໃຫ້​ສັດຕະຍາບັນ​ຕໍ່​ຮ່າງ​ກົດໝາຍ​ສະບັບ​ໜຶ່ງ ວ່າ​ດ້ວຍ​ການ​ຈ່າຍ​ເງິນເດືອນ​ໃຫ້​ແກ່​ພະນັກງານ ເພື່ອ​ຮັບປະກັນ​ວ່າ ພະນັກງານ​ຂອງ​ລັດຖະບານ​ກາງ​ທັງຫຼາຍ ຈະ​ໄດ້​ຮັບ​ຄ່າ​ຈ້າງ ສຳລັບ​ໄລຍະ​ເວລາ​ຂອງ​ການ​ປິດ​ລັດຖະບານ​ບາງ​ສ່ວນ ທີ່​ພວມ​ດຳເນີນ​ຢູ່​ນີ້​ແຕ່​ວ່າ​ຄ່າ​ຈ້າງ​ດັ່ງກ່າວ​ນັ້ນ ຈະ​ອອກ​ໃຫ້​ມື້​ໃດ ແມ່ນ​ຍັງ​ບໍ່​ທັນ​ຮູ້.

   ພະນັກງານ​ລັດຖະບານ ສ ອາ​ເມ​ຣິ​ກາ ປະມານ 800.000 ຄົນ ພວມ​ເຮັດ​ວຽກ​ໂດຍ​ບໍ່​ໄດ້​ຮັບ​ຄ່າ​ຈ້າງ ຫຼື​ບໍ່​ກໍ​ຖືກ​ສັ່ງ​ໃຫ້​ຢູ່​ເຮືອນ ນັບ​ຕັ້ງແຕ່​ວັນ​ທີ 22 ທັນວາ​ປີ​ກາຍເປັນ​ຕົ້ນ​ມາ. ຖ້າ​ຫາກ​ວ່າການ​ປິດ​ລັດຖະບານ​ແກ່ຍາວ​ອອກ​ໄປ​ອີກ​ໜຶ່ງ​ສັບປະດາ ເຂົາເຈົ້າ​ກໍ​ຈະ​ບໍ່​ໄດ້​ຮັບ​ຄ່າ​ຈ້າງ​ເປັນ​ຄັ້ງ​ທີ​ສອງ​ໃນ​ປີ​ນີ້.

ໃນ​ຂະນະ​ດຽວ​ກັນ ລັດຖະບານ ສ ອາ​ເມ​ຣິ​ກາ ໄດ້​ກ່າວ​ເມື່ອ​ວັນ​ອັງຄານ​ທີ່​ຜ່ານ​ມາ​ວ່າ ເຂົາເຈົ້າ​ໄດ້​ເອີ້ນ​ພະນັກງານ​ລັດຖະບານ​ກາງ​ຫຼາຍ​ສິບ​ພັນ​ຄົນ ກັບ​ມາ​ເຮັດ​ວຽກ​ໂດຍ​ບໍ່​ໄດ້​ຮັບ​ຄ່າ​ຈ້າງ ເພື່ອ​ດຳເນີນ​ການ​ເລື່ອງ​ຈ່າຍ​ພາສີ​ຄືນ ຮັກສາ​ຄວາມ​ປອດ​ໄພ​ຖ້ຽວ​ບິນ ກວດກາ​ອາຫານ ແລະ ຢາ ພ້ອມ​ດ້ວຍ​ວຽກ​ງານ​ທີ່​ສຳຄັນ​ອື່ນໆ ເພື່ອ​ຫຼຸດຜ່ອນ​ຜົນ​ກະທົບ​ຈາກ​ການ​ປິດ​ລັດຖະບານ.

    ບໍລິສັດ​ການ​ເງິນ​ທັງຫຼາຍ ໄດ້​ຈັດ​ໂຄງການ​ຕ່າງໆ ເພື່ອ​ຊ່ວຍເຫຼືອ​ພວກ​ພະນັກງານ ໃນ​ການ​ຮັບ​ມື​ກັບ​ການ​ສູນ​ເສຍ​ລາຍ​ໄດ້​ຢ່າງ​ກະທັນຫັນ ໃນ​ຂະນະ​ທີ່​ຮ້ານ​ອາຫານ​ຫຼາຍ​ແຫ່ງ ກໍ​ໄດ້​ເອົາ​ອາຫານ​ໃຫ້​ພະນັກງານ​ລັດຖະບານ​ກາງ ໄປ​ກິນ​ໂດຍ​ບໍ່​ເສຍ​ເງິນ. ອົງການ​ການ​ກຸສົນ World Central Kitchen ຊຶ່ງ​ຮູ້ຈັກ​ກັນ​ດີ​ສຳລັບ​ວຽກ​ງານ​ຂອງ​ເຂົາເຈົ້າ ໃນ​ການ​ເອົາ​ອາຫານ​ໃຫ້​ຄົນ​ຢູ່​ໃນ​ເຂດ​ໄພພິບັດ ເຊັ່ນ​ເກາະ ປອກ​ໂຕ ຣີ​ໂກ ຫຼັງ​ຈາກ​ພາຍຸ​ໄດ້​ທຳລາຍ​ເກາະ​ດັ່ງກ່າວ ໃນ​ປີ 2017 ນັ້ນ ໄດ້​ເປີດ​ຮ້ານ

    ຕູບ​ຜ້າ​ຂຶ້ນ ໃນ​ວັນ​ພຸດ​ທີ່​ຜ່ານ​ມາ ຢູ່​ໃນ​ນະຄອນຫຼວງ ວໍ​ຊິງ​ຕັນ ເພື່ອ​ມອບ​ອາຫານ​ໃຫ້​ບັນດາ​ພະນັກ​ງານ​ລັດຖະບານ​ກາງ.

ຂ່າວທີ່ກ່ຽວຂ້ອງ