ຂ່າວຫຼ້າສຸດ

ຈະສ້າງແຫຼ່ງທ່ອງທ່ຽວທຳມະຊາດ ຢູ່ເມືອງຈອມເພັດ

467 18 ມ.ກ. 2019 ຂ່າວໜ້າ​ໜຶ່ງ
ຈະສ້າງແຫຼ່ງທ່ອງທ່ຽວທຳມະຊາດ ຢູ່ເມືອງຈອມເພັດ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ສຳ​ຫຼວດ ແລະ ສຶກ​ສາ​ຄວາມ​ເປັນ​ໄປ​ໄດ້​ສຳ​ປະ­ທານ​ເນື້ອ­ທີ່​ດິນ​ຂອງ​ລັດ​ເຂດ​ປາກ​ຫ້ວຍ​ອ່າງ ບ້ານ​ຈ່ານ​ໃຕ້ ເມືອງ​ຈອມ​ເພັດ ແຂວງ​ຫຼວງ​ພະ​ບາງ ເພື່ອ​ພັດ­ທະ­ນາ​ເປັນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ລະ­ຫວ່າງ​ພະ​ແນກ​ແຜນ­ການ ແລະ ການ​ລົງ­ທຶນ ແຂວງ​ຫຼວງ​ພະ​ບາງ ກັບ​ສະ­ຖາ­ນີ​ຂົນ­ສົ່ງ​ໂດຍ­ສານ​ທາງ­ໄກ​ສາຍ​ໃຕ້-ສາຍ​ຕ່າງ­ປະ­ເທດ ນະ­ຄອນ­ຫຼວງ​ວຽງ​ຈັນ ຈຳ­ກັດ​ຜູ້​ດຽວ ຈັດ​ຂຶ້ນ​ວັນ​ທີ 16 ມັງ­ກອນ 2019 ທີ່​ແຂວງ​ຫຼວງ​ພະ​ບາງ ຮ່ວມ​ລົງ​ນາມ​ລະ­ຫວ່າງ​ທ່ານ​ນາງ ສີ​ລິ​ພອນ ສຸ­ພັນ​ທອງ ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ ແຂວງ​ຫຼວງ​ພະ​ບາງ ແລະ ທ່ານ ວັນ​ເພັນ ສີ​ສຸກ ຜູ້­ອຳ­ນວຍ­ການ​ສະ­ຖາ­ນີ​ຂົນ­ສົ່ງ​ໂດຍ­ສານ​ທາງ­ໄກ​ສາຍ​ໃຕ້-ສາຍ​ຕ່າງ­ປະ­ເທດ ນະ­ຄອນ­ຫຼວງ​ວຽງ​ຈັນ ຈຳ­ກັດ​ຜູ້​ດຽວ ມີ​ທ່ານ ສິງ​ຕັນ ໄຊ​ລື​ຊົງ ຮອງ​ປະ­ທານ​ສະ­ພາ​ປະ­ຊາ­ຊົນ​ແຂວງ​ຫຼວງ​ພະ​ບາງ ທ່ານ ຈັນ ວັນ­ນະ​ສີ ເຈົ້າ­ເມືອງ​ຈອມ​ເພັດ ທ່ານ ຊິນ­ນະ​ກອນ ພົມ​ມະ​ສິດ ປະ­ທານ​ບໍ­ລິ­ສັດ ພັນ​ຊະ­ນະ​ຂົນ­ສົ່ງ​ໂດຍ­ສານ-ທ່ອງ​ທ່ຽວ ຈຳ­ກັດ ແລະ ບັນ­ດາ​ຜູ້­ຕາງ­ໜ້າ​ພະ­ແນກ­ການ​ກ່ຽວ­ຂ້ອງ​ເຂົ້າ​ຮ່ວມ.

    ການ​ເຊັນ​ບົດ​ບັນ­ທຶກ​ຄັ້ງ​ນີ້ ເພື່ອ​ໃຫ້​ບໍ­ລິ­ສັດ​ດຳ­ເນີນ​ການ​ສຳ​ຫຼວດ ແລະ ສຶກ​ສາ​ຄວາມ​ເປັນ​ໄປ​ໄດ້​ຂອງ​ໂຄງ­ການ ໃນ​ພາກ​ສະ­ໜາມ ທັງ​ຕີ​ລາ­ຄາ​ຄວາມ​ອາດ​ສາ­ມາດ​ເປັນ​ໄປ​ໄດ້ ແລະ ປະ​ສິດ­ທິ​ຜົນ​ໃນ​ການ​ລົງ­ທຶນ ໂດຍ​ໃຊ້​ເວ­ລາ​ສຳ​ຫຼວດ 12 ເດືອນ​ນັບ​ແຕ່​ມື້​ເຊັນ​ບົດ​ບັນ­ທຶກ​ເປັນ­ຕົ້ນ​ໄປ ເປັນ­ຕົ້ນ​ສຶກ​ສາ­ຜົນ​ກະ­ທົບ​ທາງ​ດ້ານ​ສິ່ງ­ແວ­ດລ້ອມ ສັງ­ຄົມ ແລະ ເຕັກ­ນິກ​ທີ່­ຢູ່​ພາຍ​ໃນ​ໂຄງ­ການ ແລະ ອ້ອມ​ຂ້າງ ເຊິ່ງ​ເປົ້າ​ໝາຍ​ຂອງ​ຜູ້​ສຳ​ປະ­ທານ ເພື່ອ​ພັດ­ທະ­ນາ​ໂຄງ­ການ​ນີ້​ໃຫ້​ເປັນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ແບບ​ຄົບ​ວົງ​ຈອນ ຈະ​ມີ​ຮ້ານ​ອາ­ຫານ ເຮືອນ​ພັກ​ຊົງ​ລາວ ສິ່ງ​ອຳ­ນວຍ​ຄວາມ​ສະ­ດວກ ຮ້ານ​ບັນ­ເທີງ ຮົມ​ຢາ ນວດ​ແຜນ​ບູ­ຮານ ສ້າງ​ຈຸດ​ຊົມ​ວິວ ສ້າງ​ສວນ​ດອກ​ໄມ້ ບ່ອນ​ຕາກ­ແດດ ຂີ່​ກົງ​ເບັງ ຂີ່​ເຮືອ​ຕາມ​ລຳ​ແມ່­ນ້ຳ​ຂອງ​ຊົມ​ທຳ​ມະ​ຊາດ ຮຽນ​ຮູ້​ສຳ­ຜັດ​ວິ­ຖີ​ຊີ­ວິດ​ຂອງ​ປະ­ຊາ­ຊົນ ແລະ ອື່ນໆ.

ຂ່າວທີ່ກ່ຽວຂ້ອງ