ຂົງເຂດເສດຖະກິດ ຜັນຂະຫຍາຍມະຕິຄົບຄະນະບໍລິຫານງານສູນກາງພັກ

373 18 ມ.ກ. 2019 ຂ່າວໜ້າ​ໜຶ່ງ
ຂົງເຂດເສດຖະກິດ ຜັນຂະຫຍາຍມະຕິຄົບຄະນະບໍລິຫານງານສູນກາງພັກ

    ກອງ​ປະ­ຊຸມ​ເຊື່ອມ​ຊຶມ​ຜັນ​ຂະ­ຫຍາຍ ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 7 ສະ­ໄໝ​ທີ X ໃນ​ຂົງ­ເຂດ​ເສດ­ຖະ­ກິດ-ການ​ຕ່າງ­ປະ­ເທດ ໄດ້​ຈັດ​ຂຶ້ນ​ທີ່​ສູນ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ (ICTC) ວັນ​ທີ 17-18 ມັງ­ກອນ 2019 ໂດຍ​ເປັນ​ປະ­ທານ​ຂອງ​ສະ­ຫາຍ ທອງ​ລຸນ ສີ​ສຸ​ລິດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ນາ­ຍົກ­ລັດ­ຖະ­ມົນ­ຕີ ມີ​ພະ­ນັກ­ງານ​ການ​ນຳ ແລະ ຄະ­ນະ​ບໍ­ລິ­ຫານ​ງານ​ພັກ ຫົວ­ໜ້າ​ກົມ​ຈາກ​ບັນ­ດາ​ກະ­ຊວງ ອົງ­ການ​ໃນ​ຂົງ­ເຂດ​ເສດ­ຖະ­ກິດ-ການ​ຕ່າງ­ປະ­ເທດ ເຂົ້າ​ຮ່ວມ 250 ສະ­ຫາຍ.

    ກອງ​ປະ­ຊຸມ​ໄດ້​ເຊື່ອມ​ຊຶມ 2 ເອ­ກະ­ສານ​ສຳ­ຄັນ​ຄື: ມະ­ຕິ​ກ່ຽວ​ກັບ​ການ​ເພີ່ມ​ທະ­ວີ​ການ​ນຳ­ພາ​ແກ້​ໄຂ​ຄວາມ​ຫຍຸ້ງ­ຍາກ ທາງ​ດ້ານ​ເສດ­ຖະ­ກິດ-ການ​ເງິນ ແລະ ສ້າງ​ຄວາມ​ເຂັ້ມ­ແຂງ​ຂອງ​ການ​ຄຸ້ມ​ຄອງ​ມະ­ຫາ​ພາກ ແນ­ໃສ່​ເຊື່ອມ​ຊຶມ ແລະ ເປັນ​ເອ­ກະ​ພາບ​ໃນ​ລະ­ດັບ​ສູງ​ກັບ​ທິດ​ທາງ ວິ­ທີ​ການ ແລະ ມາດ​ຕະ­ການ​ທີ່​ສູນ​ກາງ​ວາງ​ອອກ ສ້າງ​ຄວາມ​ຕັດ­ສິນ​ໃຈ​ເດັດ­ດ່ຽວ​ແກ້​ໄຂ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ-ການ​ເງິນ ໃນ­ຕໍ່­ໜ້າ ພ້ອມ​ທັງ​ຄົ້ນ­ຄວ້າ​ກຳ­ນົດ​ບັນ­ດາ​ມາດ​ຕະ­ການ​ໃຫ້​ແທດ​ກັບ​ຕົວ​ຈິງ ແລະ ມີ​ປະ​ສິດ­ທິ​ຜົນ​ສູງ ເພື່ອ​ແກ້​ໄຂ​ສະ­ພາບ​ການ​ດັ່ງ­ກ່າວ ສ້າງ​ຂະ​ບວນ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ແຂງ­ແຮງ​ທົ່ວ​ເຖິງ ກໍ່­ໃຫ້­ເກີດ​ການ​ຫັນ­ປ່ຽນ​ຕົວ​ຈິງ​ທີ່​ມີ​ລັກ­ສະ­ນະ​ບຸກ​ທະ­ລຸ​ໃນ​ທຸກ​ຂົງ­ເຂດ​ວຽກ​ງານ ເພື່ອ​ຍູ້​ແຮງ​ດ້ານ​ການ​ພັດ­ທະ­ນາ​ໃນ​ດ້ານ​ຕ່າງໆ ໃຫ້​ບັນ­ລຸ​ຄາດ­ໝາຍ​ທີ່​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ​ວາງ​ອອກ ແລະ ມະ­ຕິ​ວ່າ​ດ້ວຍ​ການ​ປັບ­ປຸງ​ຮາກ​ຖານ​ການ­ເມືອງ ຂອງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ໃຫ້​ເຂັ້ມ­ແຂງ ແລະ ໜັກ​ແໜ້ນ.

    ກອງ​ປະ­ຊຸມ ໄດ້​ພ້ອມ​ກັນ​ຄົ້ນ­ຄວ້າ​ປຶກ­ສາ​ຫາ­ລື​ຢ່າງ​ເລິກ­ເຊິ່ງ ແລະ ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ ເຂົ້າ​ໃສ່​ບັນ­ຫາ​ທີ່​ສຳ­ຄັນ​ໃນ​ຂົງ­ເຂດ​ເສດ­ຖະ­ກິດ-ການ​ເງິນ ກໍ່​ຄື ການ​ກໍ່­ສ້າງ​ຮາກ​ຖານ​ການ­ເມືອງ​ຂອງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ທີ່​ຕິດ​ພັນ​ກັບ​ພຶດ­ຕິ​ກຳ​ຕົວ​ຈິງ​ຂອງ​ຂະ­ແໜງ­ການ​ຕົນ.

    ໂອ­ກາດ​ນີ້ ປະ­ທານ​ກອງ​ປະ­ຊຸມ​ໄດ້​ຮຽກ­ຮ້ອງ​ມາ​ຍັງ​ຄະ­ນະ​ພັກ-ຄະ­ນະ​ນຳ​ແຕ່​ລະ​ຂັ້ນ ຈົ່ງ​ເພີ່ມ​ທະ­ວີ​ຄວາມ​ຮັບ­ຜິດ­ຊອບ ຄວາມ​ເປັນ​ເຈົ້າ​ການ​ໃນ​ການ­ຈັດ­ຕັ້ງ​ເຊື່ອມ​ຊຶມ ເພື່ອ​ກຳ​ແໜ້ນ ແລະ ນຳ­ໄປ​ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 7 ສະ­ໄໝ​ທີ X ຢ່າງ​ເປັນ​ຂະ​ບວນ​ຟົດ­ຟື້ນ ແຂງ­ແຮງ ແລະ ມີ​ຜົນ­ສຳ­ເລັດ​ຕາມ​ຄາດ­ໝາຍ.

ຂ່າວທີ່ກ່ຽວຂ້ອງ