ຈີນ​ລົງທຶນ​ໂດຍ​ກົງ​ຢູ່​ຕ່າງປະເທດ​ບັນລຸ​ເກືອບ 130 ຕື້​ໂດ​ລາ ໃນ​ປີຜ່ານມາ

273 21 ມ.ກ. 2019 ຂ່າວຕ່າງປະເທດ
ຈີນ​ລົງທຶນ​ໂດຍ​ກົງ​ຢູ່​ຕ່າງປະເທດ​ບັນລຸ​ເກືອບ 130 ຕື້​ໂດ​ລາ ໃນ​ປີຜ່ານມາ

   ໃນ​ສະພາບ​ການ​ທີ່​ສະຖານະ​ການ​ສາກົນ ມີ​ການ​ປ່ຽນແປງ​ຢ່າງ​ສັບສົນ​ນັ້ນ ໃນ​ປີ 2018 ຈີນ ໄດ້​ຮັກສາ​ການ​ພັດທະນາ​ການ​ລົງທຶນ ແລະ ​ຮ່ວມ​ມື​ກັບ​ຕ່າງປະເທດ​ຢ່າງ​ໝັ້ນ​ທ່ຽງ ແລະ​ ເປັນ​ລະບຽບ​ຮຽບ​ຮ້ອຍ.

    ອີງ​ຕາມ​ຕົວ​ເລກ​ສະຖິຕິ ຂອງ​ກະຊວງ​ການ​ຄ້າ ແລະ​ ອົງການ​ຄຸ້ມ​ຄອງ​ເງິນຕາ​ຕ່າງປະເທດ​ຈີນ ໝົດ​ປີ 2018 ຂະແໜງການ​ຕ່າງໆ​ຂອງ​ຈີນ ໄດ້​ລົງທຶນ​ໂດຍ​ກົງ​ຢູ່​ຕ່າງປະເທດ​ບັນລຸ​ເຖິງ 129,83 ຕື້​ໂດ​ລາ​ສະຫະລັດ ເພີ່ມ​ຂຶ້ນ 4,2% ເມື່ອ​ທຽບໃສ່​ປີ 2017.

    ນອກຈາກ​ນັ້ນແລ້ວ ຕົວ​ເລກ​ສະຖິຕິ​ທາງ​ການ ໄດ້​ສະແດງ​ໃຫ້​ເຫັນ​ວ່າ ໃນ​ປີຜ່ານມາ ຈີນ​ໄດ້​ລົງທຶນ​ໂດຍ​ກົງ​ຢູ່​ຕ່າງປະເທດ​ໃນ​ດ້ານ​ການ​ທະນາຄານ​ບັນລຸ​ເຖິງ 9,33 ຕື້​ໂດ​ລາ​ສະຫະລັດ ເພີ່ມ​ຂຶ້ນ 105,1% ເມື່ອ​ທຽບໃສ່​ປີ 2017; ລົງທຶນ​ໃນ​ຂະແໜງ​ທີ່​ບໍ່​ແມ່ນ​ການ​ທະນາຄານ ບັນລຸ​ເຖິງ 120,5 ຕື້​ໂດ​ລາ​ສະຫະລັດ ເພີ່ມ​ຂຶ້ນ 0,3% ເມື່ອ​ທຽບໃສ່​ປີ 2017; ລາຍ​ຮັບ​ຈາກ​ການ​ທຸລະ​ກິດ​ຮັບ​ເໝົາ​ກໍ່ສ້າງ​ໂຄງການ​ໃນ​ຕ່າງປະເທດ​ບັນລຸ​ເຖິງ 169,04 ຕື້​ໂດ​ລາ​ສະຫະລັດ ເພີ່ມ​ຂຶ້ນ 0,3% ເມື່ອ​ທຽບໃສ່​ປີ 2017; ແຮງ​ງານ​ປະເພດ​ຕ່າງໆ ທີ່​ໄປ​ເຮັດ​ວຽກ​ຢູ່​ຕ່າງປະເທດ​ຕາມ​ໂຄງການ​ຈັດ​ຫາ​ງານ ເມື່ອ​ຮອດ​ທ້າຍ​ປີ 2018 ມີ​ເຖິງ 997.000 ຄົນ ເພີ່ມ​ຂຶ້ນ 17.000 ຄົນ​ເມື່ອ​ທຽບໃສ່​ປີ 2017.

    ໃນ​ຂະນະ​ດຽວ​ກັນ ດ່ານ​ພາສີ​ຄຸນ​ມີງ ໃນ​ແຂວງ​ຢຸນ​ນານ (ຈີນ) ແຈ້ງ​ໃຫ້​ຮູ້ເມື່ອ​ວັນ​ທີ 15 ມັງກອນ​ນີ້​ວ່າ ໃນ​ປີ 2018 ແຂວງ​ຢຸນ​ນານ ໄດ້​ບັນລຸ​ມູນ​ຄ່າ​ການ​ຄ້າ​ຕ່າງປະເທດ 197,3 ຕື້​ຢວນ (ເງິນ​ຈີນ) ເພີ່ມ​ຂຶ້ນ 24,7% ເມື່ອ​ທຽບໃສ່​ປີ 2017 ນັບ​ວ່າ​ເປັນ​ການ​ສ້າງ​ສະຖິຕິ​ໃໝ່. ໃນ​ນັ້ນ ມູນ​ຄ່າ​ການ​ຄ້າ​ກັບ​ບັນດາ​ປະເທດ​ລຽບ​ຕາມ “ໜຶ່ງ​ແລວ ໜຶ່ງ​ເສັ້ນທາງ” ເພີ່ມ​ຂຶ້ນ​ຢ່າງ​ວ່ອງໄວ ມູນ​ຄ່າ​ການ​ຄ້າ​ຂາ​ເຂົ້າ-ຂາ​ອອກ ບັນລຸ​ເຖິງ 133,16 ຕື້​ຢວນ ເພີ່ມ​ຂຶ້ນ 30,3% ກວມ​ເອົາ 67,5% ຂອງ​ມູນ​ຄ່າ​ການ​ຄ້າ​ຕ່າງປະເທດ​ທົ່ວ​ແຂວງ.

    ເມື່ອ​ເບິ່ງ​ຕາມ​ສະຖິຕິ​ຕະຫຼາດ​ການ​ຄ້າ​ຕ່າງປະເທດ​ແລ້ວ ມູນ​ຄ່າ​ການ​ຄ້າ​ກັບ​ບັນດາ​ປະເທດ​ອາ​ຊຽນ ກວມ​ເອົາ 46,2% ຂອງ​ມູນ​ຄ່າ​ການ​ຄ້າ​ຂາ​ເຂົ້າ-ຂາ​ອອກ​ທັງ​ໝົດ​ຂອງ​ແຂວງ​ຢຸນ​ນານ; ການ​ຄ້າ​ກັບ​ມຽນ​ມາ ຫວຽດນາມ ລາວ ແລະ​ໄທ ກໍ​ຮັກສາ​ທ່າ​ອ່ຽງ​ເພີ່ມ​ຂຶ້ນ​ທີ່​ດີ; ການ​ນຳ​ເຂົ້າ​ນ້ຳມັນ​ດິບ​ໄດ້​ຊຸກຍູ້​ມູນ​ຄ່າ​ການ​ຄ້າ​ລະຫວ່າງ​ແຂວງ​ຢຸນ​ນານ ກັບ​ບັນດາ​ປະເທດ​ເຂດ​ຕາເວັນ​ອອກ​ກາງ ຄື ອາ​ຣາ​ບີ ຊາ​ອຸ​ດິດ ໂອ​ມານ ສະຫະລັດ​ອາ​ຣັບ​ເອ​ມີ​ເຣດ ກູ​ເວດ ແລະ​ປະເທດ​ອື່ນໆ​ເພີ່ມ​ຂຶ້ນ​ຢ່າງ​ຫຼວງຫຼາຍ.

ຂ່າວທີ່ກ່ຽວຂ້ອງ