ຂ່າວຫຼ້າສຸດ

ຄູເຝິກ-ນັກກີລາ ເຂົ້າຮ່ວມອົບຮົມ ແລະ ເກັບຕົວເຝິກຊ້ອມ ທີ່ຍີ່ປຸ່ນ

220 22 ມ.ກ. 2019 ວົງຈອນກີລາ

    ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ (ຄພລ) ສົ່ງ​ຄູ​ເຝິກ ແລະ ນັກ­ກີ­ລາ ຈຳ­ນວນ 4 ທ່ານ ເຂົ້າ​ຮ່ວມ​ການ​ເຝິກ­ອົບ­ຮົມ ແລະ ເກັບ​ຕົວ​ເຝິກ­ຊ້ອມ ທີ່​ປະ­ເທດ​ຍີ່­ປຸ່ນ ເປັນ​ເວ­ລາ 19 ວັນ ກ່ອນ​ເຂົ້າ​ຮ່ວມ​ການ​ແຂ່ງ­ຂັນ​ຍົກ​ນ້ຳ­ໜັກ​ຄົນ​ພິ­ການ ລາຍ­ການ “Japan National Championships 2019 Para Powerlifting” ທີ່​ນະ­ຄອນ­ຫຼວງ​ໂຕ​ກຽວ ປະ­ເທດ​ຍີ່­ປຸ່ນ ເປັນ​ເຈົ້າ­ພາບ ໃນ​ວັນ​ທີ 2-3 ກຸມ­ພາ 2019 ນີ້ ແລະ ກຽມ​ລາຍ­ການ​ສາ­ກົນ ໃນ​ອະ­ນາ­ຄົດ.

    ທ່ານ ນາງ ລັດ­ດາ​ວັນ ພົມ​ມະ​ໂຄດ ຜູ້​ປະ­ສານ​ງານ​ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ ທັງ​ເປັນ​ຄູ​ເຝິກ ໄດ້​ໃຫ້​ສຳ­ພາດ ໃນ​ວັນ​ທີ 18 ມັງ­ກອນ 2019 ຜ່ານ​ມາ ໃຫ້​ຊາບ​ວ່າ: ຄະ­ນະ​ກຳ­ມະ­ການ​ພາ​ຣາ​ແລມ​ປິກ​ແຫ່ງ​ຊາດ​ລາວ ໄດ້​ສົ່ງ​ຄະ­ນະ​ຄູ​ເຝິກ ແລະ ນັກ​ກິ­ລາ ຈຳ­ນວນ 4 ທ່ານ ປະ­ກອບ​ມີ: ທ່ານ​ນາງ ລັດ­ດາ​ວັນ ພົມ​ມະ​ໂຄດ ທ່ານ ຢູ​ຊູ​ເກະ ຄົວ​ວາ​ຮາ​ຣະ ທ້າວ ເປ້ຍ ເຫຼົາ​ພັກ­ດີ ແລະ ນາງ ລັດ­ສະ­ໝີ ສີ​ປະ­ເສີດ ນັກ­ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ທີມ​ຊາດ​ລາວ ໄປ​ເຂົ້າ​ຮ່ວມ​ການ​ເຝິກ­ອົບ­ຮົມ ແລະ ເກັບ​ຕົວ​ເຝິກ­ຊ້ອມ ທີ່​ປະ­ເທດ​ຍີ່­ປຸ່ນ ໃນ​ລະ­ຫວ່າງ​ວັນ​ທີ 12-30 ມັງ­ກອນ​ນີ້ ໂດຍ​ເຂົ້າ​ຮ່ວມ​ເຝິກ­ອົບ­ຮົມ ແລະ ເກັບ​ຕົວ​ເຝິກ­ຊ້ອມ ທີ່​ນະ­ຄອນ­ຫຼວງ​ກຽວ​ໂຕ ປະ­ເທດ​ຍີ່­ປຸ່ນ ໃນ​ລະ­ຫວ່າງ​ວັນ​ທີ 12-19 ມັງ­ກອນ 2019 ຈັດ​ໂດຍ​ສະ­ຫະ­ພັນ​ກີ­ລາ​ຍົກ​ນ້ຳ­ໜັກ​ຄົນ​ພິ­ການ​ແຫ່ງ​ຊາດ​ຍີ່­ປຸ່ນ ຫຼັງ​ຈາກ​ນັ້ນ ເດີນ­ທາງ​ຕໍ່​ເຂົ້າ​ເຝິກ­ອົບ­ຮົມ ແລະ ເກັບ​ຕົວ​ເຝິກ­ຊ້ອມ ທີ່​ເມືອງ​ເບັບ​ປຸ ແຂວງ​ໂອ​ອິ​ຕະ ປະ­ເທດ​ຍີ່­ປຸ່ນ ໃນ​ລະ­ຫວ່າງ​ວັນ​ທີ 21-30 ມັງ­ກອນ​ນີ້.

    ທ່ານ​ຍັງ​ແຈ້ງ​ໃຫ້​ຊາບ​ຕື່ມ​ອີ​ກວ່າ: ການ​ມາ​ເຝິກ­ອົບ­ຮົມ​ໃນ​ຄັ້ງ​ນີ້ ແມ່ນ​ເພື່ອ​ເປັນ​ການ​ກະ­ກຽມ​ຄວາມ​ພ້ອມ​ກ່ອນ​ເຂົ້າ​ຮ່ວມ​ງານ “Japan National Championships 2019 Para Powerlifting” ໃນ​ລະ­ຫວ່າງ​ວັນ​ທີ 2-3 ກຸມ­ພາ 2019 ທີ່​ນະ­ຄອນ­ຫຼວງ​ໂຕ​ກຽວ ປະ­ເທດ​ຍີ່­ປຸ່ນ ໂດຍ​ມີ​ນັກ­ກີ­ລາ​ທົ່ວ​ປະ­ເທດ​ຍີ່­ປຸ່ນ ລາວ ສ ເກົາ­ຫຼີ ແລະ ສສ ຫວຽດ­ນາມ ເຂົ້າ​ຮ່ວມ.

ຂ່າວທີ່ກ່ຽວຂ້ອງ