ຂ່າວຫຼ້າສຸດ

ນະຄອນປາກເຊ ສຳເລັດການແຂ່ງຂັນກີລານັກຮຽນ ປະຈຳປີ

241 22 ມ.ກ. 2019 ວົງຈອນກີລາ
ນະຄອນປາກເຊ ສຳເລັດການແຂ່ງຂັນກີລານັກຮຽນ ປະຈຳປີ

    ການ​ແຂ່ງ­ຂັນ​ກີ­ລາ​ນັກ­ຮຽນ ທົ່ວ​ນະ­ຄອນ​ປາກ​ເຊ ໄດ້​ສຳ­ເລັດ​ລົງ ໃນ​ວັນ​ທີ 11 ມັງ­ກອນ 2019 ຜ່ານ​ມາ ຫຼັງ​ດຳ­ເນີນ​ມາ​ຕັ້ງ­ແຕ່​ວັນ​ທີ 23 ພະ­ຈິກ 2018 ທີ່​ເດີ່ນ​ໂຮງ­ຮຽນ ມສ ບ້ານ​ກາງ ນະ­ຄອນ​ປາກ​ເຊ ໂດຍ​ມີ​ທ່ານ ອຳ​ຄາ ປ້ອງ​ວິ­ໄລ ປະ­ທານ​ກວດ­ກາ​ພັກ-ລັດ ນະ­ຄອນ​ປາກ​ເຊ ແຂວງ​ຈຳ­ປາ​ສັກ ແລະ ທ່ານ ໄພ​ວອນ ຜາ​ບຸນ​ມີ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ຈຳ­ປາ​ສັກ ມີ​ພະ­ນັກ­ງານ ຄູ-ອາ­ຈານ ແລະ ພໍ່​ແມ່​ປະ­ຊາ­ຊົນ​ພາຍ​ໃນ​ນະ­ຄອນ​ປາກ​ເຊ ເຂົ້າ​ຮ່ວມ​ຢ່າງ​ຫຼວງ­ຫຼາຍ.

    ທ່ານ ສີ​ຜາ ຂຸນ​ດາ­ລາ ຮອງ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ ນະ­ຄອນ​ປາກ​ເຊ ໄດ້​ລາຍ​ງານ​ໃຫ້​ຊາບ​ວ່າ: ການ​ແຂ່ງ­ຂັນ​ກີ­ລາ​ຄັ້ງ​ນີ້ ມີ​ຜູ້​ເຂົ້າ​ຮ່ວມ​ທັງ​ໝົດ 1.090 ຄົນ ມີ 3 ປະ­ເພດ​ກີ­ລາ​ຄື: ເຕະ­ບານ​ຊາຍ-ຍິງ ກະ­ຕໍ້​ຊາຍ ແລະ ກີ­ລາ​ມວນ​ຊົນ​ຊາຍ-ຍິງ ໂດຍ​ມີ 10 ໂຮງ­ຮຽນ ແລະ ໂຮງ­ຮຽນ​ປະ­ຖົມ 6 ກຸ່ມ ແລະ ອະ­ນຸ­ບານ ໃນ​ທົ່ວ​ນະ­ຄອນ​ປາກ​ເຊ​ເຂົ້າ​ຮ່ວມ ຜົນ​ການ​ແຂ່ງ­ຂັນ​ປາ­ກົດ​ວ່າ: ເຕະ­ບານ​ຊາຍ ຊັ້ນ ມ​ຕົ້ນ ອັນ​ດັບ 1 ມ​ຕົ້ນ ສະ­ໜາມ​ໄຊ ອັນ​ດັບ 2 ມ​ຕົ້ນ ໂພນ​ສີ​ໄຄ ແລະ ອັນ​ດັບ 3 ມ​ຕົ້ນ ແກ້ວ​ສຳ­ພັນ ເຕະ­ບານ​ຍິງ ອັນ​ດັບ 1 ມ​ຕົ້ນ ຈັດ​ສັນ ອັນ​ດັບ 2 ມ​ຕົ້ນ ແກ້ວ​ສຳ­ພັນ ແລະ ອັນ​ດັບ 3 ມ​ຕົ້ນ ໂພນ​ສີ​ໄຄ ເຕະ­ບານ​ຊາຍ​ຊັ້ນ​ປະ­ຖົມ​ສຶກ​ສາ ອັນ​ດັບ 1 ກຸ່ມ​ເທ­ສະ​ບານ ອັນ​ດັບ 2 ກຸ່ມ 1 ແລະ ອັນ​ດັບ 3 ກຸ່ມ 5 ກະ­ຕໍ້ ຊັ້ນ​ມັດ­ທະ­ຍົມ​ສຶກ​ສາ​ຕອນ​ຕົ້ນ ອັນ​ດັບ 1 ມ​ຕົ້ນ ດອນ​ເຂາະ ອັນ​ດັບ 2 ມ​ຕົ້ນ ໂພນ​ສີ​ໄຄ ແລະ ອັນ​ດັບ 3 ມສ ບ້ານ​ກາງ ກະ­ຕໍ້​ຊັ້ນ​ປະ­ຖົມ​ສຶກ​ສາ ອັນ​ດັບ 1 ກຸ່ມ 5 ອັນ​ດັບ 2 ກຸ່ມ 1 ແລະ ອັນ​ດັບ 3 ກຸ່ມ 4.

    ນອກ­ຈາກ​ນີ້ ຍັງ​ມີ​ກີ­ລາ​ມວນ​ຊົນ​ແຕ່​ຊັ້ນ​ອະ­ນຸ­ບານ ຮອດ​ຊັ້ນ​ມັດ­ທະ­ຍົມ​ສຶກ​ສາ ຄື: ກີ­ລາ​ດຶງ­ເຊືອກ ຊ່ວງ​ເຮືອ​ບົກ ເປົ່າ​ແປ້ງ​ເອົາ​ຫຼຽນ ອົມ​ນ້ຳ​ໃສ່​ແກ້ວ ນຸ່ງ​ເຄື່ອງ​ໄວ ແຂ່ງ​ກັນ​ກິນ​ກ້ວຍ ຢຽບ​ປຸ່ມ​ເປົ້າ ຄາບ​ບ່ວງ​ໃສ່​ໄຂ ກິນ​ໝາກ­ແຕງ​ແຂ່ງ​ກັນ ແລະ ຕຶກ­ເບັດ ທັງ​ນີ້ ກໍ​ເພື່ອ​ເປັນ​ການ​ສ້າງ​ຈິດ­ໃຈ​ນັກ­ຮຽນ​ມັກ​ຮັກ​ໃນ​ການ​ຫຼີ້ນ​ກີ­ລາ ເພື່ອ​ຫ່າງ​ໄກ​ຈາກ​ສິ່ງ​ເສບ​ຕິດ ເຮັດ​ໃຫ້​ສຸ­ຂະ­ພາບ​ແຂງ­ແຮງ​ໜີ​ຫ່າງ​ຈາກ​ໂລກ​ຮ້າຍ​ທັງ​ປວງ ສ້າງ​ໃຫ້​ນັກ­ຮຽນ​ກາຍ­ເປັນ​ນັກ­ກີ­ລາ​ທີ່​ມີ​ໄຫວ​ພິບ ມີ​ຄວາມ​ສາ­ມາດ​ທີ່​ໂດດ​ເດັ່ນ ຮູ້­ຈັກ​ໄດ້ ຮູ້­ຈັກ​ເສຍ ຮູ້­ຈັກ​ໃຫ້​ອະ­ໄພ​ຊຶ່ງ​ກັນ ແລະ ກັນ ເພື່ອ​ມິດ­ຕະ­ພາບ​ທີ່​ດີ­ງາມ ສ້າງ​ແນວ​ຄິດ​ໃຫ້​ມີ​ຄວາມ​ສີ­ວິ­ໄລ​ທາງ​ດ້ານ​ຈິດ­ໃຈ.

ຂ່າວທີ່ກ່ຽວຂ້ອງ