ໜ້າທີ່ຂອງລູກ

581 23 ມ.ກ. 2019 ນານາສາລະ

    ສ່ວນ​ຕົວ​ຜູ້​ຂຽນ​ຄິດ​ວ່າ ບັນ­ຫາ​ຂອງ​ຄອບ­ຄົວ ຫຼື ສັງ­ຄົມ​ທີ່​ເກີດ​ຂຶ້ນ​ນັ້ນ ສ່ວນ​ໜຶ່ງ​ມາ​ຈາກ​ສາ­ເຫດ​ທີ່​ຄົນ​ເຮົາ​ບໍ່​ສົນ­ໃຈ​ໜ້າ­ທີ່ ຫຼື ບໍ່​ປະ­ຕິ­ບັດ​ຕາມ​ໜ້າ­ທີ່​ຂອງ​ຕົນ ເຊັ່ນ: ການ​ລະ­ເລີຍ​ໜ້າ­ທີ່​ລະ­ຫວ່າງ ຜົວ-ເມຍ ພໍ່-ແມ່ ແລະ ລູກ ຫຼື ການ​ບໍ່​ເຮັດ​ຕາມ​ໜ້າ­ທີ່​ລະ­ຫວ່າງ​ນາຍ​ກັບ​ລູກ​ນ້ອງ ເຊິ່ງ​ສັງ­ເກດ​ເຫັນ​ວ່າ ຄົນ​ໃນ​ສັງ­ຄົມ​ສ່ວນ​ໜຶ່ງ​ລະ­ເລີຍ ຖື​ເບົາ ເຖິງ​ເວ­ລາ​ເກີດ​ບັນ­ຫາ ຈຶ່ງ​ວຸ້ນ​ກັນ­ຫາ​ທາງ​ແກ້ ເຊິ່ງ​ບາງ​ກໍ­ລະ­ນີ​ກໍ​ແກ້​ຍາກ ເພາະ​ຕົກ​ໃນ​ລັກ­ສະ­ນະ​ເຫັດ​ແກ່​ກາຍ​ຍາມ​ແກງ.

    ພະ­ພຸດ­ທະ­ເຈົ້າ​ໄດ້​ສອນ​ວ່າ: ລູກ​ມີ 3 ປະ­ເພດ ຄື: (1) ລູກ​ທີ່​ເກີດ​ມາ​ແລ້ວ​ສາ­ມາດ​ສ້າງ​ຄອບ­ຄົວ ແລະ ຖາ­ນະ​ໃຫ້​ຈະ­ເລີນ​ກວ່າ​ພໍ່​ແມ່ (2) ລູກ​ທີ່​ສ້າງ​ຖະ​ນະ​ຄອບ­ຄົວ​ສະ­ເໝີ​ກັບ​ພໍ່​ແມ່ (3) ລູກ​ທີ່​ບໍ່​ສາ­ມາດ​ສ້າງ​ຄອບ­ຄົວ​ໃຫ້​ດີ​ກວ່າ​ພໍ່​ແມ່ ແລະ ບໍ່​ສາ­ມາດ​ຮັກ­ສາ​ກຽດ​ຊື່​ສຽງ​ວົງ​ຕະ­ກຸນ​ໄດ້ ເຊິ່ງ​ມີ​ແຕ່​ເຮັດ​ໃຫ້​ເສື່ອມ​ເສຍ​ກຽດ​ສັກ​ສີ ປະ­ເພດ​ນີ້​ເອີ້ນ​ວ່າ ລູກ​ທີ່​ຕ່ຳ​ກວ່າ​ພໍ່​ແມ່ ດັ່ງ­ນັ້ນ ຜູ້​ທີ່​ເປັນ​ລູກ​ຄວນ​ເກັບ​ໄປ​ຄິດ​ໄຄ່​ຄວນ​ໃຫ້​ຖີ່​ຖ້ວນ​ວ່າ ເຮົາ​ຄວນ​ປັບ­ປຸງ​ພຶດ­ຕິ​ກຳ​ຈາກ​ຊົ່ວ​ເປັນ​ດີ ປັບ­ປຸງ​ພຶດ­ຕິ​ກຳ​ຈາກ​ທີ່​ບໍ່​ດີ​ຕໍ່​ຄົນ​ອ້ອມ​ຂ້າງ ໃຫ້​ກາຍ­ເປັນ​ຄົນ­ຮູ້​ຜູ້­ດີ ພະ­ພຸດ­ທະ­ເຈົ້າ​ຈຶ່ງ​ສອນ​ເລື່ອງ​ໜ້າ­ທີ່​ຂອງ​ລູກ​ຕ້ອງ​ປະ­ຕິ­ບັດ​ຕໍ່​ພໍ່ ແມ່​ມີ​ຢູ່ 5 ປະ­ການ​ດັ່ງ­ນີ້: (1) ລູກ​ມີ­ໜ້າ​ທີ່​ລ້ຽງ​ດູ​ພໍ່​ແມ່ ຕອບ​ແທນ​ບຸນ­ຄຸນ ເພື່ອ​ປ້ອງ​ກັນ​ຕົນ​ເອງ​ບໍ່​ໃຫ້​ເປັນ​ຄົນ​ເນ­ລະ­ຄຸນ (2) ລູກ​ມີ­ໜ້າ​ທີ່​ຊ່ວຍ​ວຽກ​ຂອງ​ພໍ່​ແມ່ ເພື່ອ​ແບ່ງ​ເບົາ​ພາ­ລະ​ໜ້າ­ທີ່​ໃຫ້​ພໍ່​ແມ່​ໄດ້​ສະ­ບາຍ​ໃຈ (3) ລູກ​ຕ້ອງ​ຮັກ­ສາ​ຊື່​ສຽງ​ວົງ​ຕະ­ກຸນ ດ້ວຍ​ກຽດ​ສັກ​ສີ (4) ລູກ​ຕ້ອງ​ປະ­ພຶດ​ຕົນ​ໃຫ້​ເໝາະ​ສົມ​ກັບ​ຄວາມ​ເປັນ​ທາ­ຍາດ​ຄື ບໍ່​ເຮັດ​ໃຫ້​ພໍ່​ແມ່​ເສຍ ໜ້າ​ດ້ວຍ​ພຶດ­ຕິ​ກຳ​ບໍ່​ດີ​ເມື່ອ​ເຂົ້າ​ສັງ­ຄົມ (5) ລູກ​ຕ້ອງ​ຮູ້­ຈັກ​ກະ­ຕັນ­ຍູ​ຮູ້​ຄຸນ ຖ້າ­ວ່າ​ພໍ່​ແມ່​ລ່ວງ​ລັບ​ຈາກ​ເຮົາ​ໄປ​ຕ້ອງ​ເຮັດ­ບຸນ​ອຸ­ທິດ​ກຸ­ສົນ​ໃຫ້.

    ໜ້າ­ທີ່​ຂອງ​ລູກ 5 ປະ­ການ​ນີ້ ຖື​ເປັນ​ເຄື່ອງ​ບົ່ງ​ບອກ​ວ່າ ລູກ​ໄດ້​ເຮັດ​ຫຼ້ອນ​ໜ້າ­ທີ່​ພຽງ​ໃດ ? ໃນ​ຖາ­ນະ​ທີ່​ເຮົາ​ເປັນ​ລູກ ເຮົາ​ໄດ້​ປະ­ພຶດ​ຕົນ​ໃຫ້​ພໍ່​ແມ່​ໄດ້​ເຊື່ອ​ໃຈ​ພຽງ​ໃດ? ຖ້າ­ວ່າ​ລູກ​ຄົນ​ໃດ​ຫາກ​ບໍ່​ປະ­ຕິ­ບັດ​ຕາມ​ໜ້າ­ທີ່ ຫຼື ຍັງ​ຂືນ​ເຮັດ​ໃຫ້​ພໍ່​ແມ່​ທຸກ​ໃຈ ທາງ​ພຸດ​ທະ​ສາ­ສະ­ໜາ​ຖື​ວ່າ​ລູກ​ຜູ້​ນັ້ນ​ຄື​ນາ­ຮົກ​ຂຸມ​ໜຶ່ງ ທີ່​ກໍ່​ກອງ​ໄຟ​ສຸມ​ໃສ່​ໜ້າ​ເອິກ​ຂອງ​ພໍ່​ແມ່ ເພາະ​ເຮັດ​ໃຫ້​ພໍ່​ແມ່​ເປັນ​ທຸກ ກົງ­ກັນ­ຂ້າມ ຖ້າ­ວ່າ​ລູກ​ຄົນ​ໃດ​ໄດ້​ເຮັດ​ໜ້າ­ທີ່ 5 ປະ­ການ​ນັ້ນ​ໄດ້​ສົມ­ບູນ ກໍ່​ໄດ້​ຊື່­ວ່າ​ເປັນ​ລູກ (ບຸດ​ທີ່​ສົມ­ບູນ) ເຊິ່ງ​ແປ​ວ່າ​ເປັນ​ຜູ້​ເຮັດ​ໃຫ້ ພໍ່​ຊື່ນ​ໃຈ ດັ່ງ­ນັ້ນ ສອງ​ຄວາມ​ໝາຍ​ນີ້ ແລະ 5 ໜ້າ­ທີ່​ນີ້ ຈຶ່ງ​ເປັນ​ສິ່ງ​ທີ່​ຜູ້​ເປັນ​ລູກ​ຄວນ​ສຶກ​ສາ​ແລ້ວ ໃສ່­ໃຈ​ເຮັດ​ໜ້າ­ທີ່​ຂອງ​ຕົນ​ບໍ່​ໃຫ້​ສັງ­ຄົມ​ຕອກ​ໜ້າ​ວ່າ​ເປັນ​ຄົນ​ເນ­ລະ­ຄຸນ.

    ໜ້າ­ທີ່​ຂອງ​ລູກ 5 ປະ­ການ ແລະ ລູກ 3 ປະ­ເພດ​ນັ້ນ ເຮົາ​ຈົ່ງ​ເລືອກ​ເອົາ​ວ່າ​ຈະ​ຕົກ​ຢູ່​ໃນ​ປະ­ເພດ​ໃດ? ຫຼັກ​ຄຳ​ສອນ​ຂ້າງ​ເທິງ​ນັ້ນ ພະ­ພຸດ­ທະ­ເຈົ້າ​ໄດ້​ສອນ​ໄວ້​ສອງ​ພັນ​ກວ່າ​ປີ​ແລ້ວ ເຊິ່ງ​ການ​ເຮັດ​ໜ້າ­ທີ່​ຂອງ​ຕົນ​ໃຫ້​ສົມ­ບູນ​ນັ້ນ ກໍ່​ເປັນ​ການ​ເຮັດ​ໃຫ້​ຄອບ­ຄົວ​ເກີດ​ຄວາມ­ສຸກ ແລະ ພໍ່​ແມ່​ກໍ່​ຮູ້­ສຶກ​ພູມ­ໃຈ​ໃນ​ຕົວ​ເຮົາ ຖ້າ­ວ່າ​ຟັງ​ຄວາມ​ພໍ່​ແມ່​ບອກ­ສອນ ເພາະ​ຄົນ​ໃດ​ກໍ​ຕາມ​ທີ່​ບໍ່​ຟັງ​ຄວາມ​ພໍ່​ແມ່ ຜີ​ມັກ​ແກ່​ເຂົ້າ​ໝໍ້​ນາ­ຮົກ.

ຂ່າວທີ່ກ່ຽວຂ້ອງ