ຂ່າວຫຼ້າສຸດ

ພະຍາດ​ໄຂ້ເລືອດອອກ​ສາຍ​ພັນ ລາ​​ສ​ຊາ ລະບາດ​ຢູ່​ໃນ​ນີ​ເຊຣີ

530 24 ມ.ກ. 2019 ຂ່າວຕ່າງປະເທດ
ພະຍາດ​ໄຂ້ເລືອດອອກ​ສາຍ​ພັນ ລາ​​ສ​ຊາ ລະບາດ​ຢູ່​ໃນ​ນີ​ເຊຣີ

     ອົງການ​ອະນາໄມ​ຂອງ​ນີ​ເຊຣີ ປະກາດ​ເມື່ອ​ວັນ​ທີ 22 ມັງກອນ​ນີ້​ວ່າ ການ​ລະບາດ​ເທື່ອ​ໃໝ່​ຂອງ​ໄຂ້ເລືອດອອກ​ສາຍ​ພັນ​ລາ​​ສ​ຊາ (Lassa) ນັບ​ແຕ່​ຕົ້ນ​ເດືອນ​ມັງກອນ​ນີ້​ເປັນຕົ້ນ​ມາ ໄດ້​ເຮັດ​ໃຫ້ ມີ​ຜູ້​ເສຍ​ຊີວິດ​ແລ້ວ 16 ຄົນ.

    ບົດ​ລາຍ​ງານ​ຂອງ​ສູນ​ຄວບ​ຄຸມພະ​ຍາດ​ຂອງ​ນີ​ເຊຣີ (NCDC) ທີ່​ຫາ​ກໍ​ນຳ​ອອກ​ມາ​ເປີດເຜີຍ ໃຫ້​ຮູ້​ວ່າ ນັບ​ແຕ່​ຕົ້ນ​ເດືອນ​ມັງກອນ​ປີ​ນີ້​ເປັນຕົ້ນ​ມາ ຈຳນວນ​ຜູ້​ຕິດພະຍາດ​ໄຂ້ເລືອດອອກ​ສາຍ​ພັນ ລາ​​ສ​ຊາ ໄດ້​ເພີ່ມ​ຂຶ້ນ​ຢ່າງ​ໄວ​ຢູ່​ໃນ​ຫຼາຍ​ລັດ​ຂອງ​ນີ​ເຊຣີ ແລະ​ມີ​ຜູ້​ເສຍ​ຊີວິດ​ໄປ​ແລ້ວ 16 ຄົນ. ບົດ​ລາຍ​ງານ​ໃຫ້​ຮູ້​ວ່າ ອັດຕາ​ສ່ວນ​ການ​ຕາຍ​ຂອງ​ຜູ້​ຕິດພະຍາດ​ດັ່ງກ່າວ​ຢູ່​ທີ່ 24,3%. ປັດຈຸບັນ​ນີ້ ນີ​ເຊຣີ ຢັ້ງຢືນ​ການ​ສົງ​ໃສ​ຜູ້​ຕິດພະຍາດ​ໄຂ້ເລືອດອອກ​ສາຍ​ພັນ ລາ​​ສ​ຊາ ຈຳນວນ 172 ກໍລະນີ ໃນ​ນັ້ນ​ມີ 60 ກໍລະນີ​ໄດ້​ຮັບ​ການ​ຢັ້ງຢືນ​ຜົນ​ເປັນ​ບວກ ແລະ 112 ມີ​ຜົນ​ເປັນ​ລົບ ກັບ ລາ​​ສ​ຊາ. ໄວ​​ຣັສ​ໄຂ້ເລືອດອອກ ລາ​​ສ​ຊາ ໄດ້​ຮັບ​ການ​ກວດ​ພົບ​ຢູ່​ໃນ 8/37 ລັດ​ຂອງ​ນີ​ເຊຣີ. ຕໍ່​ສະພາບ​ການ​ດັ່ງກ່າວ NCDC ໄດ້​ປະກາດ​ພາວະ​ລະບາດ​ຂອງ​ພະຍາດ ແລະ​ສ້າງຕັ້ງ​ສູນ​ເຄື່ອນ​ໄຫວ ສຸກ​ເສີນ​ແຫ່ງ​ໜຶ່ງ​ຂຶ້ນ​ມາ ເພື່ອ​ປະສານ​ງານ.

    ໃນ​ປີ 2018 ພະຍາດ​ໄຂ້ເລືອດອອກ​ສາຍ​ພັນ ລາ​​ສ​ຊາ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ  171 ຄົນ​ຢູ່​ໃນ 23 ລັດ​ຂອງ​ນີ​ເຊຣີ ຈາກ​ທີ່​ມີ​ຜູ້​ມີ​ຜົນ​ກວດ​ເປັນ​ບວກ​ກັບ​ພະຍາດ​ດັ່ງກ່າວ 633 ຄົນ ແລະ​ມີ​ເກືອບ 3.500 ຄົນ​ຖືກ​ສົງ​ໃສ.

    ອົງການ​ອະນາໄມ​ໂລກ (WHO) ໃຫ້​ຮູ້​ວ່າ​ພະຍາດ ໄຂ້ເລືອດອອກ​ສາຍ​ພັນ ລາ​​ສ​ຊາ ເປັນ​ພະຍາດ​ທີ່​ຕິດ​ຈາກ​ໄວ​​ຣັສ​ຊະນິດ​ໜຶ່ງ ທີ່​ມີ​ຕະກຸນ​ດຽວ​ກັບ​ໄວ​​ຣັສ​ຕ່າງໆ ເຊັ່ນ ມາ​ບຸກ  (Marburg) ແລະ​ອີ​ໂບ​ລາ (Ebola). ຊື່​ເອີ້ນ​ຂອງ Lassa ຖືກ​ຕັ້ງ​ຕາມ​ຊື່​ຂອງ​ທ້ອງຖິ່ນ​ໜຶ່ງ ຢູ່​ທາງ​ພາກ​ເໜືອ​ນີ​ເຊຣີ ບ່ອນ​ທີ່​ພະຍາດ​ດັ່ງກ່າວ​ໄດ້​ຖືກ​ກວດ​ພົບ​ເປັນ​ເທື່ອ​ທຳ​ອິດ ເມື່ອ​ປີ  1969. ການ​ແຜ່​ລາມ​ຂອງ​ພະຍາດ​ນີ້ ມັກ​ຈະ​ເກີດ​ຂຶ້ນ​ໂດຍ​ຜ່ານ​ການ​ຖ່າຍ​ເທ ຂອງ​ພວກ​ສັດ​ຄ້ຽວ​ອາຫານ ຫຼື​ຜ່ານ​ການ​ສຳ​ພັດ​ໂດຍ​ກົງ ກັບ​ເລືອດ ປັດ​ສະ​ວະ ອາຈົມ ຫຼື​ເນື້ອ​ເຍື່ອ​ອື່ນໆ​ຂອງ​ຄົນ​ເຈັບ.

ຂ່າວທີ່ກ່ຽວຂ້ອງ