ສ ເກົາຫຼີ ຊະນະ ບາເຣນ ເຂົ້າຮອບ 8 ທີມ ເອຊຽນຄັບ 2019

457 24 ມ.ກ. 2019 ວົງຈອນກີລາ
ສ ເກົາຫຼີ ຊະນະ ບາເຣນ ເຂົ້າຮອບ 8 ທີມ ເອຊຽນຄັບ 2019

    ການ​ແຂ່ງ­ຂັນ​ເຕະ­ບານ​ຊາຍ ຊີງ​ແຊັມ​ອາ­ຊີ ຫຼື ເອ​ຊຽນ​ຄັບ 2019 ຢູ່​ສະ­ຫະ­ລັດ​ອາ​ຣັບ​ເອ​ມີ​ເຣ​ສ ໃນ​ວັນ​ທີ 22 ມັງ­ກອນ 2019 ຮອບ 16 ທີມ​ສຸດ​ທ້າຍ ສ ເກົາ­ຫຼີ ແຊັມ 2 ສະ­ໄໝ ຮອງ​ແຊັມ​ຄັ້ງ​ຜ່ານ​ມາ ລົງ​ແຂ່ງ­ຂັນ​ພົບ​ກັບ ບາ​ເຣນ ທີ່​ເຂົ້າ​ສູ່​ຮອບ​ນັອກ​ເອົ້າ​ຄັ້ງ​ທຳ​ອິດ​ໃນ​ຮອບ 15 ປີ ເຊິ່ງ​ເກມ​ນັດ​ນີ້ ສ ເກົາ­ຫຼີ ຄອງ​ບານ​ໄດ້​ຫຼາຍ​ກວ່າ ແຕ່​ເຈາະ​ເກມ​ຮັບ ບາ​ເຣນ ບໍ່​ງ່າຍ ຈຶ່ງ​ຕ້ອງ​ບຸກ​ດ້ວຍ​ຄວາມ​ອົດ­ທົນ ແລະ ສາ­ມາດ​ອອກ​ນຳ 1-0 ປະ­ຕູ ໃນ​ທ້າຍ​ເຄິ່ງ​ເວ­ລາ​ທີ 1 ຈາກ ຫວາງ​ຮີ​ຊານ ກອງ​ໜ້າ​ໄວ 22 ປີ ຈາກ​ສະ­ໂມ­ສອນ ຮຳ​ບວກ (ລີກ 2 ຂອງ​ເຢຍ​ລະ​ມັນ).

    ເຄິ່ງ​ຫຼັງ ບາ​ເຣນ ກ້າ​ເປີດ​ເກມ​ບຸກ​ຫຼາຍ​ຂຶ້ນ ແລະ ສາ­ມາດ​ຍິງ​ຕີ​ສະ­ເໝີ 1-1 ຈາກ ໂມ​ຮາ​ເໝັດ ອາວ​ໂຣ​ໄມ​ຮີ ນາ­ທີ 77 ຈົບ 90 ສະ­ເໝີ​ກັນ 1-1 ປະ­ຕູ ໄດ້​ຕໍ່​ເວ­ລາ​ພິ­ເສດ 30 ນາ­ທີ ສ ເກົາ­ຫຼີ ສົ່ງ ຄິມ​ຈິນ​ຊູ ກອງ​ຫຼັງ​ຈາກ​ສະ­ໂມ­ສອນ ຈຸນ​ບັກ ມໍ​ເຕີ ທີມ​ນຳ​ໃນ​ລີກ​ສູງ​ສຸດ​ຂອງ ສ ເກົາ­ຫຼີ ລົງ​ມາ​ແທນ ຮົງ​ຈຸນ ແລະ ມາ​ຍິງ​ປະ­ຕູ​ໄຊ​ໃນ​ນາ­ທີ 105+2 ສ່ວນ​ເວ­ລາ​ທີ່​ເຫຼືອ​ແມ່ນ​ບໍ່​ສາ­ມາດ​ຍິງ​ປະ­ຕູ​ກັນ​ໄດ້ ເຮັດ​ໃຫ້ ສ ເກົາ­ຫຼີ ເຂົ້າ​ຮອບ 8 ທີມ​ສຸດ​ທ້າຍ​ເປັນ​ຄັ້ງ​ທີ 7 ຕິດ­ຕໍ່​ກັນ ແລະ ເປັນ​ປະ­ຕູ​ທຳ​ອິດ​ຂອງ ຄິມ​ຈິນ​ຊູ ໃນ​ນາມ​ທີມ​ຊາດ.

    ສຳ­ລັບ​ຮອບ 8 ທີມ​ສຸດ​ທ້າຍ ຈະ​ແຂ່ງ­ຂັນ​ວັນ​ທີ 24 ມັງ­ກອນ 2019 ທີມ​ຊາດ​ຫວຽດ­ນາມ ພົບ ທີມ​ຊາດ​ຍີ່­ປຸ່ນ ທີມ​ຊາດ ສປ ຈີນ ພົບ ທີມ​ຊາດ​ອີ​ຣານ ສ່ວນ​ວັນ​ທີ 25 ມັງ­ກອນ 2019 ທີມ​ຊາດ ສ ເກົາ ຫຼີ ພົບ ທີມ​ຊາດ​ກາ​ຕ້າ ແລະ ທີມ​ຊາດ​ສະ­ຫະ­ລັດ​ອາ​ຣັບ​ເອ​ມີ​ເຣ​ສ ພົບ ທີມ​ຊາດ​ອົດ​ສະ​ຕຣາ​ລີ.

ຂ່າວທີ່ກ່ຽວຂ້ອງ