ຂ່າວຫຼ້າສຸດ

ປະລິມານ​ນັກ​ທ່ອງ​ທ່ຽວ​ສາກົນ ບັນລຸ 1,4 ຕື້​ເທື່ອ​ຄົນ ໃນ​ປີ 2018

228 28 ມ.ກ. 2019 ຂ່າວຕ່າງປະເທດ
ປະລິມານ​ນັກ​ທ່ອງ​ທ່ຽວ​ສາກົນ ບັນລຸ 1,4 ຕື້​ເທື່ອ​ຄົນ ໃນ​ປີ 2018

      ຕົວ​ເລກ​ໃໝ່​ຫຼ້າ​ສຸດ ທີ່​ອົງ​ການທ່ອງທ່ຽວ​ໂລກ ຂອງ​ສະຫະ​ປະຊາ​ຊາດ (UNWTO) ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 21 ມັງກອນ​ທີ່​ຜ່ານ​ມາ ໃຫ້​ຮູ້​ວ່າ ຈຳນວນ​ນັກ​ທ່ອງ​ທ່ຽວ​ສາກົນ ໄລ່​ເປັນ​ເທື່ອ​ຄົນ ໄດ້​ເພີ່ມ​ຂຶ້ນ 6% ໃນ​ປີ 2018 ລວມ​ແລ້ວ​ຂຶ້ນ​ເປັນ 1,4 ຕື້​ເທື່ອ​ຄົນ ຍ້ອນ​ວ່າ​ເສດຖະກິດ​ເພີ່ມ​ຂຶ້ນ​ຢ່າງ​ໝັ້ນ​ທ່ຽງ ແລະ​ຄ່າ​ໃຊ້​ຈ່າຍ​ໃຫ້​ແກ່​ການທ່ອງທ່ຽວ ທີ່​ເດີນທາງ​ໂດຍ​ການບິນ ມີ​ລາຄາ​ທີ່​ພໍ​ເໝາະ​ກວ່າ​ເກົ່າ.

    UNWTO ໃຫ້ການ​ຄາດ​ຄະເນ​ອອກ​ມາ​ເມື່ອ​ປີ 2010 ວ່າ​ຈຳນວນ​ເທື່ອ​ຄົນ​ຂອງ​ນັກ​ທ່ອງ​ທ່ຽວ​ສາກົນ ຈະ​ບັນລຸ​ຫຼັກ​ໝາຍ 1,4 ຕື້​ຄົນ ພາຍ​ໃນ​ປີ 2020. ແຕ່​ວ່າ​ມາ​ໃນ​ເວລາ​ນີ້ ສະພາບ​ຄວາມ​ເຕີບ​ໂຕ​ທາງ​ດ້ານ​ເສດຖະກິດ​ແຂງແຮງ​ກວ່າ ການທ່ອງທ່ຽວ​ທີ່​ເດີນທາງ​ໂດຍ​ທາງ​ການບິນ ມີ​ລາຄາ “ຫັນ​ໃຈ​ໄດ້​ງ່າຍ” ກວ່າ ປະກອບ​ກັບ​ການ​ທີ່​ປະເທດ​ຕ່າງໆ ທະຍອຍ​ກັນ​ໂຍະຍານ​ກົນ​ໄກ​ການ​ອອກ​ວີ​ຊາ​ຫຼາຍ​ຂຶ້ນ ເປັນ​ການ​ຊ່ວຍ​ຊຸກຍູ້​ການເຄື່ອນໄຫວ​ດ້ານ​ການທ່ອງທ່ຽວ​ທົ່ວ​ໂລກ.

    ໃນ​ຂະນະ​ດຽວ​ກັນ UNWTO ກໍ​ມີ​ການ​ຄາດ​ຄະເນ​ອອກ​ມາ​ວ່າ ການເຄື່ອນໄຫວ​ທ່ອງ​ທ່ຽວ​ໃນ​ທົ່ວ​ໂລກ ຈະ​ເຕີບ​ໂຕ​ປະມານ 3-4% ໃນ​ປີ 2019.  ລາຄາ​ນ້ຳມັນ​ມີ​ຄວາມ​ໝັ້ນຄົງ ຈະ​ເປັນ​ການ​ປະກອບສ່ວນ​ເຮັດ​ໃຫ້​ຄ່າ​ໃຊ້​ຈ່າຍ ໃຫ້​ແກ່​ການທ່ອງທ່ຽວ​ທີ່​ເດີນທາງ​ໂດຍ​ທາງ​ການບິນ ມີ​ຄວາມ​ພໍ​ເໝາະ​ຫຼາຍ​ຂຶ້ນ ໃນ​ຂະນະ​ທີ່​ການ​ເຊື່ອມ​ຈອດ​ດ້ານ​ການບິນ ສືບຕໍ່​ໄດ້​ຮັບ​ການ​ແກ້​ໄຂ​ຢູ່​ໃນ​ປາຍທາງ​ຫຼາຍ​ແຫ່ງ.

    ການ​ອອກ​ໄປ​ທ່ອງ​ທ່ຽວ​ຢູ​ຕ່າງປະເທດ ຂອງ​ປະຊາຊົນ​ທີ່​ຂຶ້ນ​ກັບ​ຕະຫຼາດ​ເກີດ​ໃໝ່ ຕົ້ນຕໍ​ກໍ​ແມ່ນ​ອິນ​ເດຍ ແລະ ​ຣັດ​ເຊຍ ຄາດ​ວ່າ​ຈະ​ສືບຕໍ່​ເພີ່ມ​ຂຶ້ນ​ຢ່າງ​ແຮງ. ແຕ່​ວ່າ UNWTO ກໍ​ແຈ້ງ​ເຕືອນ​ວ່າ ຄວາມ​ບໍ່​ໝັ້ນຄົງ ຊຶ່ງ​ພົວພັນ​ເຖິງ​ຂະ​ບວນ​ການ​ທີ່​ອັງກິດ ຖອນ​ອອກ​ໄປ​ຈາກ​ສະຫະພາບ​ເອີ​ຣົບ ຫຼື​ທີ່​ເອີ້ນ​ວ່າ Brexit ກໍ​ຄື​ຄວາມ​ເຄັ່ງ​ຕຶງ​ຂອງ​ພູມ​ສາດ​ການເມືອງ ແລະ ​ການ​ຄ້າ ອາດ​ຈະ​ເຮັດ​ໃຫ້​ບັນດາ​ນັກ​ລົງທຶນ ແລະ​ ນັກ​ທ່ອງ​ທ່ຽວ ມີ​ຈິດຕະສາດ​ລະມັດລະວັງ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ