ຄວາມຮູ້ ບໍ່ໄດ້ຄູ່ກັບຄວາມລວຍ

1.133 30 ມ.ກ. 2019 ນານາສາລະ

    ທຸກ​ປະ­ເທດ​ຕ້ອງ­ການ​ຊັບ­ພະ­ຍາ­ກອນ​ມະ­ນຸດ​ທີ່​ມີ​ຄຸນ​ນະ​ພາບ ເຊິ່ງ​ກ່ອນ​ຈະ​ໄດ້​ມະ­ນຸດ​ທີ່​ມີ​ຄຸນ​ນະ​ພາບ​ມາ​ຮັບ​ໃຊ້​ຊາດ ແລະ ສັງ­ຄົມ​ນັ້ນ ຍ່ອມ​ຕ້ອງ​ໄດ້​ຜ່ານ​ຂະ​ບວນ​ການ​ສຶກ​ສາ​ທີ່​ມີ​ຄຸນ​ນະ​ພາບ ດັ່ງ­ນັ້ນ ຜູ້​ຂຽນ​ເຂົ້າ­ໃຈ​ວ່າ: ຊັບ­ພະ­ຍາ­ກອນ​ມະ­ນຸດ​ທີ່​ມີ​ຄຸນ​ນະ​ພາບ ຈຶ່ງ​ຜ່ານ​ຫຼາຍ​ປັດ​ໄຈ​ສຳ­ຄັນ​ຂອງ​ການ​ສຶກ​ສາ ເຊັ່ນ: ສະ​ຖາ​ບັນ​ການ​ສຶກ​ສາ​ໄດ້​ຄຸນ​ນະ​ພາບ ຫ້ອງ​ສະ­ໝຸດ ມີ​ປື້ມ​ພຽງ­ພໍ​ໃຫ້​ອ່ານ ຄົ້ນ­ຄວ້າ ຄູ​ທີ່​ມີ​ຄຸນ​ນະ​ພາບ​ສາ­ມາດ​ປະ­ຍຸກ​ຄວາມ​ຮູ້ ແລະ ປະ­ຕິ​ຮູບ​ວິ­ທີ​ສິດ­ສອນ​ຂອງ​ຕົນ​ໃຫ້​ໄດ້​ຄຸນ​ນະ​ພາບ ຜູ້​ບໍ­ລິ­ຫານ​ການ​ສຶກ​ສາ​ເອົາ­ໃຈ­ໃສ່​ໃນ​ໜ້າ­ທີ່​ຂອງ​ຕົນ ໂດຍ​ສະ­ເພາະ ວຽກ​ວິ­ຊາ​ການ ແລະ ວຽກ​ພັດ­ທະ­ນາ​ຄູ.

    ພວກ​ເຮົາ​ບໍ່​ຄວນ​ລືມ​ວ່າ ຜູ້​ທີ່​ຈົບ​ການ​ສຶກ​ສາ​ນັ້ນ ສ່ວນ​ໜຶ່ງ​ບໍ່​ໄດ້​ປະ­ກອບ​ອາ­ຊີບ​ຕາມ​ສາຍ​ວິ­ຊາ​ທີ່​ເຂົາ​ຮຽນ​ຈົບ​ມາ​ໂດຍ​ກົງ ເນື່ອງ​ຈາກ​ສະ­ພາບ​ເງື່ອນ­ໄຂ​ສັງ­ຄົມ​ບໍ່​ອຳ­ນວຍ​ໃຫ້​ພວກ​ເຂົາ​ຍື່ນ​ເຂົ້າ​ວຽກ​ສາຍ​ກົງ​ໄດ້ ຈຶ່ງ​ຫັນ­ປ່ຽນ​ໄປ​ປະ­ກອບ​ອາ­ຊີບ​ອື່ນ ເພື່ອ​ລ້ຽງ​ປາກ​ທ້ອງ ເຖິງ​ແມ່ນ​ວ່າ​ຂັ້ນ​ເທິງ​ຈະ​ວາງ ແຜນ​ໃຫ້­ການ​ສຶກ​ສາ ເພື່ອ​ຕອບ​ສະ­ໜອງ​ການ​ຂະ­ຫຍາຍ​ໂຕ​ທາງ​ດ້ານ​ເສດ­ຖະ­ກິດ​ກໍ​ຕາມ ດັ່ງ­ນັ້ນ ຈຶ່ງ​ເປັນ​ສິ່ງ​ທີ່​ໜ້າ​ຄິດ​ວ່າ ການ​ສຶກ​ສາ​ຕ້ອງ​ໄດ້​ຈຳ­ເປັນ​ບູ​ລະ​ນາ​ການ​ວິ­ຊາ​ຄວາມ​ຮູ້​ຫຼາຍ​ສາ­ຂາ ບວກ​ກັບ​ວິ­ທີ​ການ​ກະ​ຕຸ້ນ​ໃຫ້​ນັກ­ຮຽນ​ເກີດ​ຈິນ­ຕະ­ນາ­ການ ເຊິ່ງ​ໜີ​ບໍ່​ມົ້ມ​ຄູ​ທີ່​ເກ່ງ ພ້ອມ​ວິ­ທີ​ສິດ­ສອນ​ຖ່າຍ​ທອດ​ຄວາມ​ຮູ້​ທີ່​ເກ່ງ ແລະ ຜູ້​ບໍ­ລິ­ຫານ​ການ​ສຶກ​ສາ​ທີ່​ທຸ້ມ­ເທ​ຕໍ່­ໜ້າ​ທີ່​ຂອງ​ຕົນ ຕາມ​ທີ່​ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ເຄີຍ​ເນັ້ນ​ຢ້ຳ​ໃຫ້​ຜູ້​ບໍ­ລິ­ຫານ​ການ​ສຶກ​ສາ​ເອົາ­ໃຈ­ໃສ່... ແຜນ​ຂອງ​ກະ­ຊວງ​ສຶກ​ສາ​ໄດ້​ກຳ­ນົດ​ມາດ­ຕະ­ຖານ​ການ​ສອນ​ຂອງ​ຄູ​ຊັ້ນ​ປະ­ຖົມ 4 ດ້ານ ແລະ 11 ມາດ­ຖານ ເພື່ອ​ຄ້ຳ­ປະ­ກັນ​ໃຫ້​ແກ່​ການ​ສິດ­ສອນ​ໃຫ້​ໄດ້​ຄຸນ​ນະ​ພາບ ເຊິ່ງ​ໃນ​ແຜນ​ດັ່ງ­ກ່າວ ໄດ້​ນິ​ຍາມ​ວິ­ທີ​ການ​ສອນ​ແບບ​ຄຸນ​ນະ​ພາບ​ໄວ້​ວ່າ: ແມ່ນ​ການ​ສອນ​ທີ່​ນຳ­ໄປ​ສູ່​ການ​ປັບ­ປຸງ​ຜົນ­ສຳ­ເລັດ​ທາງ​ດ້ານ​ການ​ຮຽນ​ຂອງ​ຜູ້​ຮຽນ.

    ມາດ­ຕະ­ຖານ​ການ​ສິດ­ສອນ 4 ດ້ານ ຄື: ຄວາມ​ຮູ້​ກ່ຽວ​ກັບ​ຜູ້​ຮຽນ ຄວາມ​ຮູ້​ກ່ຽວ​ກັບ​ລາຍ​ວິ­ຊາ ເປົ້າ​ໝາຍ​ຂອງ​ຫຼັກ­ສູດ ຄວາມ​ຮູ້​ກ່ຽວ​ກັບ​ການ​ສອນ ຄວາມ​ຮັບ­ຜິດ­ຊອບ​ທາງ​ດ້ານ​ວິ­ຊາ​ຊີບ​ຄູ.. ຜູ້​ຂຽນ​ເຫັນ​ວ່າ ສຳ­ລັບ​ຄູ​ແລ້ວ ບໍ່​ວ່າ​ຄູ​ປະ­ຖົມ ມັດ­ທະ­ຍົມ ຫຼື ມະ­ຫາ­ວິ­ທະ­ຍາ­ໄລ​ຕ້ອງ​ໄດ້​ປະ­ຕິ​ຮູບ ວິ­ທີ​ສອນ​ຂອງ​ຕົນ​ເອງ​ໃຫ້​ເຂົ້າ​ກັບ ຫຼື ສອດ­ຄ່ອງ ການ​ປ່ຽນ­ແປງ​ຂອງ​ສັງ­ຄົມ​ໂລກ ບໍ່​ແມ່ນ​ວ່າ​ກະ­ຊວງ​ສຶກ​ສາ​ເຮັດ​ປະ­ຕິ​ຮູບ​ການ​ສຶກ​ສາ ແຕ່​ຄູ​ເອງ​ບໍ່​ຄິດ​ຈະ​ປະ­ຕິ​ຮູບ​ວິ­ທີ​ສອນ​ຂອງ​ຕົນ ພາ­ລະ­ກິດ​ຂອງ​ຄູ​ຈຶ່ງ​ບໍ່​ແມ່ນ​ສິ່ງ​ທີ່​ຕົນ​ຖື​ເບົາ ເພາະ​ຈັນ​ຍາ​ບັນ​ໃນ​ອາ­ຊີບ​ທີ່​ກຳ­ນົດ​ໄວ້​ໃນ​ກົດ­ໝາຍ​ການ​ສຶກ​ສາ​ກໍ່​ມີ​ແລ້ວ ແຕ່​ການ​ສ້າງ​ຊັບ­ພະ­ຍາ­ກອນ​ມະ­ນຸດ​ໃຫ້​ໄດ້​ຄຸນ​ນະ​ພາບ ກໍ​ບໍ່​ໄດ້​ຂຶ້ນ​ກັບ​ຄູ​ພຽງ​ຢ່າງ​ດຽວ ດັ່ງ​ທີ່​ຜູ້​ຂຽນ​ໄດ້​ຍົກ​ເຫດ­ຜົນ​ໄວ້​ຕອນ​ຕົ້ນ​ນັ້ນ​ວ່າ: ຜູ້​ບໍ­ລິ­ຫານ​ການ​ສຶກ​ສາ​ຍິ່ງ​ເປັນ​ປັດ​ໄຈ​ຕົ້ນ­ຕໍ​ໃນ​ການ​ສົ່ງ­ເສີມ ແລະ ພັດ­ທະ­ນາ​ຄູ​ຄວບ​ຄູ່​ກັນ​ໄປ​ກັບ​ຝ່າຍ ກວດ­ກາ​ຄວນ​ລົງ​ກວດ­ກາ​ສະ​ໝ່ຳ​ສະ­ເໝີ​ວ່າ ຄູ​ໄດ້​ຮັບ​ການ​ພັດ­ທະ­ນາ​ຍົກ​ລະ­ດັບ​ໃນ​ແຕ່​ລະ­ສະ​ຖາ​ບັນ​ການ​ສຶກ​ສາ​ຫຼາຍ​ໜ້ອຍ​ພຽງ​ໃດ.

    ຜູ້​ຂຽນ​ເຫັນ​ວ່າ: ຫຼາຍ​ປະ­ເທດ​ເຂົາ​ເນັ້ນ​ວຽກ​ສຶກ​ສາ​ໃຫ້​ຈະ­ເລີນ​ຄູ່​ຂະ­ໜານ​ກັບ​ວຽກ​ເສດ­ຖະ­ກິດ ຂ່າວ​ອາ­ທິດ​ຜ່ານ​ມາ ສັງ­ຄົມ​ກໍ​ຮູ້​ດີ​ວ່າ ທະ­ນາ­ຄານ​ໂລກ ໄດ້​ອອກ​ຄຳ​ເຫັນ​ໃຫ້​ເຮົາ​ລົງ­ທຶນ​ໃສ່​ການ​ສຶກ​ສາ​ເພີ່ມ​ຂຶ້ນ ເຊິ່ງ​ຍາມ​ໃດ​ກໍ່​ແມ່ນ​ຄົນ​ເປັນ​ຜູ້​ຕັດ­ສິນ​ວຽກ​ງານ​ຈະ​ກ້າວ­ໜ້າ ຫຼື ຖອຍ­ຫຼັງ​ກໍ​ຂຶ້ນ​ກັບ​ຄົນ.

ຂ່າວທີ່ກ່ຽວຂ້ອງ