ປະທານຢູໂດລາວ ໄດ້ຮັບຫຼຽນກຽດຕິຍົດຈາກອົງຈັກກະພັດຍີ່ປຸ່ນ

207 31 ມ.ກ. 2019 ວົງຈອນກີລາ
ປະທານຢູໂດລາວ ໄດ້ຮັບຫຼຽນກຽດຕິຍົດຈາກອົງຈັກກະພັດຍີ່ປຸ່ນ

    ທ່ານ ເຂັມ​ຊາດ ພິ­ລາ​ພັນ​ເດ​ຊ ປະ­ທານ​ສະ­ຫະ­ພັນ​ກີ­ລາ​ຢູ​ໂດ​ແຫ່ງ​ຊາດ​ລາວ ທັງ​ເປັນ​ປະ­ທານ​ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ຈຳ­ກັດ ແລະ ບໍ­ລິ­ສັດ ເຄ​ພີ ຈຳ­ກັດ ໄດ້​ຮັບ​ການ​ປະ­ດັບ​ຫຼຽນ​ກຽດ­ຕິ­ຍົດ ລະ­ດັບ​ຂັ້ນ 3 ຈາກ​ອົງ​ຈັກ­ກະ­ພັດ​ແຫ່ງ​ປະ­ເທດ​ຍີ່­ປຸ່ນ ຫຼື Order Of the Rising Sun Gold with Rosette ໃນ​ວັນ​ທີ 26 ມັງ­ກອນ 2019 ທີ່​ເຮືອນ​ພັກ​ຂອງ​ທ່ານ​ທູດ​ຍີ່­ປຸ່ນ ປະ­ຈຳ​ລາວ.

    ທ່ານ ທາ​ເຄ​ຊິ ຮິ​ຄິ​ຮາ​ຣະ ທູດ​ຍີ່­ປຸ່ນ ປະ­ຈຳ​ລາວ ກ່າວ​ວ່າ: ຫຼຽນ​ນີ້​ເປັນ​ຫຼຽນ​ພະ​ຣາ​ຊະ​ທານ​ຈາກ​ອົງ​ຈັກ­ກະ­ພັດ​ຍີ່­ປຸ່ນ ເຊິ່ງ​ຄັດ​ເລືອກ​ຈາກ​ບຸກ­ຄົນ​ທີ່​ໄດ້​ປະ­ກອບ­ສ່ວນ​ທາງ​ທຸ­ລະ​ກິດ ແລະ ສັງ­ຄົມ​ລະ­ຫວ່າງ​ຍີ່­ປຸ່ນ ແລະ ລາວ ສະ­ນັ້ນ ຈຶ່ງ​ຂໍ​ສະ­ແດງ​ຄວາມ​ຊົມ­ເຊີຍ​ຕໍ່​ທ່ານ ເຂັມ​ຊາດ ພິ­ລາ​ພັນ​ເດ​ຊ ທີ່​ໄດ້​ປະ­ກອບ­ສ່ວນ​ອັນ​ໃຫຍ່​ຫຼວງ ເຂົ້າ​ໃນ​ການ​ເສີມ​ສ້າງ​ຄວາມ​ເຂັ້ມ­ແຂງ ໃຫ້​ແກ່​ການ​ແລກ­ປ່ຽນ​ທາງ​ເສດ­ຖະ­ກິດ​ລະ­ຫວ່າງ​ຍີ່­ປຸ່ນ-ລາວ ແລະ ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ລະ­ຫວ່າງ 2 ຊາດ ໂດຍ​ຜ່ານ​ການ​ສົ່ງ­ເສີມ​ກີ­ລາ​ຢູ​ໂດ (ສິ­ລະ​ປະ​ປ້ອງ​ກັນ​ຕົວ​ຂອງ​ຍີ່­ປຸ່ນ) ໃຫ້​ນັກ­ກີ­ລາ​ໃນ​ລາວ​ຕະ­ຫຼອດ​ໄລ­ຍະ​ທີ່​ຜ່ານ​ມາ ຈົນ​ມາ​ເຖິງ​ປັດ­ຈຸ­ບັນ​ມີ​ທ່າ​ກ້າວ​ທີ່​ພົ້ນ​ເດັ່ນ ແລະ ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ກວ້າງ­ຂວາງ.

    ທ່ານ ເຂັມ​ຊາດ ພິ­ລາ​ພັນ​ເດ​ຊ ໄດ້​ສົ່ງ­ເສີມ​ກີ­ລາ​ຢູ​ໂດ​ມາ​ເປັນ​ເວ­ລາ​ຫຼາຍ​ປີ ແລະ ໄດ້​ປະ­ຕິ­ບັດ​ໜ້າ­ທີ່​ເປັນ​ປະ­ທານ​ສະ­ຫະ­ພັນ​ຢູ​ໂດ​ແຫ່ງ​ຊາດ​ລາວ ມາ​ແຕ່​ປີ 2004 ແລະ ປີ 2012 ທ່ານ​ໄດ້​ມີ​ໂອ­ກາດ​ຕ້ອນ­ຮັບ ອົງ​ມົງ​ກຸດ​ຣາ​ຊະ​ກຸມ­ມານ​ແຫ່ງ​ຍີ່­ປຸ່ນ ໃນ​ລະ­ຫວ່າງ​ທີ່​ພະ​ອົງ​ສະ­ເດັດ​ຢ້ຽມ­ຢາມ​ລາວ​ຢ່າງ​ເປັນ​ທາງ​ການ ທີ່​ສູນ​ກີ­ລາ​ບູ​ໂດ ນະ­ຄອນ­ຫຼວງ​ວຽງ​ຈັນ ເພື່ອ​ສາ­ທິດ​ທັກ​ສະ​ກີ­ລາ​ຢູ​ໂດ ນອກ​ນັ້ນ ປີ 2014 ທ່ານ ເຂັມ​ຊາດ ພະ​ລາ​ພັນ​ເດ​ຊ ຍັງ​ໄດ້​ຮັບ​ໃບ​ຍ້ອງ­ຍໍ​ຈາກ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ຍີ່­ປຸ່ນ ຜົນ­ງານ​ການ​ປະ­ກອບ­ສ່ວນ​ອັນ​ມີ­ຄ່າ​ເຂົ້າ​ໃນ​ການ​ສົ່ງ­ເສີມ​ມິດ­ຕະ­ພາບ ແລະ ຄວາມ​ເຂົ້າ­ໃຈ​ຮ່ວມ​ກັນ​ລະ­ຫວ່າງ​ປະ­ຊາ­ຊົນ​ຍີ່­ປຸ່ນ ແລະ ລາວ ໂດຍ​ຜ່ານ​ການ​ສົ່ງ­ເສີມ​ກີ­ລາ​ຢູ​ໂດ​ໃນ​ລາວ​ເປັນ­ຕົ້ນ​ຕໍ.

ຂ່າວທີ່ກ່ຽວຂ້ອງ