ຂ່າວຫຼ້າສຸດ

ປະທານ​ສະພາ​ແຫ່ງ​ຊາດ​ມົງ​ໂກນ ຖືກ​ປົດ​ຕຳແໜ່ງ

398 31 ມ.ກ. 2019 ຂ່າວຕ່າງປະເທດ
ປະທານ​ສະພາ​ແຫ່ງ​ຊາດ​ມົງ​ໂກນ ຖືກ​ປົດ​ຕຳແໜ່ງ

    ຂ່າວສານ​ຊິນ​ຮວາ ລາຍ​ງານ​ວ່າ ໃນ​ການ​ປະຊຸມ​ນັດ​ພິເສດ ເມື່ອ​ວັນ​ທີ 29 ມັງກອນ​ນີ້ ສະພາ​ແຫ່ງ​ຊາດ​ມົງ​ໂກນ ໄດ້​ປະກາດ​ປົດ​ທ່ານ ມີ​ເຢ​ກົມ​ໂບ ເອນ​ຄະ​ໂບດ (Miyegombo Enkhbold) ອອກ​ຈາກ​ການ​ເປັນ​ປະທານ​ສະພາ​ແຫ່ງ​ຊາດ.

    ຮ່າງ​ມະຕິ​ກ່ຽວ​ກັບ​ການ​ສະເໜີ​ປົດ​ຕຳແໜ່ງ​ທ່ານ ເອນ​ຄະ​ໂບດ ແມ່ນ​ຍ້ອນ​ການ​ກ່າວ​ຫາ ການ​ສວາຍ​ໃຊ້​ສິດ​ອຳນາດ ຈາກ​ການ​ໄດ້​ຮັບ​ສຽງ​ສະໜັບສະໜູນ​ຂອງ 66,2% ຈາກ​ຈຳນວນ​ສະມາຊິກ ສະພາ​ແຫ່ງ​ຊາດ​ຂອງ​ມົງ​ໂກນ ທີ່​ປະກອບ​ມີ 76 ທີ່​ນັ່ງ.

    ມີ​ສະມາຊິກ​ສະພາ​ແຫ່ງ​ຊາດ​ກວ່າ​ເຄິ່ງ​ໜຶ່ງ ຫຼື 39 ຄົນ ໄດ້​ນຳ​ສະເໜີ​ຮ່າງ​ມະຕິ​ດັ່ງກ່າວ ຫຼັງ​ຈາກ​ທີ່​ຮ່າງ​ກົດໝາຍ​ດັດແກ້​ສະບັບ​ໜຶ່ງ ວ່າ​ດ້ວຍ​ຮູບ​ການ​ຂອງ​ປະທານ​ສະພາ​ແຫ່ງ​ຊາດ ມີ​ຜົນ​ບັງຄັບ​ໃຊ້ ນັບ​ແຕ່​ວັນ​ທີ 29 ມັງກອນ​ນີ້​ເປັນຕົ້ນ​ໄປ. ກົດໝາຍ​ສະບັບ​ດັດແກ້​ນີ້ ລະບຸ​ວ່າ ປະທານ​ສະພາ​ແຫ່ງ​ຊາດ​ຕ້ອງ​ລາ​ອອກ​ຈາກ​ຕຳແໜ່ງ ຖ້າ​ຫາ​ກວ່າ​ກວ່າ​ເຄິ່ງ​ໜຶ່ງ ຈາກ​ຈຳນວນ​ສະມາຊິກ ສະພາ​ແຫ່ງ​ຊາດ 76 ຄົນ ນຳ​ສະເໜີ​ໃຫ້​ເຂົາ​ຕ້ອງ​ລາ​ອອກ​ໄປ.

    ການ​ບັນທຶກ​ສຽງ ທີ່​ໄດ້​ຮັບ​ການ​ເປີດເຜີຍ​ເມືອ​ປີ​ກາຍ ຊີ້​ໃຫ້​ເຫັນ​ວ່າ ເຈົ້າ​ໜ້າທີ່​ຈຳນວນ​ໜຶ່ງ ຂອງ​ພັກ​ປະຊາຊົນ​ມົງ​ໂກນ ທີ່​ເປັນ​ພັກ​ກຳ​ອຳນາດ ໃນ​ນັ້ນ​ມີ​ທ່ານ ເອນ​ຄະ​ໂບດ ຖື​ວ່າ​ໄດ້​ສວາຍ​ໃຊ້ ຖານະ​ຕຳແໜ່ງ​ຂອງ​ເຂົາເຈົ້າ​ຢູ່​ໃນ​ລັດຖະບານ ເປັນ​ເຄື່ອງມື​ເພື່ອ​ເຂົ້າ​ຮ່ວມ​ການ​ເລືອກ​ຕັ້ງ ສະພາ​ແຫ່ງ​ຊາດ ເມື່ອ​ປີ 2016.

ຂ່າວທີ່ກ່ຽວຂ້ອງ