ຂ່າວຫຼ້າສຸດ

ມຽນ​ມາ​ປະກາດ​ໃຫ້​ເງິນ​ຢວນ ແລະ​ເງິນ​ເຢນ ເປັນ​ເງິນຕາ​ຊຳລະ​ທາງ​ການ

995 01 ກ.ພ. 2019 ຂ່າວຕ່າງປະເທດ
ມຽນ​ມາ​ປະກາດ​ໃຫ້​ເງິນ​ຢວນ ແລະ​ເງິນ​ເຢນ ເປັນ​ເງິນຕາ​ຊຳລະ​ທາງ​ການ

    ທະນາຄານ​ກາງ​ມຽນ​ມາ ໄດ້​ອອກ​ແຈ້ງ​ການ​ໃນ​ວັນ​ທີ 30 ມັງກອນ​ທີ່​ຜ່ານ​ມາ ໂດຍ​ລະບຸ​ວ່າ ຈະ​ໃຫ້​ເງິນ​ຢວນ (ສະກຸນ​ເງິນ​ຂອງ​ຈີນ) ແລະ ​ເງິນ​ເຢນ (ສະກຸນ​ເງິນ​ຂອງ​ຍີ່ປຸ່ນ) ເປັນ​ເງິນຕາ​ຊຳລະ​ສະ​ສາງ​ທາງ​ການ​ຂອງ​ປະເທດ​ຕົນ.

    ທະນາຄານ​ກາງ​ມຽນ​ມາ ໄດ້​ລະບຸ​ໃນ​ແຈ້ງ​ການ​ດັ່ງກ່າວ​ວ່າ ເພື່ອ​ຊຸກຍູ້​ການ​ພັດທະນາ​ດ້ານ​ການ​ຊຳລະ​ສະ​ສາງ​ກັບ​ສາກົນ ແລະ​ການ​ພັດທະນາ​ການ​ຄ້າ​ຊາຍ​ແດນ ຈຶ່ງ​ອະນຸຍາດ​ໃຫ້​ຖື​ເອົາ​ເງິນ​ຢວນ ແລະ​ເງິນ​ເຢນ ເປັນ​ເງິນຕາ​ຊຳລະ​ສະ​ສາງ​ສາກົນ. ນອກຈາກ​ທະນາຄານ​ທີ່​ໄດ້​ຮັບ​ການ​ອະນຸຍາດ​ແລ້ວ ແມ່ນ​ຫ້າມ​ບໍ່​ໃຫ້​ອົງ​ການຈັດຕັ້ງ​ອື່ນໆ ແລະ​ສ່ວນ​ບຸກຄົນ​ເປີດ​ບັນຊີ​ເງິນ​ຢວນ ແລະ​ເງິນ​ເຢັນ ເປັນ​ການ​ຊົ່ວຄາວ.

    ເຈົ້າ​ໜ້າທີ່​ທະນາຄານ​ກາງ​ມຽນ​ມາ​ທ່ານ​ໜຶ່ງ ໄດ້​ກ່າວ​ໃນ​ຂະນະ​ທີ່​ໃຫ້​ສຳພາດ​ຕໍ່​ນັກ​ຂ່າວ​ຂ່າວສານ​ຊິນ​ຮວາ ວ່າ​ພາຍຫຼັງ​ເງິນ​ຢວນ​ຖືກ​ກຳນົດ​ໃຫ້​ເປັນ​ເງິນຕາ​ຊຳລະ​ສະ​ສາງ​ແລ້ວ ການ​ຊຳລະ​ສະ​ສາງ​ການ​ຄ້າ​ຊາຍ​ແດນ​ມຽນ​ມາ-ຈີນ ຈະ​ສະດວກ​ສະບາຍ​ຫຼາຍ​ຂຶ້ນ​ກວ່າ​ເກົ່າ.

    ຈີນ ແລະ ມຽນ​ມາ​ຕ່າງ​ກໍ​ເປັນ​ຄູ່​ຮ່ວມ​ມື​ການ​ຄ້າ​ທີ່​ສຳຄັນ​ຂອງ​ກັນ​ ແລະ ​ກັນ. ແຕ່​ກ່ອນ ມຽນ​ມາ​ໄດ້​ອະນຸຍາດ​ໃຫ້​ຖື​ເອົາ​ເງິນ​ເອີ​ໂຣ ໂດ​ລາ​ສະຫະລັດ ແລະ ໂດ​ລາ​ສິງກະໂປ ເປັນ​ເງິນຕາ​ຊຳລະ​ສະ​ສາງ​ທາງ​ການ​ຂອງ​ປະເທດ​ຕົນ​ມາ​ແລ້ວ.

ຂ່າວທີ່ກ່ຽວຂ້ອງ