ຂ່າວ​ສັ້ນ

903 01 ກ.ພ. 2019 ຂ່າວຕ່າງປະເທດ
ຂ່າວ​ສັ້ນ

     ສ ອາ​ເມ​ຣິ​ກາ: ແຫຼ່ງ​ຂ່າວ​ຈາກ​ທີ່​ເກີດ​ເຫດ ໃຫ້​ຮູ້​ວ່າ ຜູ້​ປະ​ທ້ວງ​ຄົນ​ໜຶ່ງ ໄດ້​ໂດດ​ໃສ່​ຕໍ່ໜ້າ​ຂະ​ບວນ​ລົດ​ຄຸ້ມ​ກັນ​ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ເຮັດ​ໃຫ້​ນາຍ​ທະຫານ​ຜູ້​ໜຶ່ງ ທີ່​ຂຶ້ນ​ກັບ​ອົງການ​ປະຕິບັດ​ງານ​ປິດ​ລັບ ໃນ​ການ​ປົກ​ປ້ອງ​ປະທານາທິບໍດີ ຕ້ອງ​ໄດ້​ປະ​ເຊີນ​ໜ້າ​ກັບ​ເປົ້າ​ໝາຍ​ດັ່ງກ່າວ ແລະ​ທັງ​ສອງ​ຄົນ​ໄດ້​ຖືກ​ຕຳ​ໂດຍ​ລົດ​ຄຸ້ມ​ກັນ​ປະທານາທິບໍດີ. ເຫດການ​ດັ່ງກ່າວ ເກີດ​ຂຶ້ນ​ຢູ່​ດ້ານ​ນອກ​ທຳ​ນຽບ​ຂາວ ໃນ​ວັນ​ທີ 30 ມັງກອນ​ທີ່​ຜ່ານ​ມາ.

 ຈີນ: ເຈົ້າ​ໜ້າທີ່​ດັບ​ເພີງ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 8 ຄົນ ແລະ​ບາດເຈັບ​ອີກ 3 ຄົນ ຈາກ​ເຫດການ​ລະເບີດ​ລາຍ​ໜຶ່ງ ແລະ​ຕາ​ມາ​ກໍ​ເກີດ​ໄຟ​ໄໝ້ ຍ້ອນ​ແກ​​ັສ​ຮົ່ວ​ໄຫຼ ຊຶ່ງ​ເກີດ​ຂຶ້ນ ເມື່ອ​ວັນ​ທີ 30 ມັງກອນ​ທີ່​ຜ່ານ​ມາ ຢູ່​ໃນ​ເຂດ​ເຮືອນ​ຫ້ອງ​ແຖວ ໃນ​ເມືອງ​ເອກ​ຂອງ​ແຂວງ ຈີ້​ຫຼິນ (ຈີນ) ໂດຍ​ທີ່​ເຫດ​ລະເບີດ​ເກີດ​ຂຶ້ນ​ຢູ່​ຊັ້ນ​ທີ 4 ຂອງ​ອາຄານ.

   ຈີ​ບູ​ຕີ: ອົງການ​ຍ້າຍ​ຖິ່ນ​ຖານ​ສາກົນ (IOM) ແຈ້ງ​ໃຫ້​ຮູ້ເມື່ອ​ວັນ​ທີ 30 ມັງກອນ​ທີ່​ຜ່ານ​ມາ ວ່າ​ໄດ້​ຊ່ວຍເຫຼືອ​ຜູ້​ປະສົບ​ເຄາະ​ຮ້າຍ​ຂຶ້ນ​ມາ​ໄດ້ 16 ຄົນ ຈາກ​ເຫດການ​ເຮືອ​ຂອງ​ຜູ້​ຍ້າຍ​ຖິ່ນ​ຖານ ເກີດ​ຈົມ​ນ້ຳ​ຢູ່​ບໍລິເວນ​ນອກ​ຝັ່ງ​ທະເລ​ຂອງ​ຈີ​ບູ​ຕີ ເມື່ອ​ກ່ອນ​ໜ້າ​ນັ້ນ​ໜຶ່ງ​ວັນ. ໃນ​ຂະນະ​ດຽວ​ກັນ ກໍ​ໄດ້​ຄົ້ນ​ພົບ​ຮ່າງ​ຜູ້​ເສຍ​ຊີວິດ 38 ສົບ ແລະ ​ມີ​ອີກ​ປະມານ 100 ຄົນ ຍັງ​ຄົງ​ຫາຍ​ສາຍ​ສູນ.

  ອາ​ຟະ​ຣິກ​ກາ​ກາງ: ຂ່າວສານ AP ລາຍ​ງານ​ວ່າ ກອງ​ກຳລັງ​ຮັກສາ​ສັນຕິພາບ​ຂອງ ສະຫະ​ປະຊາ​ຊາດ ປະຈຳ​ສາທາລະນະ​ລັດ ອາ​ຟະ​ຣິກ​ກາ​ກາງ ແຈ້ງ​ໃຫ້​ຮູ້ເມື່ອ​ວັນ​ທີ 29 ມັງກອນ​ທີ່​ຜ່ານ​ມາ ວ່າ​ມີ​ສາມັນ​ຊົນ​ເສຍ​ຊີວິດ  18 ຄົນ ແລະ ​ບາດເຈັບ​ອີກ 23 ຄົນ ຫຼັງ​ຈາກ​ທີ່​ກຸ່ມ​ປະກອບ​ອາວຸດ​ຍິງ​ປືນ​ໃສ່​ງານ​ສົບ​ລາຍ​ໜຶ່ງ ຊຶ່ງ​ເກີດ​ຂຶ້ນ​ໃນ​ຄ່ຳ​ຄືນ​ຂອງ​ວັນ​ທີ 27 ມັງກອນ.

   ສາທາລະນະ​ລັດ ອາ​ຟະ​ຣິກ​ກາ​ກາງ ເປັນ​ໜຶ່ງ​ໃນ​ບັນດາ​ປະເທດ​ທີ່​ທຸກ​ຍາກ​ທີ່​ສຸດ​ໃນ​ໂລກ ແລະ ​ໄດ້​ປະ​ເຊີນ​ກັບ​ການ​ພິພາດ​ລະຫວ່າງ​ສາສະໜາ ແລະ​ ຊົນເຜົ່າ ມາ​ຕັ້ງແຕ່​ປີ 2013. ນັບ​ແຕ່​ປີ  2014 ເປັນຕົ້ນ​ມາ ສະຫະ​ປະຊາ​ຊາດ ໄດ້​ຜັນ​ຂະຫຍາຍ​ການ​ປະຕິບັດ​ໜ້າທີ່​ຂອງ​ທະຫານ ຈຳນວນ 15.500 ຄົນ ເພື່ອ​ປ້ອງ​ກັນ​ປະຊາຊົນ.

  ບັງ​ກລາ​ເດ​​ສ: ລົດ​ຂົນສົ່ງ​ຄັນ​ໜຶ່ງ ທີ່​ບັນທຸກ​ຖ່ານ​ຫີນ ໄດ້​ເກີດ​ເສຍ​ຫຼັກ ແລະ ​ແລ່ນ​ໄປ​ຕຳ​ໃສ່​ເຂດ ເຮືອນ​ພັກ​ຂອງ​ກຳມະກອນ ຢູ່​ໃນ​ໂຮງງານ​ດິນຈີ່​ແຫ່ງ​ໜຶ່ງ ໃນ​ເຂດ​ພາກ​ຕາເວັນ​ອອກ​ຂອງ​ບັງ​ກລາ​ເດ​​ສ ຊຶ່ງ​ເກີດ​ຂຶ້ນ​ໃນ​ເວລາ​ຮຸ່ງ​ເຊົ້າ​ຂອງ​ວັນ​ທີ 25 ມັງກອນ​ທີ່​ຜ່ານ​ມາ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 13 ຄົນ ແລະ ​ບາດເຈັບ​ສາຫັດ​ອີກ 2 ຄົນ.

ຂ່າວທີ່ກ່ຽວຂ້ອງ