U-12 ນະຄອນຫຼວງ ກຽມຮ່ວມເຕະບານນາໆຊາດ ຢູ່ໄທ

125 04 ກ.ພ. 2019 ວົງຈອນກີລາ
U-12 ນະຄອນຫຼວງ ກຽມຮ່ວມເຕະບານນາໆຊາດ ຢູ່ໄທ

    ສະ­ຫະ­ພັນ​ບານ­ເຕະ ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ເຕົ້າ­ໂຮມ​ຄະ­ນະ​ຄູ​ເຝິກ ພໍ່​ແມ່​ນັກ­ກີ­ລາ ແລະ ນັກ­ກີ­ລາ ໃນ​ຮຸ່ນ​ອາ­ຍຸ​ບໍ່​ເກີນ 12 ປີ ເມື່ອ​ວັນ​ທີ 28 ມັງ­ກອນ 2019 ຜ່ານ​ມາ ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ນະ­ຄອນ­ຫຼວງ​ວຽງ​ຈັນ ຊຸດ​ກຽມ​ສົ່ງ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ ລາຍ­ການ​ພິ­ເສດ ຊີງ​ຂັນ​ນາໆຊາດ ຈະ​ຈັດ​ຂຶ້ນ​ຢູ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ມີ​ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ບານ­ເຕະ ນະ­ຄອນ­ຫຼວງ​ວຽງ​ຈັນ ມີ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ ພໍ່​ແມ່​ຜູ້​ປົກ­ຄອງ​ນັກ­ກີ­ລາ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ວຽງ​ສະ­ຫວັນ ແສງ​ຈັນ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ນະ­ຄອນ­ຫຼວງ​ວຽງ​ຈັນ ໄດ້​ຮັບ​ກຽດ​ຖືກ​ເຊີນ​ເຂົ້າ​ຮ່ວມ​ແຂ່ງ­ຂັນ​ມາ​ແລ້ວ 2 ຄັ້ງ ໂດຍ​ແມ່ນ​ທະ­ຫານ​ໄທ ຮັບ​ກຽດ​ເປັນ​ເຈົ້າ­ພາບ​ຈັດ​ແຂ່ງ­ຂັນ ປີ​ກາຍ​ນີ້​ກໍ​ໄດ້​ເຂົ້າ​ຮ່ວມ​ແຂ່ງ­ຂັນ​ໃນ​ຮຸ່ນ​ອາ­ຍຸ​ບໍ່​ເກີນ 14 ປີ ມີ 5 ປະ­ເທດ​ເຂົ້າ​ຮ່ວມ ແລະ ສາ­ມາດ​ຍາດ​ໄດ້​ອັນ​ດັບ​ທີ 2 ແລະ ປີ​ນີ້ ກໍ​ຖືກ​ເຊີນ​ອີກ ທາງ​ເຈົ້າ­ພາບ​ຈະ​ຈັດ​ແຂ່ງ­ຂັນ​ໃນ​ຮຸ່ນ​ເຍົາ­ວະ​ຊົນ​ອາ­ຍຸ 12 ປີ ໂດຍ​ມີ​ຈຸດ­ປະ­ສົງ​ເປົ້າ​ໝາຍ​ຫຼັກ ກໍ​ເພື່ອ​ຢາກ​ສົ່ງ­ເສີມ​ນັກ­ກີ­ລາ​ເຍົາ­ວະ​ຊົນ​ຂອງ​ແຕ່​ລະ​ຊາດ ມີ​ການ​ພັດ­ທະ­ນາ​ທີ່​ໂດດ​ເດັ່ນ​ກວ່າ​ເກົ່າ ສາ­ມາດ​ກ້າວ​ໄປ​ເປັນ​ນັກ­ກີ­ລາ​ລະ­ດັບ​ອາ­ຊີບ ໃນ​ອະ­ນາ­ຄົດ ລາຍ­ການ​ນີ້ ໂດຍ​ຄາດ​ວ່າ​ຈະ​ມີ 8 ປະ­ເທດ​ເຂົ້າ​ຮ່ວມ ຈະ​ຈັດ​ຂຶ້ນ​ລະ­ຫວ່າງ​ວັນ​ທີ 12-13 ມີ­ນາ 2019.

    ການ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ນີ້ ສະ­ຫະ­ພັນ​ບານ­ເຕະ ນະ­ຄອນ­ຫຼວງ​ວຽງ​ຈັນ ຈະ​ສົ່ງ​ຄະ­ນະ​ນຳ 2 ຄົນ ຄູ​ເຝິກ 2 ຄົນ ນັກ​ຂ່າວ 1 ຄົນ ແລະ ນັກ­ກີ­ລາ 25 ຄົນ ເຂົ້າ​ຮ່ວມ​ແຂ່ງ­ຂັນ ແລະ ໄດ້​ໃຫ້​ນັກ­ກີ­ລາ​ໄດ້​ລົງ​ເຝິກ­ຊ້ອມ​ເປັນ​ປະ­ຈຳ​ໃນ​ວັນ​ຈັນ ຫາ ວັນ​ສຸກ ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ.

ຂ່າວທີ່ກ່ຽວຂ້ອງ