ສ ອາ​ເມ​ຣິ​ກາ ແຈ້ງ​ໃຫ້​ຣັດ​ເຊຍ​ຮູ້​ຢ່າງ​ເປັນ​ທາງ​ການ​ກ່ຽວ​ກັບ​ການ​ງົດ​ປະຕິບັດ INF

   ແຫຼ່ງ​ຂ່າວ Sputniknews ອ້າງ​ຕາມ​ຖະແຫຼງການ ຈາກ​ກະຊວງ​ການ​ຕ່າງປະເທດ​ຣັດ​ເຊຍ ໃຫ້​ຮູ້​ວ່າ ກະຊວງ​ການ​ຕ່າງປະເທດ ສ ອາ​ເມ​ຣິ​ກາ ໄດ້​ແຈ້ງ​ໃຫ້​ທາງ​ການ​ຣັດ​ເຊຍ​ຮູ້​ຢ່າງ​ເປັນ​ທາງ​ການ  ເມື່ອ​ວັນ​ທີ 2 ກຸມພາ​ນີ້ ກ່ຽວ​ກັບ​ການ​ງົດ​ປະຕິບັດ​ພັນທະ​ຕ່າງໆ ຕາມ​ສົນທິສັນຍາ​ບັນດາ​ກອງ​ກຳລັງ​ນີວ​ເຄລຍ​ຂະໜາດ​ກາງ (INF) ແບບ​ສອງ​ຝ່າຍ ທີ່​ໄດ້​ມີ​ມາ​ຕັ້ງແຕ່​ປີ 1987  ແລະ ເລີ່ມ​ການ​ປະກອບ​ເອກະສານ ກ່ຽວ​ກັບ​ການ​ຖອນ​ອອກ​ຈາກ​ສົນທິສັນຍາ​ນີ້.

    ກະຊວງ​ການ​ຕ່າງປະເທດ​ຣັດ​ເຊຍ ເນັ້ນ​ໜັກ​ວ່າ ຣັດ​ເຊຍ​ຈະ​ນຳ​ເອົາ​ທຸກໆ​ມາດ​ຕະການ​ທີ່​ຈຳເປັນ​ອອກ​ມາ ເພື່ອ​ປ້ອງ​ກັນ​ຄວາມ​ສະຫງົບ​ຂອງ​ຣັດ​ເຊຍ ກໍ​ຄື​ມີ​ສິດ​ໃນ​ການ​ນຳ​ເອົາ​ການ​ດຳເນີນ​ການ “ມີ​ມາ​ກໍ​ມີ​ໄປ” ໃນ​ການ​ຜັນ​ຂະຫຍາຍ​ລູກ​ສອນ​ໄຟ​ຂະໜາດ​ໃກ້ ແລະ ຂະໜາດ​ກາງ​ຢູ່​ເທິງ​ໜ້າດິນ.

ຖະແຫຼງການ​ຂອງ​ກະຊວງ​ການ​ຕ່າງປະເທດ​ຣັດ​ເຊຍ ໃຫ້​ຮູ້​ວ່າ ຣັດ​ເຊຍ​ໄດ້​ມີ​ມາດ​ຕະການ​ທີ່​ໂປ່ງ​ໃສ​ຢ່າງ​ບໍ່​ເຄີຍ​ມີ​ມາ​ກ່ອນ ຊຶ່ງ​ພົວພັນ​ເຖິງ​ສົນທິສັນຍາ INF ແຕ່​ວ່າ​ທຸກໆ​ຄວາມ​ພະຍາຍາມ ຕ່າງ​ກໍ​ຖືກ​ເມີນ​ເສຍ ແລະ​ກັດ​ກັ້ນ​ຈາກ​ຝ່າຍ ສ ອາ​ເມ​ຣິ​ກາ. ເຖິງ​ຢ່າງໃດ​ກໍ​ຕາມ ກະຊວງ​ການ​ຕ່າງປະເທດ ຣັດ​ເຊຍ ໄດ້​ຊີ້​ແຈງ​ວ່າ ຣັດ​ເຊຍ ຍັງ​ມີ​ທີ່​ຫວ່າງ​ສຳລັບ​ການ​ເຈລະຈາ​ກ່ຽວ​ກັບ​ສົນທິສັນຍາ​ດັ່ງກ່າວ ໂດຍ​ອີງໃສ່​ຄວາມ​ນັບຖື​ຊຶ່ງ​ກັນ​ແລະ ກັນ.

    ກ່ອນ​ໜ້າ​ນັ້ນ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແລະ​ລັດຖະມົນຕີ​ການ​ຕ່າງປະເທດ ສ ອາ​ເມ​ຣິ​ກາ ໄມ ພອມ​ເປ​ໂອ ຖະແຫຼງ​ເມື່ອ​ວັນ​ທີ 1 ກຸມພາ​ນີ້​ວ່າ ນັບ​ແຕ່​ວັນ​ທີ 2 ກຸມພາ​ນີ້​ເປັນຕົ້ນ​ໄປ ສ ອາ​ເມ​ຣິ​ກາ ງົດ​ບັນດາ​ຄຳ​ສັນຍາ​ຂອງ​ຕົນ​ເປັນ​ການ​ຊົ່ວຄາວ ສຳລັບ​ໃນ​ຂອບ​ຂອງ INF ແລະ​ຫຼັງ​ຈາກ​ນັ້ນ 6 ເດືອນ​ກໍ​ຈະ​ຖອນ​ອອກ​ຈາກ​ສົນທິສັນຍາ​ນີ້ ຖ້າ​ຫາ​ກວ່າ​ຣັດ​ເຊຍ​ບໍ່​ມີ​ປະຕິກິລິຍາ​ໃດໆ ເພື່ອ​ກັບ​ຄືນ​ສູ່​ການ​ປະຕິບັດ​ສົນທິສັນຍາ​ນັ້ນ.

    ທາງ​ດ້ານ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ກ່າວ​ຢູ່​ໃນ​ການ​ປະຊຸມ​ກັບ​ລັດຖະມົນຕີ​ການ​ຕ່າງປະເທດ ແລະ​ລັດຖະມົນຕີ​ປ້ອງ​ກັນ​ປະເທດ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 2 ກຸມພາ​ນີ້​ວ່າ ຣັດ​ເຊຍ ຕົກລົງ​ງົດ​ປະຕິບັດ INF ເພື່ອ​ຕອບ​ໂຕ້​ຕໍ່​ການ​ຕົກລົງ​ໃນ​ທຳນອງ​ດຽວ​ກັນ​ນີ້ ຈາກ​ຝ່າຍ ສ ອາ​ເມ​ຣິ​ກາ. ປະທານາທິບໍດີ ປູ​ຕິນ ໃຫ້​ຮູ້​ວ່າ ຣັດ​ເຊຍ​ຈະ​ລົງມື​ຜະລິດ​ລູກ​ສອນ​ໄຟ​ໃໝ່ ໃນ​ນັ້ນ​ມີ​ລູກ​ສອນ​ໄຟ​ໄປ​ໄດ້​ໄວ​ກວ່າ​ສຽງ ພ້ອມ​ກັນ​ນັ້ນ​ກໍ​ຊີ້​ນຳ​ຕໍ່​ລັດຖະມົນຕີ​ປ້ອງ​ກັນ​ປະເທດ ແລະ​ລັດຖະມົນຕີ​ການ​ຕ່າງປະເທດ​ຣັດ​ເຊຍ ວ່າ​ບໍ່​ໃຫ້​ດຳເນີນ​ການ​ເຈລະຈາ​ກັບ ສ ອາ​ເມ​ຣິ​ກາ ກ່ຽວ​ກັບ​ການ​ຫຼຸດຜ່ອນ​ອາວຸດ.

    ການ​ນຳ​ຂອງ ສ ອາ​ເມ​ຣິ​ກາ ແລະ ການ​ນຳ​ຂອງ​ອະດີດ ສ ໂຊ​ວຽດ ໄດ້​ຮ່ວມ​ກັນ​ລົງ​ນາມ INF ເມື່ອ​ວັນ​ທີ 8 ທັນວາ ປີ 1987 ແລະ ​ມີ​ຜົນ​ບັງຄັບ​ໃຊ້​ຢ່າງ​ເປັນ​ທາງ​ການ ນັບ​ແຕ່​ວັນ​ທີ 1 ມິຖຸນາ ປີ 1988 ເປັນຕົ້ນ​ມາ.  INF ລະບຸ​ວ່າ ສອງ​ຝ່າຍ​ໃຫ້​ສັນຍາ​ບໍ່​ຜະລິດ ບໍ່​ທົດ​ລອງ ບໍ່​ຜັນ​ຂະຫຍາຍ ບັນດາ​ລູກ​ສອນ​ໄຟ​ນຳ​ວິຖີ ແລະ​ ລູກ​ສອນ​ໄຟ​ເຄື່ອນ​ທີ່​ເທິງ​ໜ້າດິນ ໃນ​ຂະໜາດ​ກາງ ແລະ​ຂະໜາດ​ໃກ້ (ແຕ່ 500-5.500​ກມ).

    ເມື່ອ​ເດືອນ​ຕຸລາ ປີ 2018 ປະທານາທິບໍດີ ທຣຳ ກ່າວ​ຫາ​ຣັດ​ເຊຍ ວ່າ​ລະເມີດ​ສົນທິສັນຍາ INF ເມື່ອ​ຜະລິດ​ລູກ​ສອນ​ໄຟ Novator 9M729. ມາ​ໃນ​ເດືອນ​ທັນວາ ປີ 2018 ສ ອາ​ເມ​ຣິ​ກາ ປະກາດ​ຈະ​ຖອນ​ອອກ​ຈາກ​ສັນ​ທິ​ສັນຍາ​ນີ້ ຖ້າ​ຫາ​ກວ່າ​ຣັດ​ເຊຍ​ບໍ່​ກັບ​ມາ​ປະຕິບັດ​ຂໍ້​ຕົກລົງ​ດັ່ງກ່າວ ພາຍ​ໃນ​ຮອບ​ເວລາ 60 ວັນ ໝາຍ​ຄວາມ​ວ່າ​ມີ​ເສັ້ນ​ຕາຍ​ໃນ​ວັນ​ທີ 2 ກຸມພາ​ນີ້. ເຖິງ​ຢ່າງໃດ​ກໍ​ຕາມ ຣັດ​ເຊຍ​ກໍ​ບໍ່​ກຳຈັດ Novator 9M729 ຢ່າງ​ເດັດຂາດ ພ້ອມ​ທັງ​ຢືນຢັນ​ວ່າ ລູກ​ສອນ​ໄຟ​ນີ້ ບໍ່​ລະເມີດ  INF.