ກາຕາ ຄວ້າແຊັມເອຊຽນຄັບ ຄັ້ງປະຫວັດສາດ

142 05 ກ.ພ. 2019 ວົງຈອນກີລາ
ກາຕາ ຄວ້າແຊັມເອຊຽນຄັບ ຄັ້ງປະຫວັດສາດ

    ການ​ແຂ່ງ­ຂັນ​ເຕະ­ບານ​ຊາຍ ຊີງ​ແຊັມ​ອາ­ຊີ ຫຼື ເອ​ຊຽນ​ຄັບ 2019 ທີ່​ປະ­ເທດ​ສະ­ຫະ­ລັດ​ອາ​ຣັບ​ເອ​ມີ​ເຣດ (UAE) ເປັນ​ເຈົ້າ­ພາບ ໃນ​ຮອບ​ຊີງ​ຊະ­ນະ​ເລີດ​ວັນ​ທີ 1 ກຸມ­ພາ 2019 ທີມ​ຊາດ​ຍີ່­ປຸ່ນ ແຊັມ​ສູງ​ສຸດ 4 ສະ­ໄໝ ພົບ​ກັບ​ທີມ​ຊາດ​ກາ​ຕາ ເຈົ້າ­ພາບ​ບານ​ໂລກ​ປີ 2022 ທີ່​ສ້າງ​ປະ­ຫວັດ​ເຂົ້າ​ຮອບ 4 ທີມ ສຸດ​ທ້າຍ​ຄັ້ງ​ທຳ​ອິດ ແລະ ເຂົ້າ​ສູ່​ຮອບ​ຊີງ​ຄັ້ງ​ທຳ​ອິດ​ໃນ​ປີ​ນີ້ ນອກ​ນີ້​ຍັງ​ເປັນ​ທີມ​ດຽວ ທີ່​ບໍ່​ເສຍ​ປະ­ຕູ​ໃນ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ.

    ນັດ​ນີ້ ເປັນ​ການ​ພົບ​ກັນ​ຄັ້ງ​ທີ 5 ໃນ​ເອ​ຊຽນ​ຄັບ​ຂອງ​ສອງ​ທີມ ໂດຍ 4 ຄັ້ງ​ຜ່ານ​ມາ ແມ່ນ​ປ່ຽນ​ກັນ​ຊະ­ນະ​ຝ່າຍ​ລະ​ຄັ້ງ ແລະ ສະ­ເໝີ 2 ຄັ້ງ ຫຼ້າ​ສຸດ​ພົບ​ກັນ​ໃນ​ເອ​ຊຽນ​ຄັບ ປີ 2011 ທີ່​ກາ​ຕາ ເປັນ​ເຈົ້າ­ພາບ ຮອບ 8 ທີມ​ສຸດ​ທ້າຍ ຍີ່­ປຸ່ນ ຊະ­ນະ 3-2 ແລະ ພົບ​ກັນ 5 ນັດ​ຫຼັງ​ສຸດ ຍີ່­ປຸ່ນ ບໍ່​ເຄີຍ​ເສຍ ໂດຍ​ຊະ­ນະ 3 ນັດ ແລະ ສະ­ເໝີ 2 ນັດ.

    ຍີ່­ປຸ່ນ​ເຂົ້າ​ຊີງ​ເອ​ຊຽນ​ຄັບ 4 ຄັ້ງ ເປັນ​ແຊັມ​ທັງ 4 ຄັ້ງ ຂະ­ນະ​ທີ່ ກາ​ຕາ ເຂົ້າ​ຊີງ​ຫຼ້າ​ສຸດ​ແມ່ນ​ລາຍ­ການ Gulf Cup ເຂດ​ອາ​ຣັບ ປີ 2014 ຊະ­ນະ ຊາ​ອຸ​ດິ​ອາ​ຣາ​ບີ 2-1 ປະ­ຕູ ຜ່ານ​ການ​ແຂ່ງ­ຂັນ 90 ນາ­ທີ ທີມ​ກາ​ຕາ ສາ­ມາດ​ເອົາ​ຊະ­ນະ ທີມ​ຊາດ​ຍີ່­ປຸ່ນ 3-1 ຄອງ​ຂັນ​ແຊັມ​ເອ​ຊຽນ​ຄັບ​ຄັ້ງ​ທຳ​ອິດ ສ້າງ​ກຳ­ລັງ​ໃຈ ແລະ ຄວາມ​ໝັ້ນ​ໃຈ ກ່ອນ​ເປັນ​ເຈົ້າ­ພາບ​ບານ​ໂລກ 2022 ໄດ້​ຮັບ​ຂັນ​ແຊັມ ພ້ອມ​ເງິນ​ລາ­ງວັນ 5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 42,85 ຕື້​ກີບ ແລະ ໄດ້​ສິດ​ເປັນ​ຕົວ​ແທນ​ທະ­ວີບ­ອາ­ຊີ ເຂົ້າ​ຮ່ວມ​ຊີງ​ຂັນ FIFA Confederations Cup 2021 ທີ່​ຕົນ​ເອງ​ເປັນ​ເຈົ້າ­ພາບ ແຕ່ ກາ​ຕາ ໄດ້​ສິດ​ເຂົ້າ​ຮ່ວມ​ໃນ​ນາມ​ເປັນ​ເຈົ້າ­ພາບ​ແລ້ວ ຈຶ່ງ​ມອບ​ສິດ​ໃຫ້​ຮອງ​ແຊັມ ທີມ​ຊາດ​ຍີ່­ປຸ່ນ ເຂົ້າ​ຮ່ວມ​ເຊັ່ນ​ກັນ ສຳ­ລັບ​ຍີ່­ປຸ່ນ ໄດ້​ຮັບ 3 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 25,71 ຕື້​ກີບ.

    ລາ­ງວັນ​ນັກ​ເຕະ​ດີ­ເດັ່ນ MVP ແມ່ນ ອາ​ໂມ​ລ ອາ­ລີ ກອງ​ໜ້າ​ທີມ​ຊາດ​ກາ​ຕາ ພ້ອມ​ນີ້​ຍັງ​ລາ­ງວັນ​ດາວ​ຍິງ​ສູງ​ສຸດ ຍິງ​ໄດ້ 9 ປະ­ຕູ ຈາກ​ການ​ລົງ​ສະ­ໜາມ 7 ນັດ ຮັບ​ເງິນ​ລາ­ງວັນ 30.000 ໂດ​ລາ​ສະ­ຫະ­ລັດ ຫຼື ປະ­ມານ 257 ລ້ານ​ກີບ ລາ­ງວັນ​ຜູ້​ຮັກ­ສາ​ປະ­ຕູ​ດີ­ເດັ່ນ​ແມ່ນ ຊາ​ອັດ ອາວ​ຊິບ ທີມ​ຊາດ​ກາ​ຕາ ເສຍ​ພຽງ 1 ປະ­ຕູ ສ່ວນ​ລາ­ງວັນ​ທີມ​ມາ­ລະ­ຍາດ​ດີ­ເດັ່ນ​ເປັນ​ຂອງ​ທີມ​ຊາດ​ຍີ່­ປຸ່ນ.

ຂ່າວທີ່ກ່ຽວຂ້ອງ