ຍີ່ປຸ່ນ ອາດ​ໄດ້​ຮັບ​ຜົນ​ປະໂຫຍດ 48 ຕື້​ໂດ​ລາ ຈາກ​ສັນຍາ FTA ກັບ EU

571 05 ກ.ພ. 2019 ຂ່າວຕ່າງປະເທດ
ຍີ່ປຸ່ນ ອາດ​ໄດ້​ຮັບ​ຜົນ​ປະໂຫຍດ 48 ຕື້​ໂດ​ລາ ຈາກ​ສັນຍາ FTA ກັບ EU

     ວັນ​ທີ 1 ກຸມພາ​ນີ້ ຍີ່ປຸ່ນ ແລະ​ສະຫະພາບ​ເອີ​ຣົບ (EU) ໄດ້​ຈັດການ​ສະຫຼອງ​ການ​ທີ່​ສັນຍາ​ການ​ຄ້າ​ເສລີ (FTA) ລະຫວ່າງ​ສອງ​ຝ່າຍ ມີ​ຜົນ​ບັງຄັບ​ໃຊ້​ຢ່າງ​ເປັນ​ທາງ​ການ ໂດຍ​ເຈົ້າ​ໜ້າທີ່​ຂອງ​ທັງ​ສອງ​ຝ່າຍ ຕ່າງ​ກໍ​ຕັ້ງ​ຄວາມ​ຫວັງ​ໄວ້​ກັບ​ການ​ຮ່ວມ​ມື​ທາງ​ດ້ານ​ເສດຖະກິດ ແລະ​ ທຸລະ​ກິດ​ທີ່​ມີ​ຄວາມ​ສາມາດ​ບົ່ມ​ຊ້ອນ ຢູ່​ໃນ​ຕະຫຼາດ​ແຫ່ງ​ໃໝ່​ນີ້ ຊຶ່ງ​ປະກອບ​ມີ​ປະຊາກອນ​ລວມ​ກັນ 600 ລ້ານ​ກວ່າ​ຄົນ.

    ທ່ານ ໂຕ​ຊີ​ມິດ​ຊຸ ໂມ​ເຕ​ກິ ລັດຖະມົນຕີ​ນະໂຍບາຍ​ການ​ເງິນ ແລະ​ເສດຖະກິດ​ຂອງ​ຍີ່ປຸ່ນ ກ່າວ​ຫຼັງ​ຈາກ​ທີ່ FTA ລະຫວ່າງ​ຍີ່ປຸ່ນ ກັບ EU (ທີ່​ໄດ້​ຮັບ​ການ​ລົງ​ນາມ​ເມື່ອ​ເດືອນ​ກໍລະກົດ ປີ 2018) ໂດຍ​ມີ​ຜົນ​ບັງຄັບ​ໃຊ້ ນັບ​ແຕ່​ຄ່ຳ​ຄືນ​ຂອງ​ວັນ​ທີ 31 ມັງກອນ ເປັນຕົ້ນ​ໄປ​ນັ້ນ ວ່າ​ຈະ​ມີ​ບົດບາດ​ເປັນ​ຫົວ​ລົດໄຟ​ດ້ານ​ຄວາມ​ເຕີບ​ໂຕ ໃຫ້​ແກ່​ເສດຖະກິດ​ຍີ່ປຸ່ນ. ລັດຖະບານ​ຍີ່ປຸ່ນ ໃຫ້ການ​ຄາດ​ຄະເນ​ວ່າ ຂໍ້​ຕົກລົງ FTA ກັບ EU ຈະ​ນຳ​ຜົນ​ປະໂຫຍດ​ທາງ​ດ້ານ​ເສດຖະກິດ ທີ່​ປະມານ 5.200 ຕື້​ເຢນ (ເທົ່າ​ກັບ 48 ຕື້​ໂດ​ລາ​ສະຫະລັດ) ໃຫ້​ແກ່​ຍີ່ປຸ່ນ ແລະ ສ້າງ​ວຽກ​ເຮັດ​ງານ​ທຳ​ຂຶ້ນ​ມາ​ໄດ້ 290.000 ຕຳແໜ່ງ​ງານ.

   ທາງ​ດ້ານ​ທ່ານ ພາ​ຕຣີ​ເຊຍ ຟລໍ ເອກ​ອັກ​ຄະ​ລັດ​ຖະ​ທູດ​ຂອງ EU ປະຈຳ​ຍີ່ປຸ່ນ ເວົ້າ​ວ່າ ນີ້​ເປັນ​ວັນ​ໜຶ່ງ​ທີ່​ເປັນ​ປະຫວັດສາດ. ໃນ​ຂະນະ​ດຽວ​ກັນ ທ່ານ ເຈນ ຄລາວ ຈັງ​ເກີ ປະທານ​ຄະນະ​ກຳມະການ​ເອີ​ຣົບ ເວົ້າ​ວ່າ​ຂໍ້​ຕົກລົງ​ດັ່ງກ່າວ ຈະ​ເປັນ​ການ​ຊ່ວຍ​ໃຫ້​ຜູ້​ບໍລິໂພກ​ມີ​ທາງ​ເລືອກ​ຕື່ມ​ອີກ ໃນ​ການ​ຈັດ​ຊື້​ສິນຄ້າ​ທີ່​ມີ​ລາຄາ​ຖືກ​ກວ່າ ພ້ອມ​ກັນ​ນັ້ນ​ກໍ​ຊ່ວຍ​ປ້ອງ​ກັນ​ບັນດາ​ຜະລິດ​ຕະ​ພັນ​ຂອງ​ເອີ​ຣົບ​ຢູ່​ໃນ​ຍີ່ປຸ່ນ ແລະ​ກົງກັນຂ້າມ.

 

ຂ່າວທີ່ກ່ຽວຂ້ອງ