ຄຳມ່ວນ ຈັດແຂ່ງຂັນເປຕັງ ສະຫຼອງວັນສ້າງຕັ້ງກອງທັບ

154 05 ກ.ພ. 2019 ວົງຈອນກີລາ
ຄຳມ່ວນ ຈັດແຂ່ງຂັນເປຕັງ ສະຫຼອງວັນສ້າງຕັ້ງກອງທັບ

    ທ້າວ ຄຳ​ເຫຼັກ ໄຊ​ຍະ​ແສງ ນັກ­ກີ­ລາ​ເປ​ຕັງ​ທີມ​ຊາດ​ລາວ ເຈົ້າ​ຂອງ 2 ຫຼຽນ​ຄຳ ທີມ​ຊຸດ​ຊາຍ ແລະ ປະ­ເພດ​ຊຸດ​ຕິ້ງ​ໃນ​ການ​ແຂ່ງ­ຂັນ​ເປ​ຕັງ​ອາ­ຊີ​ປາ​ຊີ​ຟິກ ຢູ່ ສສ ຫວຽດ­ນາມ ປີ 2018 ແຈ້ງ​ໃຫ້​ຊາບ​ເມື່ອ​ບໍ່​ດົນ​ມາ​ນີ້​ວ່າ: ສະ­ຫະ­ພັນ​ເປ​ຕັງ​ແຂວງ​ຄຳ​ມ່ວນ ສົມ­ທົບ​ກັບ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ຈັດ​ແຂ່ງ­ຂັນ​ກີ­ລາ​ເປ​ຕັງ​ປະ­ເພດ​ທີມ​ຊຸດ​ຊາຍ​ຮຸ່ນ​ທົ່ວ​ໄປ ຊີງ​ຂັນ​ທ່ານ​ເຈົ້າ­ແຂວງ​ຄຳ​ມ່ວນ ປະ­ຈຳ​ປີ 2019 ຂຶ້ນ​ວັນ​ທີ 31 ມັງ­ກອນ 2019 ຢູ່​ສະ­ໜາມ​ກີ­ລາ​ເປ​ຕັງ​ແຂວງ ໂດຍ​ມີ​ທ່ານ ພົມ­ມາ ພັນ­ທະ​ລັງ­ສີ ເຈົ້າ­ແຂວງ​ຄຳ​ມ່ວນ ພ້ອມ​ດ້ວຍ​ຮອງ​ເຈົ້າ­ແຂວງ ແລະ ພາກ­ສ່ວນ​ກ່ຽວ­ຂ້ອງ.

    ເພື່ອ​ເປັນ​ການ​ຊົມ­ເຊີຍ​ວັນ​ສຳ­ຄັນ​ຕ່າງໆ​ຂອງ​ຊາດ ໂດຍ​ສະ­ເພາະ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ພ້ອມ​ທັງ​ສົ່ງ­ເສີມ​ນັກ­ກີ­ລາ​ເປ​ຕັງ​ແຂວງ​ໄດ້​ມີ​ການ­ເຄື່ອນ­ໄຫວ​ພັດ­ທະ­ນາ​ຄວາມ​ສາ­ມາດ ກ້າວ​ຂຶ້ນ​ໄປ​ທົດ​ແທນ​ເປັນ​ນັກ­ກີ­ລາ​ເປ​ຕັງ​ແຂວງ ກຽມ​ເຂົ້າ​ຮ່ວມ​ການ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຢູ່​ແຂວງ​ຊຽງ​ຂວາງ.

    ການ​ແຂ່ງ­ຂັນ​ຄັ້ງ​ນີ້ ມີ 60 ທີມ​ເຂົ້າ​ຮ່ວມ ຜ່ານ​ການ​ແຂ່ງ­ຂັນ ຊະ­ນະ​ເລີດ​ໄດ້­ແກ່​ທີມ​ຕຳ­ຫຼວດ​ຫ້ອງ 504 ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາ­ງວັນ 2,5 ລ້ານ​ກີບ ທີ 2 ທີມ​ເປ​ຕັງ​ລາວ​ເອັມ ໄດ້​ຮັບ​ເງິນ​ລາ­ງວັນ 1,5 ລ້ານ​ກີບ ທີ 3 ຮ່ວມ ທີມ​ຈຸດ​ສຸມ​ປ່າ​ໜາມ A ແລະ ຈຸດ​ສຸມ​ປ່າ​ໜາມ B ໄດ້​ຮັບ​ເງິນ​ລາ­ງວັນ​ທີມ​ລະ 1 ລ້ານ​ກີບ.

ຂ່າວທີ່ກ່ຽວຂ້ອງ