ຂ່າວຫຼ້າສຸດ

ໄຂ້ຫວັດໝູ ລະບາດຢູ່ໃນມາຣົກ

972 05 ກ.ພ. 2019 ຂ່າວຕ່າງປະເທດ
ໄຂ້ຫວັດໝູ ລະບາດຢູ່ໃນມາຣົກ

     ທ່ານ ອານັສ ດູຄາລີ ລັດຖະມົນຕີສາທາລະນະສຸກຂອງມາຣົກ ແຈ້ງໃຫ້ຮູ້ເມື່ອວັນທີ 2 ກຸມພານີ້ວ່າ ໄຂ້ຫວັດໝູທີ່ລະບາດຢູ່ໃນປະເທດນີ້ ໄດ້ເປັນເຫດໃຫ້ມີຜູ້ເສຍຊີວິດແລ້ວຢ່າງໜ້ອຍ 9 ຄົນ ໃນອາທິດທີ່ຜ່ານມາ.

    ທ່ານ ດູຄາລີ ເວົ້າວ່າ ການແຜ່ລາມຂອງໄຂ້ຫວັດໝູ ທີ່ເກີດຈາກໄວຣັສໄຂ້ຫວັດສາຍພັນ  A/H1N1 ເປັນປະກົດການ “ປົກກະຕິ” ໃນໄລຍະເວລານີ້ຂອງປີ. ກໍລະນີຜູ້ເສຍຊີວິດລາຍທຳອິດຍ້ອນໄຂ້ຫວັດໝູຢູ່ໃນມາຣົກ ໃນປີນີ້ ມີຂຶ້ນເມື່ອວັນທີ 29 ມັງກອນທີ່ຜ່ານມາ.

    ໄຂ້ຫວັດໝູ ເປັນໜຶ່ງໃນບັນດາພະຍາດທາງລະບົບຫາຍໃຈ ທີ່ເກີດຈາກໄວຣັສໄຂ້ຫວັດສາຍພັນ A/H1N1. ພະຍາດນີ້ຕິດຕໍ່ໄດ້ໄວ ເຮັດໃຫ້ໝູທັງຝູງຕິດພະຍາດໄດ້ໃນເວລາດຽວກັນ. ອາການຕິດໄຂ້ໝູໃນຄົນ ແມ່ນຄ້າຍຄືກັນກັບອາການໄຂ້ຫວັດໃຫຍ່ ແລະບັນດາພະຍາດທີ່ຄືກັບໄຂ້ຫວັດໃຫຍ່ ໂດຍມີອາການໄຂ້ສູງ ໄອ ເຈັບຄໍ ເຈັບຕາມຮ່າງກາຍ ອອກເຢນ ແລະອິດເມື່ອຍ.

    ສຳລັບໃນໂລກນັ້ນ ພະຍາດໄຂ້ຫວັດໝູ ຖືກກວາດພົບເປັນເທື່ອທຳອິດຢູ່ທາງພາກເໜືອ ສ ອາເມຣິກາ ເມື່ອປີ 1918 ຈາກນັ້ນກໍແຜ່ລາມໄປຍັງບັນດາປະເທດໃນເຂດອາເມຣິກາເໜືອ ແລະໃນໂລກ. ໃນປີນັ້ນເອງ ພະຍາດດັ່ງກ່າວກໍໄດ້ຕິດຕໍ່ສູ່ຄົນ ແລະ ກາຍເປັນການລະບາດຄັ້ງໃຫຍ່ຂອງໄຂ້ຫວັດໃຫຍ່ ຢູ່ໃນບາງປະເທດ ເປັນເຫດໃຫ້ມີຜູ້ເສຍຊີວິດຫຼາຍລ້ານຄົນ.

    ເມື່ອເດືອນມິຖຸນາ ປີ 2009 ອົງການອະນາໄມໂລກ (WHO) ໄດ້ມີຄຳຮຽກຮ້ອງອອກມາ ກ່ຽວກັບມະຫັນຕະໄພໄຂ້ຫວັດໝູໃນຂອບຂະໜາດກວ້າງ. ກ່ອນທີ່ຄຳຮຽກຮ້ອງດັ່ງກ່າວໄດ້ຮັບການຍົກເລີກໃນເດືອນສິງຫາ ປີ 2010 ກໍໄດ້ຜູ້ເສຍຊີວິດຍ້ອນພະຍາດດັ່ງກ່າວ ປະມານ 18.500 ຄົນ ຢູ່ໃນ 214 ປະເທດໃນໂລກ.

ຂ່າວທີ່ກ່ຽວຂ້ອງ