ເຢຍລະມັນ-ແຊກບີ ຜ່ານຮອບຄັດເລືອກເທັນນິສທີມຊາຍ ຊີງແຊັມໂລກ

163 06 ກ.ພ. 2019 ວົງຈອນກີລາ
ເຢຍລະມັນ-ແຊກບີ ຜ່ານຮອບຄັດເລືອກເທັນນິສທີມຊາຍ ຊີງແຊັມໂລກ

    ການ​ແຂ່ງ­ຂັນ​ເທັນ​ນິດ​ທິມ​ຊາຍ ຊີງ​ແຊັມ​ໂລກ​ໂລກ ຫຼື Davis Cup ປະ­ຈຳ​ປີ 2019 ສຳ­ເລັດ​ຮອບ​ຄັດ​ເລືອກ ວັນ​ທີ 1-2 ກຸມ­ພາ 2019 ເຢຍ​ລະ​ມັນ ແຊັມ 3 ສະ­ໄໝ ອັນ​ດັບ 11 ຂອງ​ໂລກ ເປີດ​ສະ­ໜາມ Fraport Arena ເອົາ​ຊະ­ນະ ຮົງ​ກາ​ຣີ ອັນ​ດັບ 20 ຂອງ​ໂລກ 5-0 ຄູ່ ອາ​ເລັກ​ຊານ​ເດີ ຊະ​ເວ​ເຣ​ຟ ມື 3 ຂອງ​ໂລກ ແລະ ຟີ​ລິບ ໂຄ­ສະ​ໄຣ​ເບີ ມື 32 ຂອງ​ໂລກ ເກັບ​ໄຊ​ປະ­ເພດ​ຊາຍ​ດ່ຽວ​ຜູ້​ລະ 2 ນັດ ນຳ​ທີມ​ເຂົ້າ​ສູ່​ຮອບ​ສຸດ​ທ້າຍ ເຊັ່ນ​ດຽວ​ກັບ ແຊກ​ບີ ແຊັມ​ປີ 2010 ບໍ່​ມີ ໂນ​ວັກ ໂຢ​ໂຄ​ວິກ ແຕ່ ລູ​ຊານ ລາ​ໂດ​ວິກ ແລະ ຟີ​ລິບ ຄຣາ​ຈີ​ໂນ​ວິກ ກໍ​ສາ­ມາດ​ເອົາ​ຊະ­ນະ ອຸດ​ສະ​ເບ​ກິດ​ສະ­ຖານ 3-2 ຄູ່.

    ຂະ­ນະ​ທີ່ ຍີ່­ປຸ່ນ ຊະ­ນະ ສປ ຈີນ 3-2 ຄູ່ ອົດ​ສະ​ຕຣາ​ລີ ແຊັມ 28 ສະ­ໄໝ ຊະ­ນະ ບອສ​ເນຍ-ເຮີ​ເຊ​ໂກ​ວີ­ນາ 4-0 ຄູ່ ອີ​ຕາ​ລີ ຊະ­ນະ ອິນ​ເດຍ 3-1 ຄູ່ ແບນ​ຊິກ ຊະ­ນະ ເບຣ​ຊິນ 3-1 ຄູ່ ຣັດ​ເຊຍ ຊະ­ນະ ສະ​ວິດ 3-1 ຄູ່ ໂຮນ​ລັງ ຊະ­ນະ ສ ເຊັກ 3-1 ຄູ່ ໂຄ​ລົມ​ບີ ຊະ­ນະ ຊູ​ແອັດ 4-0 ຄູ່ ຊີ​ເລ ຊະ­ນະ ໂອ​ຕຣິດ 3-2 ຄູ່ ກາ​ນາ​ດາ ຊະ­ນະ ສະ​ໂລ​ວັກ 3-2 ຄູ່ ຄາ​ຊັກ​ສະ­ຖານ ຊະ­ນະ ປອກ​ຕຸຍ​ການ 3-1 ຄູ່.

    ການ​ແຂ່ງ­ຂັນ​ປີ​ນີ້ ໄດ້​ປ່ຽນ​ຮູບ​ແບບ​ໃໝ່​ຈາກ​ຫຼາຍ​ປີ­ຜ່ານ­ມາ ໂດຍ​ທີມ​ທີ່​ເຂົ້າ​ຮອບ​ຮອງ​ຊະ­ນະ​ເລີດ​ໃນ​ປີ­ຜ່ານ­ມາ ໄດ້​ສິດ​ຢືນ​ລໍ­ຖ້າ​ໃນ​ຮອບ​ສຸດ​ທ້າຍ ຄື: ຝຣັ່ງ ແຊັມ 10 ສະ­ໄໝ ແອັດ​ສະ​ປາຍ 5 ສະ­ໄໝ ໂຄຣ​ອາ­ຊີ ແຊັມ​ເກົ່າ 2018 ສ ອາ​ເມ​ຣິ​ກາ ແຊັມ​ສູງ​ສຸດ 32 ສະ­ໄໝ ຮ່ວມ​ກັບ​ທີມ​ທີ່​ໄດ້​ສິດ­ທິ​ພິ­ເສດ Wildcard ຄື: ອັງ­ກິດ ແຊັມ 10 ສະ­ໄໝ ເພາະ​ເປັນ​ແຊັມ​ຫຼາຍ​ກວ່າ​ທຸກ​ທີມ​ທີ່​ແຂ່ງ​ໃນ​ຮອບ​ຄັດ​ເລືອກ ແລະ ອາກ​ຊັງ​ຕິນ ແຊັມ​ປີ 2016 ໄດ້​ສິດ Wildcard ເນື່ອງ​ຈາ​ກວ່າ​ເປັນ​ທີມ​ແຊັມ​ຫຼ້າ​ສຸດ​ຮອງ​ຈາກ ຝຣັ່ງ ປີ 2017 ທີ່​ໄດ້​ສິດ​ເຂົ້າ​ສູ່​ຮອບ​ສຸດ​ທ້າຍ​ແລ້ວ ເພາະ​ຕິດ 1-4 ໃນ​ປີ­ຜ່ານ­ມາ ສ່ວນ​ປີ 2018 ແຊັມ​ແມ່ນ​ໂຄຣ​ອາ­ຊີ ບວກ​ກັບ 12 ທີມ​ທີ່​ຜ່ານ​ການ​ຄັດ​ເລືອກ​ປີ 2019 ລວມ 18 ທີມ​ໃນ​ຮອບ​ສຸດ​ທ້າຍ.

    ສຳ­ລັບ​ຮູບ​ແບບ​ການ​ແຂ່ງ­ຂັນ​ແບ່ງ​ອອກ​ເປັນ 6 ກຸ່ມ ກຸ່ມ​ລະ 3 ທີມ ແບ່ງ​ພົບ​ກັນ​ໝົດ​ໃນ​ກຸ່ມ ແລ້ວ​ຄັດ​ເອົາ​ທີ 1 ຂອງ​ກຸ່ມ ບວກ​ກັບ​ທີ 2 ດີ​ສຸດ 2 ທີມ​ຈາກ 6 ກຸ່ມ ເຂົ້າ​ຮອບ 8 ທີມ​ສຸດ​ທ້າຍ​ຕໍ່​ໄປ ໂດຍ​ຕັດ​ເວ­ລາ​ການ​ແຂ່ງ­ຂັນ​ໃຫ້​ສັ້ນ​ລົງ​ຈາກ 3 ໃນ 5 ຄູ່ ເປັນ 2 ໃນ 3 ຄູ່ ແລະ ຈາກ​ດີ​ສຸດ 5 ເຊັດ​ເຫຼືອ 3 ເຊັດ.

ຂ່າວທີ່ກ່ຽວຂ້ອງ