ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 06/02/2019

534 06 ກ.ພ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ທາງ​ການ ສິງ­ກະ­ໂປ ນຳ​ໃຊ້​ກ້ອງ​ຕາ​ທິບ​ລ້ຳ​ຍຸກ ເພື່ອ​ຈັດ­ການ​ກັບ​ບັນ­ດາ​ສິງ​ອົມ​ຄວັນ​ທີ່​ສູບ­ຢາ​ບໍ່​ເລືອກ​ບ່ອນ ແລະ ສຸດ​ທ້າຍ​ແມ່ນ​ເລື່ອງ​ກ່ຽວ​ກັບ​ລະ­ບຽບ​ການ​ຂອງ​ຫວຽດ­ນາມ ເພື່ອ​ຄຸ້ມ​ຄອງ​ບັນ­ຫາ​ຄົນ​ຫວຽດ­ນາມ​ແຕ່ງ­ດອງ​ກັບ​ຄົນ​ຕ່າງ­ປະ­ເທດ.

    ທີ່ ສິງ­ກະ­ໂປ: ໃຜ​ເຄີຍ​ໄປ​ສິງ­ກະ­ໂປ​ຄົງ​ໄດ້​ເຫັນ​ກັບ​ຕາ ເລື່ອງ​ຄວາມ​ສະ­ອາດ​ຈົບ­ງາມ ເລື່ອງ​ວິ­ໄນ ແລະ ສະ­ຕິ​ເຄົາ­ລົບ ແລະ ປະ­ຕິ­ບັດ​ກົດ­ໝາຍ​ຂອງ​ຄົນ​ໃນ​ປະ­ເທດ​ນີ້ ແຕ່​ເຖິງ​ປານ​ນັ້ນ ທາງ​ການ​ຂອງ​ປະ­ເທດ​ສິງ­ກະ­ໂປ ຍັງ​ບໍ່​ລົດ​ລະ​ສັນ​ຫາ​ເຄື່ອງ­ມື​ຊ່ວຍ​ປະ­ຕິ­ບັດ​ລະ­ບຽບ​ກົດ­ໝາຍ​ທີ່​ລ້ຳ​ຍຸກ​ມາ​ນຳ​ໃຊ້ ເພາະ​ສັນ­ດານ​ມະ­ນຸດ​ນັ້ນ ຈະ​ອາ­ໄສ​ແຕ່​ຄວາມ​ຕື່ນ​ຕົວ​ບັນ­ຊາ​ແມ່ນ​ບໍ່​ໄດ້​ເດັດ­ຂາດ ມີ​ຂ່າວ​ອອກ​ມາ​ຈາກ​ສິງ­ກະ­ໂປ ໃນ​ຕົ້ນ​ເດືອນ​ກໍ­ລະ­ກົດ ປີ 2018 ວ່າ​ລັດ­ຖະ­ບານ​ຂອງ​ປະ­ເທດ​ນີ້ ໄດ້​ວາງ​ແຜນ​ຕິດ​ຕັ້ງ​ກ້ອງ​ກວດ​ຈັບ​ຄວາມ​ຮ້ອນ ຄຸນ​ນະ​ພາບ​ຍອດ​ຢ້ຽມ ຈຳ­ນວນ 300 ໜ່ວຍ ຕາມ​ສະ­ຖານ­ທີ່​ຊຸມ​ຊົນ ແລະ ພື້ນ​ທີ່​ສາ­ທາ­ລະ­ນະ​ໃນ​ທົ່ວ​ປະ­ເທດ ເພື່ອ​ຈັບ​ຜິດ​ຜູ້​ລ່ວງ​ລັກ​ສູບ­ຢາ​ໃນ​ບ່ອນ​ຫ້າມ​ສູບ ນອກ­ຈາກ​ການ​ຈັບ​ບັນ­ດາ​ສິງ​ອົມ​ຄວັນ​ທີ່​ແຕກ​ປອກ​ນອກ​ລະ­ບຽບ​ແລ້ວ ກ້ອງ​ຕາ​ທິບ​ທັງ 300 ໜ່ວຍ ຍັງ​ສາ­ມາດ​ຈັບ​ຜູ້​ເຮັດ​ແນວ​ສົກ­ກະ­ປົກ ເຊັ່ນ: ຖົ່ມ­ນ້ຳ­ລາຍ ຫຼື ຖິ້ມ​ຂີ້​ເຫຍື້ອ​ຊະ­ຊາຍ ຢູ່​ສິງ­ກະ­ໂປ ໂທດ​ປັບ​ໃໝ​ສຳ­ລັບ​ການ​ສູບ­ຢາ​ໃນ​ບ່ອນ​ຫ້າມ​ສູບ​ນັ້ນ ສູງ​ເຖິງ 740 ໂດ​ລາ​ສະ­ຫະ­ລັດ (ປະ­ມານ 6 ລ້ານ​ກີບ).

    ທີ່ ຫວຽດ­ນາມ: ມີ​ຂ່າວ​ທີ່​ເວົ້າ​ກ່ຽວ​ກັບ​ຄວາມ​ພະ­ຍາ­ຍາມ​ຂອງ​ທາງ​ການ​ຫວຽດ­ນາມ ໃນ​ການ​ຄຸ້ມ​ຄອງ​ການ​ແຕ່ງ­ດອງ ລະ­ຫວ່າງ​ຄົນ​ຫວຽດ­ນາມ​ຊາວ​ຕ່າງ­ປະ­ເທດ ທີ່​ນັບ​ມື້​ເພີ່ມ​ຂຶ້ນ​ໃນ​ຍຸກ​ເຊື່ອມ​ໂຍງ​ຄື​ສູ່​ມື້­ນີ້ ຕົວ­ຢ່າງ: ລະ­ຫວ່າງ​ປີ 2011-2014 ຈຳ­ນວນ​ການ​ແຕ່ງ­ດອງ ລະ­ຫວ່າງ​ຄົນ​ຫວຽດ­ນາມ​ກັບ​ຄົນ​ຕ່າງ­ປະ­ເທດ ຫຼື ກັບ​ຄົນ​ຫວຽດ­ນາມ ທີ່​ອາ­ໄສ​ຢູ່​ຕ່າງ­ປະ­ເທດ​ນັ້ນ ມີ​ຫຼາຍ​ກວ່າ 50.000 ຄົນ ໃນ​ນັ້ນ 80% ແມ່ນ​ເພດ​ຍິງ ເຊິ່ງ​ສ່ວນ​ໃຫຍ່​ແມ່ນ​ແຕ່ງ­ດອງ​ກັບ​ຊາຍ​ຄົນ ສ ເກົາ­ຫຼີ ແລະ ຈາກ​ເກາະ​ຈີນ ໄຕ້​ຫວັນ ໃນ​ລະ­ຫວ່າງ​ກາງ​ປີ 2016 ກະ­ຊວງ​ຍຸ­ຕິ​ທຳ​ຫວຽດ­ນາມ ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກັບ​ຫຼາຍ​ພາກ­ສ່ວນ​ກ່ຽວ­ຂ້ອງ ເພື່ອ​ຮ່ວມ​ກັນ​ຊອກ​ຊ່ອງ​ທາງ​ຄຸ້ມ​ຄອງ ບັນ­ຫາ​ການ​ແຕ່ງ­ດອງ ລະ­ຫວ່າງ​ພົນ­ລະ­ເມືອງ​ຫວຽດ­ນາມ​ກັບ​ຊາວ​ຕ່າງ­ປະ­ເທດ ໂດຍ​ລົງ​ເລິກ​ການ​ສະ­ຫຼຸບ​ຕີ​ລາ­ຄາ​ການ​ປະ­ຕິ­ບັດ ບັນ­ດາ​ລະ­ບຽບ​ການ​ທີ່​ກ່ຽວ­ຂ້ອງ ປະ­ສິດ­ທິ­ພາບ​ຂອງ​ການ​ເຮັດ​ວຽກ​ຂອງ​ບັນ­ດາ​ບຸ​ຄະ­ລາ​ກອນ ທີ່​ຮັບ­ຜິດ­ຊອບ​ແກ້​ໄຂ​ກໍ­ລະ­ນີ​ຕ່າງໆ ທີ່​ພົວ­ພັນ​ກັບ​ການ​ແຕ່ງ­ດອງ​ຂ້າມ​ຊາດ​ດັ່ງ­ກ່າວ ຜົນ​ຂອງ​ກອງ​ປະ­ຊຸມ​ສຳ​ມະ​ນາ​ຄັ້ງ​ນັ້ນ ໄດ້​ສະ­ຫຼຸບ​ວ່າ­ການ​ຄຸ້ມ​ຄອງ ແລະ ແກ້​ໄຂ​ບັນ­ຫາ​ຄົນ​ຫວຽດ­ນາມ​ແຕ່ງ­ດອງ​ກັບ​ຕ່າງ­ປະ­ເທດ​ນັ້ນ ເຊື່ອມ​ຕິດ​ກັບ​ບັນ­ຫາ​ອື່ນໆ ເຊັ່ນ: ການ​ຍົກ​ລະ­ດັບ​ການ​ສຶກ​ສາ ການ​ສ້າງ​ຄວາມ​ຮັບ​ຮູ້​ທີ່​ຖືກ­ຕ້ອງ​ໃນ​ໝູ່​ເພດ​ຍິງ ການ​ສ້າງ​ວຽກ​ເຮັດ​ງານ​ທຳ​ໃຫ້​ແມ່­ຍິງ​ໃນ​ເຂດ​ຊົນ­ນະ­ບົດ​ຫ່າງ​ໄກ​ສອກ­ຫຼີກ ແລະ ບັນ­ຫາ​ແມ່­ຍິງ​ທີ່​ກັບ​ຄືນ​ປະ­ເທດ ພາຍ­ຫຼັງ​ມີ​ບັນ­ຫາ​ໃນ​ຊີ­ວິດ​ແຕ່ງ­ດອງ​ຢູ່​ຕ່າງ­ປະ­ເທດ.

    ບັນ­ດາ​ຜູ້​ແທນ​ກອງ​ປະ­ຊຸມ​ຄັ້ງ​ນັ້ນ ໄດ້​ຮຽກ­ຮ້ອງ​ໃຫ້​ທາງ​ການ ກໍ​ຄື ໜ່ວຍ​ງານ​ທີ່​ກ່ຽວ­ຂ້ອງ​ປັບ­ປຸງ​ລະ­ບຽບ​ການ​ຕ່າງໆ ກ່ຽວ​ກັບ​ການ​ແຕ່ງ­ດອງ ລະ­ຫວ່າງ​ພົນ­ລະ­ເມືອງ​ຫວຽດ­ນາມ​ກັບ​ຊາວ​ຕ່າງ­ປະ­ເທດ​ໃຫ້​ຮັດ­ກຸມ ແລະ ມີ​ປະ­ສິດ­ທິ­ພາບ ເພື່ອ​ປ້ອງ​ກັນ​ບໍ່​ໃຫ້​ມີ​ເຫດ­ການ​ທີ່​ບໍ່​ເພິ່ງ​ປາດ​ຖະ​ໜາ​ເກີດ​ຂຶ້ນ ໃນ​ຂະ​ບວນ​ການ​ແຕ່ງ­ດອງ​ກັບ​ຊາວ​ຕ່າງ­ປະ­ເທດ.

ຂ່າວທີ່ກ່ຽວຂ້ອງ