ຂ່າວຫຼ້າສຸດ

ຮ່ວມກັນເປັນເຈົ້າການ ປົກປັກຮັກສາເສັ້ນທາງຫຼວງ

289 06 ກ.ພ. 2019 ຂ່າວໜ້າ​ໜຶ່ງ
ຮ່ວມກັນເປັນເຈົ້າການ ປົກປັກຮັກສາເສັ້ນທາງຫຼວງ

    ເສັ້ນ­ທາງ​ເລກ​ທີ A11 ຕອນ​ໃຕ້ ເປັນ​ເສັ້ນ­ທາງ​ຍຸດ​ທະ​ສາດ​ສາຍ​ສຳ­ຄັນ​ໜຶ່ງ ທີ່​ເຊື່ອມ​ຕໍ່​ອອກ​ໃສ່​ຫາ​ເຂດ​ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເປັນ​ເສັ້ນ­ທາງ​ທີ່​ປະ­ຊາ­ຊົນ​ເຂດ​ພື້ນ ທີ່​ດັ່ງ­ກ່າວ ນຳ​ໃຊ້​ໃນ​ການ​ຄົມ­ມະ­ນາ­ຄົມ​ເພື່ອ​ຂົນ­ສົ່ງ​ລຳ­ລຽງ​ສິນ­ຄ້າ ໄປ­ມາ­ຫາ­ສູ່​ແລກ­ປ່ຽນ​ຢ້ຽມ­ຢາມ​ພົບ​ປະ­ກັນ​ເປັນ​ປະ­ຈຳ ແຕ່​ເນື່ອງ​ຈາ​ກວ່າ​ເສັ້ນ­ທາງ​ດັ່ງ­ກ່າວ ໄດ້​ຖືກ​ນຳ​ໃຊ້​ມາ​ເປັນ​ເວ­ລາ​ຫຼາຍ​ປີ ຈຶ່ງ​ເກີດ​ມີ​ສະ­ພາບ​ເຮັດ​ໃຫ້​ເສັ້ນ­ທາງ​ເປ່​ເພ ບາງ​ເຂດ​ໄດ້​ເກີດ​ເປັນ​ຂຸມ ຍາມ​ແລ້ງ​ເກີດ​ມີ​ຂີ້­ຝຸ່ນ ແລະ ຍາມ​ຝົນ​ເກີດ​ມີ​ຕົມ ເຮັດ​ໃຫ້​ປະ­ຊາ­ຊົນ​ທີ່​ນຳ​ໃຊ້​ເສັ້ນ­ທາງ​ໄດ້​ພົບ­ພໍ້​ກັບ​ຄວາມ​ຫຍຸ້ງ­ຍາກ​ນາໆ​ປະ­ການ ແລະ ໃຊ້​ເວ­ລາ​ດົນ​ນານ​ພໍ​ສົມ­ຄວນ​ໃນ​ການ​ເດີນ­ທາງ​ເຂົ້າ​ສູ່​ຕົວ​ເມືອງ ດ້ວຍ​ເຫດ​ນັ້ນ ພັກ ແລະ ລັດ­ຖະ­ບານ ເຫັນ​ຄວາມ​ສຳ­ຄັນ​ຂອງ​ຊີ­ວິດ​ປະ­ຊາ­ຊົນ​ບັນ­ດາ­ເຜົ່າ ຈຶ່ງ​ຂົນ­ຂວາຍ​ຊອກ​ງົບ­ປະ­ມານ ແລະ ການ​ຊ່ວຍ­ເຫຼືອ​ຈາກ​ຕ່າງ­ປະ­ເທດ ເພື່ອ​ມາ​ລົງ­ທຶນ​ກໍ່­ສ້າງ​ເສັ້ນ­ທາງ​ດັ່ງ­ກ່າວ ແລະ ອຳ­ນວຍ​ຄວາມ​ສະ­ດວກ​ສະ­ບາຍ​ໃຫ້​ກັບ​ປະ­ຊາ­ຊົນ.

    ທ່ານ ພູ​ທົງ ລັດ­ຕະ­ນະ​ວົງ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ ເມືອງ​ຫາດ​ຊາຍ​ຟອງ ໄດ້​ໃຫ້​ສຳ­ພາດ​ວັນ​ທີ 30 ມັງ­ກອນ 2019 ວ່າ: ເສັ້ນ­ທາງ​ຄູ​ປ້ອງ​ກັນ​ນ້ຳ​ຖ້ວມ​ເຂດ​ວຽງ​ຈັນ​ຕອນ​ໃຕ້ ຫຼື ເສັ້ນ­ທາງ A11 ມີ​ຄວາມ​ຍາວ​ທັງ​ໝົດ 32,2 ກິ­ໂລ­ແມັດ ໃນ​ນັ້ນ ເປັນ​ຄູ​ດິນ​ແດງ 4 ກິ­ໂລ­ແມັດ ກວ້າງ 4 ແມັດ ເປັນ​ເສັ້ນ­ທາງ​ຍາວ 26,4 ກິ­ໂລ­ແມັດ ກວ້າງ 10 ແມັດ ປູ​ດ້ວຍ​ຢາງ​ອັດ​ສ​ຟານ​ທັບ​ໜາ 5 ຊັງ​ຕີ​ແມັດ ມູນ​ຄ່າ​ການ​ກໍ່­ສ້າງ​ທັງ​ໝົດ ປະ­ມານ 90 ຕື້​ກີບ ຫຼື 10.487.605 ໂດ​ລາ​ສະ­ຫະ­ລັດ ມີ​ໄລ­ຍະ​ໃນ​ການ​ກໍ່­ສ້າງ 24 ເດືອນ ໄດ້​ລົງ­ມື​ກໍ່­ສ້າງ​ເລີ່ມ​ແຕ່​ວັນ​ທີ 7 ເມ­ສາ 2016 ແລະ ມາ​ຮອດ​ປັດ­ຈຸ­ບັນ​ສຳ­ເລັດ 100%.

    ພາຍ­ຫຼັງ​ເສັ້ນ­ທາງ​ໄດ້​ສ້າງ​ສຳ­ເລັດ ໄດ້​ອຳ­ນວຍ​ຄວາມ​ສະ­ດວກ​ສະ­ບາຍ ໃຫ້​ແກ່​ການ​ຄົມ­ມະ­ນາ­ຄົມ​ສັນ­ຈອນ​ໄປ​ມາ​ຄ້າ ຂາຍ­ຂອງ​ປະ­ຊາ­ຊົນ​ເມືອງ​ຫາດ​ຊາຍ​ຟອງ ດີ​ຂຶ້ນ​ຫຼາຍ​ກວ່າ​ເກົ່າ ການ​ເດີນ­ທາງ​ໄປ­ມາ­ຫາ­ສູ່​ປັດ­ຈຸ­ບັນ​ເຫັນ​ວ່າ​ມີ​ຄວາມ​ວ່ອງ­ໄວ ທັນ​ສະ­ໄໝ ແລະ ປະ­ຢັດ​ເວ­ລາ ການ​ພັດ­ທະ­ນາ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ກໍ​ເຫັນ​ວ່າ​ນັບ​ມື້​ດີ​ຂຶ້ນ​ເລື້ອຍໆ ໂດຍ​ຄຽງ​ຄູ່​ກັບ​ການ​ນຳ​ໃຊ້​ເສັ້ນ­ທາງ​ຫຼວງ ເພື່ອ​ໃຫ້​ມີ​ອາ­ຍຸ​ການ​ນຳ​ໃຊ້​ຢ່າງ​ຍາວ​ນານ ແລະ ມີ​ປະ​ສິດ­ທິ​ຜົນ ຜູ້­ນຳ​ໃຊ້​ລົດ​ໃຊ້​ຖະ­ໜົນ​ທຸກ​ຄົນ ກໍ​ຕ້ອງ​ເປັນ​ເຈົ້າ​ການ​ຮ່ວມ​ກັນ​ເອົາ­ໃຈ­ໃສ່​ບູ­ລະ­ນະ​ການ​ປົກ​ປັກ​ຮັກ­ສາ​ເສັ້ນ­ທາງ ໃຫ້​ມີ​ຄວາມ​ສະ­ອາດ​ຈົບ­ງາມ ແລະ ສ້າງ​ໃຫ້​ເມືອງ​ຫາດ​ຊາຍ​ຟອງ ມີ​ໃບ​ໜ້າ​ໃບ​ຕາ​ອັນ​ໃໝ່ ແລະ ກາຍ­ເປັນ​ເມືອງ​ທີ່​ໜ້າ​ຢູ່.

ຂ່າວທີ່ກ່ຽວຂ້ອງ