ຂ່າວຫຼ້າສຸດ

ເຮັດປາແດກຂາຍ ສ້າງລາຍຮັບໃຫ້ຄອບຄົວ 50 ລ້ານກີບຕໍ່ປີ

379 06 ກ.ພ. 2019 ຂ່າວໜ້າ​ໜຶ່ງ
ເຮັດປາແດກຂາຍ ສ້າງລາຍຮັບໃຫ້ຄອບຄົວ 50 ລ້ານກີບຕໍ່ປີ

    ປາ­ແດກ ເປັນ​ອາ­ຫານ​ພື້ນ​ບ້ານ​ທີ່​ຂຶ້ນ​ຊື່​ລື​ນາມ ແລະ ເປັນ​ທີ່​ນິ­ຍົມ​ຊົມ​ຊອບ​ຂອງ​ຄົນ​ລາວ ໃນ​ການ​ປຸງ​ແຕ່ງ­ອາ­ຫານ​ປະ­ເພດ​ຕ່າງໆ ປັດ­ຈຸ­ບັນ​ໄດ້​ກາຍ­ເປັນ​ສິນ­ຄ້າ​ທີ່​ສ້າງ​ລາຍ​ຮັບ​ໃຫ້​ຄອບ­ຄົວ​ແມ່ ຄຳ­ໃບ ຈິດ​ຕະ​ອາ­ມາດ ບ້ານ​ສະ­ໜາມ​ໄຊ ເມືອງ​ປາກ​ເຊ ແຂວງ​ຈຳ­ປາ​ສັກ ທີ່​ໄດ້​ຢຶດ​ຖື​ອາ­ຊີບ​ເຮັດ​ປາ­ແດກ​ຂາຍ​ໄດ້ 50 ລ້ານ​ກີບ​ຕໍ່​ປີ.

    ແມ່ ຄຳ­ໃບ ຈິດ​ຕະ​ອາ­ມາດ ໃຫ້​ສຳ­ພາດ​ໃນ​ໂອ­ກາດ​ເຂົ້າ​ມາ​ຮ່ວມ​ງານ​ເທ​ສະ­ການ​ອາ­ຫານ​ລາວ ຄັ້ງ​ທີ 14 ເມື່ອ​ບໍ່​ດົນ​ມາ​ນີ້​ວ່າ: ຕົນ​ເປັນ​ຜູ້​ໜຶ່ງ​ທີ່​ມັກ-ຮັກ​ໃນ​ການ​ປຸງ​ແຕ່ງ­ອາ­ຫານ ໂດຍ​ສະ­ເພາະ ການ​ໝັກ​ປາ​ໃຫ້​ເປັນ​ປາ­ແດກ ເພື່ອ​ນຳ​ໃຊ້​ໃນ​ການ​ປຸງ​ແຕ່ງ­ອາ­ຫານ​ປະ­ເພດ​ຕ່າງໆ ໂດຍ​ອີງ­ໃສ່​ເງື່ອນ­ໄຂ​ຂອງ​ແຂວງ​ຈຳ­ປາ​ສັກ ເຊິ່ງ​ເປັນ​ແຂວງ​ທີ່​ມີ​ປາ​ນ້ຳ­ຂອງ​ຫຼາຍ​ທີ່​ສຸດ ແລະ ເພື່ອ​ເປັນ​ການ​ສືບ​ທອດ​ວິ­ທີ​ການ​ເຮັດ​ປາ­ແດກ​ຈາກ​ພໍ່-ແມ່ ປູ່​ຍ່າ ຕາ­ນາຍ ຈຶ່ງ​ໄດ້​ຕັດ­ສິນ​ໃຈ​ເຮັດ​ປາ­ແດກ​ຂາຍ ເປັນ​ເວ­ລາ​ຫຼາຍ​ກວ່າ 10 ປີ ໂດຍ​ອີງ­ໃສ່​ສະ­ພາບ​ຄວາມ​ຕ້ອງ­ການ​ຂອງ​ຕະ­ຫຼາດ​ໃນ​ປັດ­ຈຸ­ບັນ ກໍ​ຄື ລູກ​ຄ້າ​ທີ່​ໄດ້​ມີ​ການ​ສັ່ງ​ຈອງ ຈຶ່ງ​ໄດ້​ໝັກ​ປາ​ໄວ້​ປີ​ລະ 1-2 ໂຕນ ເຊິ່ງ​ມີ​ປາ­ພອນ ປາ­ສ້ອຍ ແລະ ປາ­ເອີນ ໃນ​ນີ້ ສ່ວນ​ຫຼາຍ​ແມ່ນ​ໄປ​ຊື້​ນຳ​ປະ­ຊາ­ຊົນ​ທີ່​ຢຶດ​ຖື​ອາ­ຊີບ​ຫາ​ປາ​ຕາມ​ແມ່­ນ້ຳ​ຂອງ ຫຼື ກໍ​ມີ​ຄົນ​ມາ​ຂາຍ​ໃຫ້​ຢູ່​ເຮືອນ ໂດຍ​ຊື້ 35.000-70.000 ກີບ​ຕໍ່​ກິ​ໂລ.

    ສຳ­ລັບ​ວິ­ທີ​ການ​ເຮັດ​ປາ­ແດກ​ຂອງ​ແມ່​ຄຳ­ໃບ ຈິດ​ຕະ​ອາ­ມາດ ແມ່ນ​ເນັ້ນ​ທີ່​ຄວາມ​ສະ­ອາດ ບໍ່​ມີ​ສານ​ເຄ​ມີ​ເຈືອ​ປົນ ແລະ ໃຊ້​ເວ­ລາ​ໝັກ 7 ເດືອນ-1 ປີ ແລະ ເອົາ​ເຮືອນ​ຂອງ​ເພິ່ນ​ເປັນ​ສະ­ຖານ­ທີ່​ຈຳ­ໜ່າຍ ລາ­ຄາ 100.000-120.000 ກີບ​ຕໍ່​ກິ​ໂລ ສະ­ເລ່ຍ​ລາຍ​ຮັບ​ຫຼັງ​ຫັກ​ຕົ້ນ​ທຶນ​ອອກ​ແມ່ນ 50 ລ້ານ​ກີບ​ຕໍ່​ປີ ໃນ​ແຕ່​ລະ​ປີ​ຕົນ​ໄດ້​ເປັນ​ຕົວ​ແທນ​ຂອງ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ແຂວງ​ຈຳ­ປາ​ສັກ ນຳ​ເອົາ​ຜະ­ລິດ​ຕະ​ພັນ​ຂອງ​ແມ່­ຍິງ​ເຂົ້າ​ມາ​ຮ່ວມ​ວາງ­ສະ­ແດງ ແລະ ຈຳ­ໜ່າຍ​ໃນ​ງານ​ເທ​ສະ­ການ​ອາ­ຫານ​ລາວ​ທຸກໆ​ປີ ສະ­ເພາະ​ປີ 2019 ໄດ້​ນຳ​ເອົາ​ອາ­ຫານ​ຫຼາຍ​ຊະ­ນິດ​ທີ່​ຂຶ້ນ​ຊື່​ຂອງ​ແຂວງ​ຈຳ­ປາ​ສັກ ເປັນ­ຕົ້ນ ເສັ້ນ​ເຝີ ຜັກ​ອີ່­ຄູ້ ສະ­ບູ​ນ້ຳ​ນົມ​ແກະ ປາ­ແດກ ໄສ້­ກອກ ແລະ ອື່ນໆ.

ຂ່າວທີ່ກ່ຽວຂ້ອງ