ລາວ-ອາເມຣິກາ ເພີ່ມທະວີການຮ່ວມມືການຄ້າ ແລະ ການລົງທຶນ

630 06 ກ.ພ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຄັ້ງ​ທີ 2 ເພື່ອ​ຈັດ​ຕັ້ງ​ປະ­ຕິ­ບັດ​ສັນ­ຍາ​ວ່າ​ດ້ວຍ​ການ​ຄ້າ ແລະ ການ​ລົງ­ທຶນ ລະ­ຫວ່າງ ສປປ ລາວ ແລະ ສາ​ຫະ​ລັດ​ອາ​ເມ​ຣິ​ກາ ຈັດ​ຂຶ້ນ​ວັນ​ທີ 2 ກຸມ­ພາ 2019 ທີ່​ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຮ່ວມ​ຂອງ​ທ່ານ ສົມ​ຈິດ ອິນ​ທະ​ມິດ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ Karl Ehlers ຜູ້­ຕາງ­ໜ້າ​ການ​ຄ້າ ສະ­ຫະ­ລັດ​ອາ​ເມ​ຣິ​ກາ ປະ­ຈຳ​ຂົງ­ເຂດ​ອາ­ຊີ​ຕາ­ເວັນ​ອອກ­ສຽງ​ໃຕ້ ແລະ ປາ​ຊີ​ຟິກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ຮັດ​ແໜ້ນ​ສາຍ​ພົວ­ພັນ​ທາງ​ດ້ານ​ເສດ­ຖະ­ກິດ ການ​ຄ້າ ແລະ ການ​ລົງ­ທຶນ ເປັນ​ການ​ພົບ​ປະ​ປຶກ­ສາ​ຫາ­ລື​ຄັ້ງ​ລ້າ​ສຸດ ພາຍ­ຫຼັງ​ທີ່​ທັງ​ສອງ​ປະ­ເທດ​ໄດ້​ເຊັນ​ສັນ­ຍາ​ຂອບ​ການ​ຮ່ວມ​ມື​ການ​ຄ້າ ແລະ ການ​ລົງ­ທຶນ ໃນ​ປີ 2016 ການ​ປຶກ­ສາ​ຫາ­ລື​ໃນ​ຄັ້ງ​ນີ້ ຍັງ​ໄດ້​ເນັ້ນ​ເຖິງ​ບັນ­ດາ​ໂອ­ກາດ​ຕ່າງໆ ເພື່ອ​ເພີ່ມ​ທະ­ວີ​ການ​ຮ່ວມ​ມື​ຂອງ​ທັງ​ສອງ​ປະ­ເທດ ນອກ­ຈາກ​ນີ້ ສອງ​ຝ່າຍ​ຍັງ​ໄດ້​ປຶກ­ສາ​ຫາ­ລື​ໃນ​ຫົວ­ຂໍ້​ທີ່​ສຳ­ຄັນ​ຕ່າງໆ​ເຊັ່ນ: ການ​ຈ່າຍ​ເງິນ​ແບບ​ອີ​ເລັກ​ໂຕຣ​ນິກ ມາດ­ຕະ­ຖານ​ທາງ​ດ້ານ​ລົດ­ຍົນ ການ​ຄ້າ​ດິ​ຈິ​ຕອນ ແລະ ຊັບ​ສິນ​ທາງ​ປັນ­ຍາ.

    ສປປ ລາວ ຖື​ເປັນ​ຄູ່​ຮ່ວມ​ມື​ທາງ​ດ້ານ​ການ​ຄ້າ ແລະ ການ​ລົງ­ທຶນ​ທີ່​ສຳ­ຄັນ​ຕໍ່​ສະ­ຫະ­ລັດ​ອາ​ເມ​ຣິ​ກາ ແລະ ບັນ­ດາ​ປະ­ເທດ​ອາ​ຊຽນ ສັນ­ຍາ​ຂອບ​ການ​ຮ່ວມ​ມື​ການ​ຄ້າ ແລະ ການ​ລົງ­ທຶນ ໄດ້​ສ້າງ​ກົນ​ໄກ​ເພື່ອ​ຂະ­ຫຍາຍ ແລະ ຮັດ​ແໜ້ນ​ສາຍ​ພົວ­ພັນ​ການ​ພົບ​ປະ​ລະ­ດັບ​ສູງ​ຄັ້ງ​ນີ້ ແມ່ນ​ມີ​ຄວາມ​ສຳ­ຄັນ​ລະ­ຫວ່າງ​ສະ­ຫະ­ລັດ​ອາ​ເມ​ຣິ​ກາ ແລະ ສປປ ລາວ ໃນ​ການ​ຮ່ວມ​ມື​ດ້ານ​ການ​ຄ້າ​ສອງ​ຝ່າຍ ແລະ ຍັງ​ເປັນ​ການ​ຊ່ວຍ​ໃນ​ການ​ປະ­ສານ​ງານ​ກ່ຽວ​ກັບ​ບັນ­ຫາ​ອັນ​ສຳ­ຄັນ​ໃນ​ພາກ​ພື້ນ ລວມ​ທັງ ອາ​ຊຽນ ແລະ ອົງ­ການ​ການ​ຄ້າ​ໂລກ.

ຂ່າວທີ່ກ່ຽວຂ້ອງ