ສຸມໃສ່ 5 ເນື້ອໃນຂອງຍຸດທະສາດ ການພັດທະນາຊັບພະຍາກອນມະນຸດ

453 06 ກ.ພ. 2019 ຂ່າວໜ້າ​ໜຶ່ງ
ສຸມໃສ່ 5 ເນື້ອໃນຂອງຍຸດທະສາດ ການພັດທະນາຊັບພະຍາກອນມະນຸດ

    ກອງ​ປະ­ຊຸມ​ຄົບ​ຄະ­ນະ ຄັ້ງ​ທີ VII ຂອງ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ຈັດ​ຂຶ້ນ​ວັນ​ທີ 5 ກຸມ­ພາ 2019 ທີ່​ໂຮງ­ແຮມ​ຄຣາວ​ພລາ​ຊາ ໂດຍ​ເປັນ​ປະ­ທານ​ຂອງ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ມີ​ຮອງ​ລັດ­ຖະ­ມົນ­ຕີ ຮອງ​ເຈົ້າ­ແຂວງ ພະ​ແນກ ສສກ ແຂວງ ນະ­ຄອນ­ຫຼວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ກ່າວ​ວ່າ: ເພື່ອ​ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ ຄັ້ງ​ທີ VI ຂອງ​ຄະ­ນະ​ກຳ­ມາ​ທິ​ການ​ແຫ່ງ​ຊາດ ເພື່ອ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ປີ 2017 ແລະ ສະ­ຫຼຸບ​ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ປີ 2018 ແລະ ວາງ​ທິດ​ທາງ​ປີ 2019 ເຊິ່ງ​ຜ່ານ​ການ­ຈັດ­ຕັ້ງ​ຜັນ​ຂະ­ຫຍາຍ ໄດ້​ມີ​ຄວາມ​ຄືບ​ໜ້າ​ພົ້ນ​ເດັ່ນ​ດ້ານ​ກົງ­ຈັກ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ທີ່​ລວມ​ສູນ​ເປັນ​ລະ­ບົບ​ຄົບ​ຊຸດ ແລະ ມີ​ກົນ​ໄກ​ການ​ປະ­ສານ​ງານ​ແຕ່​ສູນ​ກາງ​ຮອດ​ທ້ອງ­ຖິ່ນ ແຕ່​ຍັງ​ບໍ່​ໄດ້​ລົງ​ເລິກ​ການ​ວາງ​ແຜນ ຈັດ​ຕັ້ງ​ປະ­ຕິ­ບັດ​ວຽກ​ງານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ທີ່​ແນ່­ນອນ ບາງ​ໜ້າ​ວຽກ​ຍັງ​ຄົງ​ຄ້າງ ແລະ ແກ່­ຍາວ ເນື່ອງ​ຈາກ​ຫຼາຍ​ກະ­ຊວງ ອົງ­ການ​ທຽບ​ເທົ່າ ຂະ­ແໜງ­ການ​ສູນ​ກາງ ແລະ ທ້ອງ­ຖິ່ນ​ຈຳ­ນວນ​ໜຶ່ງ ຍັງ​ສືບ­ຕໍ່​ສຸມ​ໃສ່​ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ​ບຸ​ຄະ­ລາ​ກອນ ການ​ດຳ­ເນີນ​ກິດ­ຈະ­ກຳ​ອື່ນໆ ກໍ​ຊັກ​ຊ້າ​ໄປ​ນຳ.

    ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ການ​ລາຍ​ງານ ຖອດ​ຖອນ​ບົດ­ຮຽນ ແລະ ປະ­ກອບ​ຄຳ​ຄິດ​ຄຳ​ເຫັນ​ໃສ່ 5 ເນື້ອ​ໃນ​ຄື: ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ແຫ່ງ​ຊາດ​ຮອດ​ປີ 2025 ໂດຍ​ເນັ້ນ​ໜັກ​ວຽກ​ຈຸດ​ສຸມ ແລະ ຄາດ­ໝາຍ​ຂອງ​ຍຸດ​ທະ​ສາດ 2 3 5 ແລະ ການ​ຜັນ​ຂະ­ຫຍາຍ​ບາງ​ຜົນ​ໄດ້​ຮັບ​ຈາກ​ກອງ​ປະ­ຊຸມ​ໂຕະ­ມົນ​ປີ 2017 ເປັນ­ຕົ້ນ ການ​ພັດ­ທະ­ນາ​ແບບ​ຈຳ­ລອງ​ການ​ພະ­ຍາ­ກອນ​ຕະ­ຫຼາດ​ແຮງ​ງານ ແລະ ການ​ພັດ­ທະ­ນາ​ຍຸດ​ທະ​ສາດ​ແຜນ​ຈັດ​ຕັ້ງ​ປະ­ຕິ­ບັດ ການ​ເຝິກ­ອົບ­ຮົມ​ໃຫ້​ແກ່​ພະ­ນັກ­ງານ-ລັດ­ຖະ­ກອນ ຮ່າງ​ຍຸດ​ທະ​ສາດ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ຂອງ​ຂະ­ແໜງ ສສກ ແຜນ​ຄວາມ​ຕ້ອງ­ການ​ຄູ-ບຸ​ຄະ­ລາ​ກອນ ສສກ ຍຸດ​ທະ​ສາດ​ການ​ພັດ­ທະ­ນາ​ການ­ຈັດ­ຕັ້ງ ແລະ ບຸ​ຄະ­ລາ​ກອນ​ຂອງ​ຂະ­ແໜງ­ການ​ເງິນ ແລະ ແຜນ​ຄວາມ​ຕ້ອງ­ການ​ບຸ​ຄະ­ລາ​ກອນ ການ​ພັດ­ທະ­ນາ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ແລະ ນຳ​ສະ­ເໜີ​ແບບ​ຈຳ­ລອງ​ການ​ພະ­ຍາ­ກອນ​ຕະ­ຫຼາດ​ແຮງ​ງານ ໂດຍ​ສະ­ເພາະ ການ​ສະ­ໜອງ​ຄວາມ​ຕ້ອງ­ການ ແລະ ຜົນ​ພະ­ຍາ­ກອນ​ຄວາມ​ຕ້ອງ­ການ​ປີ 2019.

ຂ່າວທີ່ກ່ຽວຂ້ອງ