ຖອດຖອນບົດຮຽນ ໂຄງການສົ່ງເສີມການຜະລິດເປັນສິນຄ້າ

517 07 ກ.ພ. 2019 ຂ່າວໜ້າ​ໜຶ່ງ

    ກົມ​ແຜນ­ການ ແລະ ການ​ເງິນ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຈັດ​ກອງ​ປະ­ຊຸມ​ສະ­ຫຼຸບ​ຖອດ​ຖອນ​ບົດ­ຮຽນ ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ແລະ ໂຄງ­ການ​ການ​ຄ້ຳ­ປະ­ກັນ​ສະ­ບຽງ​ອາ­ຫານ​ແຫ່ງ​ຊາດ ຂອງ​ເຂດ​ພາກ​ກາງ-ພາກ​ໃຕ້ ປະ­ຈຳ​ປີ 2018 ແລະ ທິດ​ທາງ​ແຜນ­ການ​ໃນ­ຕໍ່­ໜ້າ​ຂຶ້ນ​ວັນ​ທີ 4 ກຸມ­ພາ 2019 ທີ່ ນະ­ຄອນ​ປາກ​ເຊ ແຂວງ​ຈຳ­ປາ​ສັກ ເປັນ​ປະ­ທານ​ຂອງ​ທ່ານ ສະ­ຫວັນ ຫານ​ພົມ ຮອງ​ຫົວ­ໜ້າ​ກົມ​ແຜນ­ການ ແລະ ການ​ເງິນ ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ທ່ານ ປະ­ດິດ ວັນ­ນະ​ລັດ­ສະ­ໝີ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ແຂວງ​ຈຳ­ປາ​ສັກ ພ້ອມ​ດ້ວຍ​ຫົວ­ໜ້າ ຮອງ​ຫົວ­ໜ້າ​ກົມ ພະ​ແນກ​ກະ­ສິ­ກຳ ແລະ ປ່າ­ໄມ້ ແຂວງ​ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ ເຊ​ກອງ ສາ­ລະ​ວັນ ອັດ​ຕະ​ປື ຈຳ­ປາ​ສັກ ແລະ ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຂະ­ແໜງ­ການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ຈັດ​ຂຶ້ນ​ເພື່ອ​ສະ­ຫຼຸບ​ຕີ​ລາ­ຄາ​ຄືນ ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ສົ່ງ­ເສີມ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ແລະ ໂຄງ­ການ​ຄ້ຳ­ປະ­ກັນ​ສະ­ບຽງ​ອາ­ຫານ ໃນ​ໄລ­ຍະ​ຜ່ານ​ມາ ທັງ​ເພື່ອ​ປຶກ­ສາ​ຫາ­ລື​ການ​ກະ­ກຽມ​ບັນ­ດາ​ໂຄງ­ການ​ຈຸດ​ສຸມ ຕາມ​ທີ່​ໄດ້​ກຳ­ນົດ ແລະ ກົນ​ໄກ​ການ­ຈັດ­ຕັ້ງ​ປະ­ຕິ­ບັດ​ໃນ­ຕໍ່­ໜ້າ ໂດຍ​ການ​ລະ­ດົມ​ຂົນ­ຂວາຍ​ຜູ້​ປະ­ກອບ​ການ​ທັງ​ພາຍ​ໃນ ແລະ ຕ່າງ­ປະ­ເທດ ເຂົ້າ​ມາ​ມີ​ສ່ວນ​ຮ່ວມ​ໃນ​ການ​ພັດ­ທະ­ນາ​ໂຄງ­ການ ນອກ­ຈາກ​ນັ້ນ ຍັງ​ໄດ້​ນຳ​ສະ­ເໜີ ແລະ ປຶກ­ສາ​ຫາ­ລື​ກ່ຽວ​ກັບ​ວຽກ​ງານ​ຄຸ້ມ​ຄອງ ແລະ ພັດ­ທະ­ນາ​ທີ່​ດິນ​ກະ­ສິ­ກຳ ວຽກ​ງານ​ຊົນ­ລະ­ປະ­ທານ ວຽກ​ງານ​ແນວ​ພັນ ສົ່ງ­ເສີມ​ວຽກ​ງານ​ຕັ້ງ​ກຸ່ມ ການ​ຜະ­ລິດ​ແບບ​ລວມ​ໝູ່ ການ​ນຳ​ໃຊ້​ກົນ​ຈັກ ແລະ ເຕັກ­ນິກ​ໃໝ່ ວຽກ​ງານ​ກະ­ສິ­ກຳ​ສະ­ອາດ ວຽກ​ງານ​ການ​ລ້ຽງ­ສັດ​ເພື່ອ​ສົ່ງ­ເສີມ​ເປັນ​ຟາມ ການ​ສ້າງ​ເປັນ​ຕ່ອງ​ໂສ້ ແລະ ບັນ­ດາ​ກົນ​ໄກ​ທາງ​ດ້ານ​ພາ­ສີ ອາ­ກອນ ສິນ​ເຊື່ອ ແລະ ອື່ນໆ ຕາມ​ແຜນ​ພັດ­ທະ­ນາ​ກະ­ສິ­ກຳ ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ຕາມ 4 ແຜນ​ງານ​ໃຫຍ່ ໂດຍ​ສະ­ເພາະ​ແມ່ນ ແຜນ​ງານ​ຄ້ຳ­ປະ­ກັນ​ຄວາມ​ໝັ້ນ­ຄົງ​ທາງ​ດ້ານ​ສະ­ບຽງ​ອາ­ຫານ ແລະ ແຜນ​ງານ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ທີ່​ຕິດ​ພັນ​ກັບ​ການ​ປຸງ​ແຕ່ງ.

ຂ່າວທີ່ກ່ຽວຂ້ອງ