ສະຫຼຸບວຽກງານອະໄພຍະໂທດ ທົ່ວປະເທດ ປະຈຳປີ

513 07 ກ.ພ. 2019 ຂ່າວໜ້າ​ໜຶ່ງ
ສະຫຼຸບວຽກງານອະໄພຍະໂທດ ທົ່ວປະເທດ ປະຈຳປີ

    ວັນ​ທີ 6 ກຸມ­ພາ 2019 ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ລະ­ດັບ​ຊາດ ໄດ້​ຈັດ​ກອງ​ປະ­ຊຸມ​ສະ­ຫຼຸບ​ວຽກ​ງານ​ອະ­ໄພ​ຍະ​ໂທດ​ທົ່ວ​ປະ­ເທດ ປະ­ຈຳ​ປີ 2018 ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ການ​ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ມີ​ຜູ້­ຕາງ­ໜ້າ​ຈາກ​ບັນ­ດາ​ແຂວງ ແລະ ກະ­ຊວງ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ດັ່ງ­ກ່າວ ທ່ານ ຄຳ​ສານ ສຸ​ວົງ ປະ­ທານ​ອົງ­ການ​ສານ​ປະ­ຊາ­ຊົນ​ສູງ​ສຸດ ໄດ້​ຂຶ້ນ​ລາຍ​ງານ​ຮ່າງ​ບົດ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອະ­ໄພ​ຍະ​ໂທດ ປະ­ຈຳ​ປີ 2018 ແລະ ທິດ​ທາງ​ໜ້າ­ທີ່​ວຽກ​ງານ​ຈຸດ​ສຸມ ປີ 2019 ໂດຍ​ທ່ານ​ໄດ້​ຍົກ​ໃຫ້​ເຫັນ​ດ້ານ​ດີ ດ້ານ​ອ່ອນ ຂໍ້­ຄົງ­ຄ້າງ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ດັ່ງ­ກ່າວ ເຊິ່ງ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອະ­ໄພ​ຍະ​ໂທດ ຂອງ​ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ແຕ່​ລະ​ລະ­ດັບ ໄດ້​ດຳ­ເນີນ​ໄປ​ຕາມ​ຂັ້ນ​ຕອນ ລະ­ບຽບ​ການ ແລະ ເປັນ​ໝູ່​ຄະ­ນະ ຮັບ­ປະ­ກັນ​ຄວາມ​ຖືກ­ຕ້ອງ ໂປ່ງ​ໃສ ຍຸ­ຕິ​ທຳ ເຊິ່ງ​ນັກ­ໂທດ​ທີ່​ໄດ້​ຮັບ​ການ​ອະ­ໄພ​ຍະ​ໂທດ ຕາມ​ລັດ​ຖະ​ດຳ­ລັດ​ຂອງ​ປະ­ທານ​ປະ­ເທດ ໃນ​ປີ 2018 ມີ ທັງ​ໝົດ 1.711 ຄົນ ຍິງ 300 ຄົນ ຕ່າງ­ປະ­ເທດ 28 ຄົນ ຍິງ 11 ຄົນ ນັກ­ໂທດ​ຕະ­ຫຼອດ​ຊີ­ວິດ ມີ 15 ຄົນ ຍິງ 2 ຄົນ.

    ພາຍ­ຫຼັງ​ມີ​ລັດ​ຖະ​ບັນ­ຍັດ​ຂອງ​ປະ­ທານ​ປະ­ເທດ ວ່າ​ດ້ວຍ​ການ​ໃຫ້​ອະ­ໄພ​ຍະ​ໂທດ ແລະ ມີ​ຄຳ​ແນະ­ນຳ​ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ​ລັດ​ຖະ​ບັນ­ຍັດ ເຫັນ​ວ່າ ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ລະ­ດັບ​ຊາດ ກະ­ຊວງ ແຂວງ ນະ­ຄອນ­ຫຼວງ ສ່ວນ​ຫຼາຍ​ແມ່ນ​ຈັດ​ຕັ້ງ​ການ​ຄົ້ນ­ຄວ້າ ແລະ ສະ­ເໜີ​ອະ­ໄພ​ຍະ​ໂທດ​ໃຫ້​ແກ່​ນັກ­ໂທດ ແມ່ນ​ຖືກ­ຕ້ອງ​ຕາມ​ລັດ​ຖະ​ບັນ­ຍັດ​ຂອງ​ປະ­ທານ​ປະ­ເທດ ແລະ ຄຳ​ແນະ­ນຳ​ຂອງ​ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ລະ­ດັບ​ຊາດ​ວາງ​ອອກ.

    ໂອ­ກາດ​ດຽວ​ກັນ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ເນັ້ນ​ໃຫ້​ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ລະ­ດັບ​ແຂວງ ແລະ ນະ­ຄອນ­ຫຼວງ ເພີ່ມ​ທະ­ວີ​ຈັດ​ຕັ້ງ​ເຊື່ອມ​ຊຶມ​ລັດ​ຖະ​ບັນ­ຍັດ ແນວ­ທາງ​ນະ­ໂຍ­ບາຍ ກໍ​ຄື ບັນ­ດາ​ເອ­ກະ­ສານ​ຕ່າງໆ ທີ່​ກ່ຽວ­ຂ້ອງ​ກັບ​ວຽກ​ງານ​ອະ­ໄພ​ຍະ​ໂທດ ເພື່ອ​ໃຫ້​ເຫັນ​ໄດ້​ຄວາມ​ສຳ­ຄັນ ແລະ ເພີ່ມ​ທະ­ວີ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ວຽກ​ງານ ຂອງ​ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ແຕ່​ລະ​ລະ­ດັບ ຈັດ​ຕັ້ງ​ເຜີຍ­ແຜ່​ລັດ​ຖະ​ບັນ­ຍັດ ໃຫ້​ບັນ­ດາ​ເປົ້າ​ໝາຍ​ໃນ​ທົ່ວ​ສັງ­ຄົມ ດ້ວຍ​ຮູບ​ການ​ຕ່າງໆ ນັບ​ທັງ​ນັກ­ໂທດ​ຕະ­ຫຼອດ​ຮອດ​ຄອບ­ຄົວ ແລະ ຍາດ­ຕິ​ພີ່­ນ້ອງ​ຂອງ​ເຂົາ­ເຈົ້າ​ໄດ້​ຮັບ​ຮູ້ ເຂົ້າ­ໃຈ​ຢ່າງ​ເລິກ­ເຊິ່ງ ທົ່ວ​ເຖິງ ພ້ອມ​ດຽວ​ກັນ​ນັ້ນ ໃຫ້​ຄະ­ນະ​ກຳ­ມະ­ການ​ອະ­ໄພ​ຍະ​ໂທດ​ລະ­ດັບ​ຕ່າງໆ ລົງ​ຕິດ­ຕາມ​ຊຸກ­ຍູ້ ສະ­ຫຼຸບ​ຖອດ​ຖອນ​ບົດ­ຮຽນ ແລະ ສ່ອງ​ແສງ​ລາຍ​ງານ​ແຕ່​ລະ​ໄລ­ຍະ​ເປັນ​ປົກ­ກະ­ຕິ ເພື່ອ​ຮັບ­ປະ­ກັນ​ວຽກ​ງານ​ດຳ­ເນີນ​ໄປ​ຢ່າງ​ຖືກ­ຕ້ອງ ໂປ່ງ​ໃສ ແລະ ຍຸ­ຕິ​ທຳ.

ຂ່າວທີ່ກ່ຽວຂ້ອງ