ເບິ່ງບ້ານເຂົາເອົາບົດຮຽນ 07/02/2019

334 07 ກ.ພ. 2019 ຫົວຂໍ້ຂ່າວອື່ນໆ

    ພົບ​ກັນ​ຕາມ​ເຄີຍ​ກັບ​ຄໍ​ລຳ “ເບິ່ງ​ບ້ານ​ເຂົາ​ເອົາ​ບົດ­ຮຽນ” ເຊິ່ງ​ມີ​ທັງ​ບົດ­ຮຽນ​ທີ່​ອາດ​ນຳ​ໃຊ້​ໄດ້​ຢູ້​ບ້ານ​ເຮົາ ແລະ ມີ​ທັງ​ບົດ­ຮຽນ​ທີ່​ເບິ່ງ​ໄວ້​ເປັນ​ສະ­ຕິ​ເຕືອນ­ໃຈ ສຳ­ລັບ​ວັນ​ນີ້ ມີ​ເລື່ອງ​ກ່ຽວ​ກັບ​ມາດ​ຕະ­ການ​ຂອງ​ທາງ​ການ​ປະ­ເທດ​ເນ​ປານ ທີ່​ຫ້າມ​ການ​ນຳ​ຂັ້ນ​ລັດ­ຖະ­ມົນ­ຕີ ເດີນ­ທາງ​ໄປ​ຕ່າງ­ປະ­ເທດ​ຖີ່​ໂພດ ແລະ ບໍ່​ສົມ​ເຫດ​ສົມ​ຜົນ ເພາະ​ຈະ​ເປັນ​ການ​ສິ້ນ​ເປືອງ​ງົບ­ປະ­ມານ​ຂອງ​ລັດ ແຕ່​ຂ່າວ​ບອກ​ວ່າ ມາດ​ຕະ­ການ​ດັ່ງ­ກ່າວ​ໄດ້​ກາຍ­ເປັນ​ໝັນ ເພາະ​ຂາດ​ຄວາມ​ຈິງ​ຈັງ​ໃນ​ການ​ປະ­ຕິ­ບັດ​ເລື່ອງ​ທີ​ສອງ ແມ່ນ​ກ່ຽວ​ກັບ​ຂໍ້​ກຳ­ນົດ ວ່າ​ດ້ວຍ​ການ​ແຕ່ງ­ດອງ​ຄືນ­ໃໝ່​ຂອງ​ແມ່­ຮ້າງ ຊາວ​ຍີ່­ປຸ່ນ.

    ທີ່ ເນ​ປານ: ເມື່ອ​ປະ­ມານ 2 ປີ­ຜ່ານ­ມາ (ວຽງ​ຈັນ​ທາມ 14 ກັນ­ຍາ 2017) ແຫຼ່ງ​ຂ່າວ​ກັດ​ມັນ​ດູ​ພົດ (Kathmandu Post) ໄດ້​ໃຫ້​ຮູ້​ວ່າ ທ່ານ​ນາ­ຍົກ­ລັດ­ຖະ­ມົນ­ຕີ ເຊີ ບາ​ຮາດ ດິວ​ບາ ຂອງ​ເນ​ປານ ໄດ້​ແນະ­ນຳ​ໃຫ້​ທ່ານ​ລັດ­ຖະ­ມົນ­ຕີ ຫົວ­ໜ້າ​ຫ້ອງ​ວ່າ­ການ​ລັດ­ຖະ­ບານ​ຮັບ­ຜິດ­ຊອບ​ຄວບ​ຄຸມ ການ​ເດີນ­ທາງ​ໄປ​ເຄື່ອນ​ໄຫວ​ຕ່າງ­ປະ­ເທດ​ຂອງ​ພະ­ນັກ­ງານ​ຂັ້ນ​ນຳ ລວມ​ທັງ​ບັນ­ດາ​ທ່ານ​ລັດ­ຖະ­ມົນ­ຕີ​ຢ່າງ​ຈິງ​ຈັງ ເພາະ​ໃນ​ໄລ­ຍະ​ຜ່ານ​ມາດ​ຕະ­ການ​ດັ່ງ­ກ່າວ​ໄດ້​ກາຍ­ເປັນ​ໝັນ ເພາະ​ໄຮ້​ປະ­ສິດ­ທິ­ພາບ ອັນ​ໄດ້​ເຮັດ​ໃຫ້​ມີ​ສຽງ​ວິ­ພາກ​ວິ­ຈານ​ຢ່າງ​ກວ້າງ­ຂວາງ​ຈາກ​ສັງ­ຄົມ ຂໍ້​ຫ້າມ​ດັ່ງ­ກ່າວ ມີ​ເປົ້າ​ໝາຍ​ຈຳ­ກັດ​ການ​ເດີນ­ທາງ​ໄປ​ເຄື່ອນ​ໄຫວ​ຕ່າງ­ປະ­ເທດ ທີ່​ບໍ່​ມີ​ເຫດ­ຜົນ​ອັນ​ຄວນ​ຂອງ​ບຸກ­ຄົນ​ລະ­ດັບ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ພະ­ນັກ­ງານ​ອາ­ວຸ­ໂສ ກ່ອນ​ໜ້າ​ນັ້ນ ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ເຄີຍ​ໄດ້​ມອບ​ໜ້າ­ທີ່​ຄວບ​ຄຸມ​ດັ່ງ­ກ່າວ​ໃຫ້​ອະ­ດີດ​ລັດ­ຖະ­ມົນ­ຕີ ຫົວ­ໜ້າ​ຫ້ອງ​ວ່າ­ການ​ລັດ­ຖະ­ບານ​ເຮັດ ເຊັ່ນ: ທ່ານ ກິ​ຊໍ ເຈັດ​ສ​ຕຼີ ແຕ່​ບໍ່​ໄດ້­ຜົນ​ພິ­ສູດ​ໄດ້​ຈາກ​ການ​ເດີນ­ທາງ ໄປ​ເຄື່ອນ​ໄຫວ​ຕ່າງ­ປະ­ເທດ​ຂອງ​ພະ­ນັກ­ງານ​ການ​ນຳ​ຂັ້ນ​ຮອງ​ລັດ­ຖະ­ມົນ­ຕີ ຈຳ­ນວນ 10 ທ່ານ ໃນ​ວັນ​ທີ 12 ເດືອນ​ກັນ­ຍາ ປີ 2017 ແລະ ພະ­ນັກ­ງານ​ຈາກ​ກອງ​ເລ­ຂາ 15 ທ່ານ ໃນ​ໄລ­ຍະ​ດຽວ​ກັນ ທ່ານ​ລັດ­ຖະ­ມົນ­ຕີ​ພະ­ລັງ­ງານ ແລະ ພະ­ນັກ­ງານ​ລະ­ດັບ​ເລ­ຂາ­ທິ­ການ ກໍ​ໄດ້​ອອກ​ເດີນ­ທາງ​ໄປ​ປະ­ເທດ​ອົດ​ສະ​ຕຣາ​ລີ ຂ່າວ​ສັ້ນ​ບົດ​ນີ້​ບໍ່​ໄດ້​ໃຫ້​ລາຍ​ລະ­ອຽດ ກ່ຽວ​ກັບ​ປະ­ເທດ​ການ​ເດີນ­ທາງ​ໄປ​ຕ່າງ­ປະ­ເທດ ທີ່​ນອນ​ຢູ່​ໃນ​ຂໍ້​ກຳ­ນົດ​ຫ້າມ ເພາະ​ຖື​ວ່າ​ບໍ່​ມີ​ເຫດ­ຜົນ​ພຽງ­ພໍ ມາດ​ຕະ­ການ​ຫ້າມ​ພະ­ນັກ­ງານ​ການ​ນຳ​ເດີນ­ທາງ​ໄປ​ເຄື່ອນ​ໄຫວ​ຕ່າງ­ປະ­ເທດ ແບບ​ກິ­ກີ (ອັນ​ໃດ​ກໍ​ໄປ​ຮ່ວມ​ໝົດ) ນັ້ນ​ຫຼາຍ​ປະ­ເທດ ໄດ້​ນຳ​ໃຊ້​ເພື່ອ​ການ​ປະ­ຢັດ​ຮັກ​ສາຍ­ແອວ​ຍາມ​ເຂົ້າ​ຍາກ​ໝາກ​ແພງ ເມື່ອ​ສາມ​ປີ­ຜ່ານ­ມາ ກໍ​ມີ​ນັກ​ຂ່າວ​ທາງ​ການ​ຂອງ​ນະ­ຄອນ­ຫຼວງ​ຮ່າ​ໂນ້ຍ ກໍ​ໄດ້​ມີ​ມາດ​ຕະ­ການ​ຫ້າມ​ພະ­ນັກ­ງານ​ການ​ນຳ​ຂອງ​ນະ­ຄອນ­ຫຼວງ ເດີນ­ທາງ​ໄປ​ຕ່າງ­ປະ­ເທດ​ຖີ່​ເກີນ​ກວ່າ​ໄດ້​ກຳ­ນົດ​ໄວ້.

    ທີ່ ຍີ່­ປຸ່ນ: ໃນ​ຕົ້ນ​ປີ 2016 ໃນ​ວັນ​ແມ່­ຍິງ​ສາ­ກົນ (8 ມີ­ນາ 2016) ລັດ­ຖະ­ບານ​ຍີ່­ປຸ່ນ ໄດ້​ອອກ​ມະ­ຕິ​ຫຼຸດ​ໄລ­ຍະ​ການ​ຫ້າມ​ຍິງ​ແມ່­ຮ້າງ ແຕ່ງ­ດອງ​ຄືນ­ໃໝ່ ຈາກ 180 ວັນ ຫຼື 6 ເດືອນ ລົງ​ໃຫ້​ເຫຼືອ​ສູງ​ສຸດ 100 ວັນ (3 ເດືອນ​ປາຍ) ແຕ່​ຖ້າ​ແພດ​ຢັ້ງ­ຢືນ​ວ່າ ຍິງ​ແມ່­ຮ້າງ​ທີ່​ກ່ຽວ­ຂ້ອງ​ບໍ່​ໄດ້​ຖື­ພາ​ໃນ​ໄລ­ຍະ​ຢ່າ​ຮ້າງ ຜູ້­ກ່ຽວ​ກໍ​ສາ­ມາດ​ແຕ່ງ­ດອງ​ໄດ້​ທັນ­ທີ​ໂລດ ບໍ່​ຈຳ­ເປັນ​ຕ້ອງ​ລໍ­ຖ້າ​ຮອດ 100 ວັນ ການ​ກຳ­ນົດ​ໃຫ້​ແມ່­ຮ້າງ​ຕ້ອງ​ລໍ­ຖ້າ​ຮອດ 180 ວັນ ກ່ອນ​ຈະ​ສາ­ມາດ​ແຕ່ງ­ດອງ​ຄືນ­ໃໝ່​ໄດ້​ນັ້ນ ໄດ້​ປະ­ຕິ­ບັດ​ກັນ​ມາ​ເປັນ​ເວ­ລາ​ຫຼາຍ 10 ປີ ກ່ອນ​ມີ​ລະ­ບົບ​ກວດ​ດີ​ເອັນ​ເອ (DNA) ເຫດ­ຜົນ​ທີ່​ຕ້ອງ​ໃຫ້​ຍິງ​ແມ່­ຮ້າງ ລໍ­ຄອຍ​ເປັນ​ເວ­ລາ​ດົນ​ນານ​ກ່ອນ​ຈະ​ແຕ່ງ­ດອງ​ຄືນ­ໃໝ່ ກໍ​ແມ່ນ​ເພື່ອ​ໃຫ້​ແນ່​ໃຈ​ວ່າ ຍິງ​ຄົນ​ດັ່ງ­ກ່າວ​ບໍ່​ໄດ້​ຖື­ພາ​ຈາກ​ຜົວ​ຄົນ​ເກົ່າ ເພາະ​ຖ້າ​ຖື­ພາ​ແລ້ວ​ຜັດ​ໄປ​ເອົາ​ຜົວ​ໃໝ່​ບັນ­ຫາ​ຄອບ­ຄົວ​ກໍ​ຈະ​ຕາມ​ມາ.

    ແນວ­ໃດ​ກໍ​ດີ ການ​ຫຼຸດ​ໄລ­ຍະ​ລໍ­ຖ້າ​ຈາກ 180 ວັນ ມາ​ເປັນ 100 ວັນ​ນີ້ ກໍ​ຍັງ​ໄດ້​ຮັບ​ສຽງ​ວິ­ພາກ​ວິ­ຈານ​ຈາກ​ອົງ­ການ​ຊີ​ດໍ (CEDAW-ສົນ­ທິ­ສັນ­ຍາ​ວ່າ​ດ້ວຍ​ການ​ລຶ­ບລ້າງ​ທຸກ​ຮູບ​ການ​ຈຳ­ແນກ​ແມ່­ຍິງ) ວ່າ​ຍັງ​ບໍ່​ພຽງ­ພໍ​ຕໍ່​ການ​ຍົກ​ລະ­ດັບ​ສິດ­ທິ​ຂອງ​ແມ່­ຍິງ​ຕົວ​ຈິງ (ຂ່າວ​ນີ້ ແກະ​ມາ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ 24-27 ມີ­ນາ 2016).

ຂ່າວທີ່ກ່ຽວຂ້ອງ