ຂ່າວຫຼ້າສຸດ

IMF ເຫັນ​ດີ​ປ່ອຍ​ເງິນ​ກູ້ 2 ຕື້​ໂດ​ລາ ໃຫ້​ແກ່​ເອ​ຢິບ

855 07 ກ.ພ. 2019 ຂ່າວຕ່າງປະເທດ
IMF ເຫັນ​ດີ​ປ່ອຍ​ເງິນ​ກູ້ 2 ຕື້​ໂດ​ລາ ໃຫ້​ແກ່​ເອ​ຢິບ

    ທ່ານ ມໍ​ຮາ​ເມັດ ມາ​ອິດ ລັດຖະມົນຕີ​ກະຊວງ​ການ​ເງິນ​ຂອງ​ເອ​ຢິບ ແຈ້ງ​ໃຫ້​ຮູ້ເມື່ອ​ວັນ​ທີ 4 ກຸມພາ​ນີ້​ວ່າ ກອງ​ທຶນ​ເງິນຕາ​ສາກົນ (IMF) ໄດ້​ເຫັນ​ດີ​ເປັນ​ເອກະສັນ ຕໍ່​ການ​ອະນຸມັດ​ບ້ວງ​ເງິນ​ກູ້​ທີ​ຫ້າ ມູນ​ຄ່າ 2 ຕື້​ໂດ​ລາ​ສະຫະລັດ ໃຫ້​ແກ່​ເອ​ຢິບ ພາຍ​ໃນ​ຊຸມ​ມື້​ຂ້າງ​ໜ້າ​ນີ້.

    ຂ່າວ​ແຈ້ງວ່າ ການ​ທີ່ IMF ເຫັນ​ດີ​ເປັນ​ເອກະສັນ ອະນຸມັດ​ບ້ວງ​ເງິນ​ກູ້​ດັ່ງກ່າວ ເປັນ​ຜົນ​ທີ່​ຊີ້​ໃຫ້​ເຫັນ​ວ່າ ການ​ປະຕິ​ຮູບ​ເສດຖະກິດ​ຂອງ​ເອ​ຢິບ ໄດ້​ປະສົບ​ຄວາມ​ສຳເລັດ ແລະ​ວ່າ ເອ​ຢິບ​ພວມ​ປະຕິບັດ​ໂຄງການ​ນີ້​ຢ່າງ​ຈິງ​ຈັງ.

    ກ່ອນ​ໜ້ານ​ນັ້ນ ນາງ ຄຣິ​ຕິນ ລາ​ກາດ ຜູ້ອຳນວຍການ​ໃຫຍ່​ຂອງ IMF ໄດ້​ກ່າວ​ຕີ​ລາຄາ​ສູງ ຕໍ່​ຜົນສຳເລັດ ແລະ ​ຄວາມ​ກ້າວໜ້າ​ຫຼາຍ​ພໍ​ສົມຄວນ​ຂອງ​ເອ​ຢິບ ຢູ່​ໃນ​ຄວາມ​ໝັ້ນຄົງ​ທາງ​ດ້ານ​ເສດຖະກິດ ມະຫາ​ພາກ. ນາງ ລາ​ກາດ ໃຫ້​ຄວາມ​ໃສ່ໃຈ​ວ່າ ເອ​ຢິບ ນອນ​ຢູ່​ໃນ​ໝວດ​ປະເທດ​ທີ່​ມີ​ຄວາມ​ເຕີບ​ໂຕ ເສດຖະກິດ​ສູງ​ຢູ່​ໃນ​ພາກ​ພື້ນ ເມື່ອ​ອັດຕາ​ສ່ວນ​ຂາດ​ດຸນ​ງົບປະມານ​ໄດ້​ຫຼຸດ​ລົງ ເງິນ​ເຟີ້​ໄດ້​ຮັບ​ການ ຄວບ​ຄຸມ ແລະ​ພວມ​ກ້າວ​ໄປ​ສູ່​ແດນ​ຄາດໝາຍ​ຂອງ​ທະນາຄານ​ກາງ​ເອ​ຢິບ ພາຍ​ໃນ​ທ້າຍ​ປີ​ນີ້. ຄຽງ​ຄູ່​ກັນ​ນັ້ນ ອັດຕາ​ສ່ວນ​ຄົນ​ຫວ່າງ​ງານ​ຢູ່​ໃນ​ເອ​ຢິບ ກໍ​ໄດ້​ຫຼຸດ​ລົງ​ໄປ​ຢູ່​ທີ່​ປະມານ 10% ທີ່​ນັບ​ວ່າ​ເປັນ ລະດັບ​ຕ່ຳ​ສຸດ ນັບ​ແຕ່​ປີ 2011 ເປັນຕົ້ນ​ມາ.

   ໂຄງການ​ໃຫ້​ເງິນ​ກູ້​ແກ່​ເອ​ຢິບ ໄດ້​ຮັບ​ການ​ລົງ​ນາມ​ຈາກ​ສອງ​ຝ່າຍ ເມື່ອ​ເດືອນ​ພະຈິກ ປີ 2016 ແລະ ເມື່ອ​ໄດ້​ຮັບ​ບ້ວງ​ເງິນ​ກູ້​ດັ່ງກ່າວ ລວມ​ແລ້ວ ເອ​ຢິບ​ຈະ​ໄດ້​ຮັບ 10 ຕື້​ໂດ​ລາ​ສະຫະລັດ ຢູ່​ໃນ​ບ້ວງ ເງິນ​ກູ້​ຕາມ​ສັນຍາ 12 ຕື້​ໂດ​ລາ​ສະຫະລັດ ຈາກ IMF.

ຂ່າວທີ່ກ່ຽວຂ້ອງ