ຂ່າວຫຼ້າສຸດ

ມິດຊູບິຊິ ແຕ່ງຕັ້ງ ລົດແກ້ວ ເປັນຜູ້ນຳສະເໜີຜະລິດຕະພັນ

574 08 ກ.ພ. 2019 ຂ່າວໜ້າ​ໜຶ່ງ
ມິດຊູບິຊິ ແຕ່ງຕັ້ງ ລົດແກ້ວ ເປັນຜູ້ນຳສະເໜີຜະລິດຕະພັນ

    ບໍ­ລິ­ສັດ MITSUBISHI MOTOR LAOS ມອບ​ເງິນ​ສະ­ໜັບ­ສະ­ໜູນ 27 ລ້ານ​ກີບ ໃຫ້​ນາງ ລົດ​ແກ້ວ ອິນ​ທະ​ກຸມ­ມານ ນັກ­ກີ­ລາ​ແລ່ນ-ລານ​ທີມ​ຊາດ​ລາວ ພ້ອມ​ທັງ​ແຕ່ງ­ຕັ້ງ ນາງ ລົດ​ແກ້ວ ອິນ​ທະ​ກຸມ­ມານ ໃຫ້​ເປັນ​ຜູ້­ນຳ​ສະ­ເໜີ​ຜະ­ລິດ​ຕະ​ພັນ (Presenter) ຄົນ​ທຳ​ອິດ​ຂອງ​ບໍ­ລິ­ສັດ MITSUBISHI MOTOR LAOS ເພື່ອ​ສະ­ໜັບ­ສະ­ໜູນ​ໃຫ້​ນັກ­ກີ­ລາ​ລາວ ກ້າວ​ສູ່​ຄວາມ​ສຳ­ເລັດ​ທີ່​ຍິ່ງ​ໃຫຍ່​ກວ່າ​ເກົ່າ ທັງ​ເປັນ​ການ​ຊ່ວຍ​ສະ­ໜັບ­ສະ­ໜູນ​ຍອດ​ຂາຍ­ຂອງ​ບໍ­ລິ­ສັດ MITSUBISHI MOTOR LAOS ໃຫ້​ເພີ່ມ​ຂຶ້ນ.

    ພິ­ທີ​ມອບ-ຮັບ​ເງິນ​ສະ­ໜັບ­ສະ­ໜູນ ແລະ ລົງ​ນາມ​ສັນ­ຍາ​ແຕ່ງ­ຕັ້ງ​ດັ່ງ­ກ່າວ ຈັດ​ຂຶ້ນ​ວັນ​ທີ 7 ກຸມ­ພາ 2019 ຢູ່​ຫ້ອງ​ຂາຍ MITSUBISHI MOTOR LAOS ບ້ານ​ອຸບ​ມຸງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ຊັດ​ສະ​ວານ ເພີ່ມ​ສຸກ​ຈາ­ລຸ​ຊັບ ປະ­ທານ​ບໍ­ລິ­ສັດ MITSUBISHI MOTOR LAOS ທ່ານ ກະ­ເສມ ອິນ­ທາ​ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຊັດ​ສະ​ວານ ເພີ່ມ​ສຸກ​ຈາ­ລຸ​ຊັບ ກ່າວ​ວ່າ: ການ​ເລືອກ​ເອົາ​ນາງ ລົດ​ແກ້ວ ອິນ​ທະ​ກຸມ­ມານ ເປັນ Presenter ຄັ້ງ​ນີ້ ເພື່ອ​ປະ­ຕິ­ບັດ​ຕາມ​ນະ­ໂຍ­ບາຍ​ຂອງ​ບໍ­ລິ­ສັດ MITSUBISHI MOTOR ປະ­ເທດ​ຍີ່­ປຸ່ນ ທີ່​ຕ້ອງ­ການ​ສະ­ໜັບ­ສະ­ໜູນ​ນັກ­ກີ­ລາ (ກ່ຽວ​ກັບ​ຄວາມ​ໄວ) ແຕ່​ລະ​ປະ­ເທດ ເຊິ່ງ​ປະ­ເທດ​ອື່ນ​ຈະ​ເປັນ​ນັກ​ຂັບ​ລົດ​ທີ່​ຂ້ອນ​ຂ້າງ​ມີ​ຄວາມ​ສາ­ມາດ ລົດ​ແກ້ວ ກໍ​ເປັນ​ນັກ­ກີ­ລາ​ໜຶ່ງ​ທີ່​ໃຊ້​ຄວາມ​ໄວ ມີ​ພຶດ­ຕິ​ກຳ​ດີ ມີ​ຄວາມ​ສາ­ມາດ ແລະ ສ້າງ​ຊື່​ສຽງ​ໃຫ້ ສປປ ລາວ ທັງ​ລະ­ດັບ​ປະ­ເທດ ກໍ​ຄື ພາກ​ພື້ນ.

    ສັນ­ຍາ​ຄັ້ງ​ນີ້ ເປັນ​ການ​ຮ່ວມ​ມື​ປີ​ຕໍ່​ປີ ເຊິ່ງ​ລົດ​ແກ້ວ ຕ້ອງ​ເປັນ​ຕົວ​ແທນ MITSUBISHI MOTOR LAOS ໂດຍ​ສະ­ເພາະ ການ​ຊ່ວຍ​ໂຄ­ສະ­ນາ ຊຸກ­ຍູ້-ສົ່ງ­ເສີມ​ການ​ຂາຍ​ຜະ­ລິດ​ຕະ​ພັນ​ຂອງ MITSUBISHI ທີ່​ສຳ­ຄັນ​ພວກ​ເຮົາ​ຕ້ອງ­ການ​ຊ່ວຍ​ໃຫ້​ລົດ​ແກ້ວ ມີ​ທຶນ​ເພື່ອ​ໄປ​ເຂົ້າ​ຮ່ວມ​ງານ​ແຂ່ງ­ຂັນ​ຕ່າງໆ ທັງ​ລະ­ດັບ​ປະ­ເທດ ກໍ​ຄື ຕ່າງ­ປະ­ເທດ ແລະ ຕ້ອງ­ການ​ເປັນ​ສ່ວນ​ໜຶ່ງ​ໃນ​ຄວາມ​ສຳ­ເລັດ​ຂອງ​ລົດ​ແກ້ວ ແລະ ຢາກ​ໃຫ້ MITSUBISHI MOTOR LAOS ແລະ ລົດ​ແກ້ວ ມີ​ຄວາມ​ສຳ­ເລັດ​ໄປ​ພ້ອມ​ກັນ.

ຂ່າວທີ່ກ່ຽວຂ້ອງ