ສຸກສະຫວັນ ມະນີວົງໄຊ ຊະນະເລີດແຕ້ມຮູບລະດັບໂລກ

501 08 ກ.ພ. 2019 ຂ່າວໜ້າ​ໜຶ່ງ
ສຸກສະຫວັນ ມະນີວົງໄຊ ຊະນະເລີດແຕ້ມຮູບລະດັບໂລກ

    ພິ­ທີ​ປະ­ດັບ​ຫຼຽນ​ໄຊ​ແຮງ​ງານ ຊັ້ນ II ໃຫ້​ນາງ ສຸກ​ສະ­ຫວັນ ມະ­ນີ​ວົງ​ໄຊ ນັກ­ຮຽນ​ໂຮງ­ຮຽນ ມສ ເພຍ​ວັດ ທີ່​ໄດ້​ຊະ­ນະ​ເລີດ​ການ​ແຂ່ງ­ຂັນ​ຄັດ​ເລືອກ ແຕ້ມ​ຮູບ​ລົດ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ (Dream Car Art contest) ຢູ່​ປະ­ເທດ​ຍີ່­ປຸ່ນ ຈັດ​ຂຶ້ນ​ວັນ​ທີ 6 ກຸມ­ພາ 2019 ຢູ່​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ເຊິ່ງ​ປະ­ດັບ​ຫຼຽນ​ໂດຍ​ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ​ກະ­ຊວງ ສສກ ມີ​ທ່ານ ມາ​ຊາ​ອະ​ກິ ຄາ​ວາ​ບາ​ຕະ ຜູ້­ອຳ­ນວຍ­ການ​ບໍ­ລິ­ສັດ ໂຕ​ໂຢ​ຕ້າ​ລາວ ຈຳ­ກັດ ທ່ານ ຈັດ​ກະ­ລິນ ຊົນ​ນະ­ທີ​ທອນ ຜູ້­ອຳ­ນວຍ­ການ​ສຳ­ນັກ­ງານ​ໂຄງ­ການ​ເຂດ​ພາກ​ພື້ນ​ແມ່­ນ້ຳ​ຂອງ ບໍ­ລິ­ສັດ ໂຕ​ໂຢ​ຕ້າ​ມໍ​ເຕີ້​ປະ­ເທດ​ໄທ ຈຳ­ກັດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ຄັດ​ເລືອກ​ຮູບ­ແຕ້ມ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ ເປັນ​ກິດ­ຈະ­ກຳ​ໜຶ່ງ​ທີ່​ບໍ­ລິ­ສັດ​ໂຕ​ໂຢ​ຕ້າ ໄດ້​ລິ​ເລີ່ມ​ຈັດ​ຕັ້ງ​ປະ­ຕິ­ບັດ​ຢູ່​ລາວ ມາ​ແຕ່​ປີ 2011 ແລະ ປີ​ນີ້​ເປັນ​ຄັ້ງ​ທີ 12 ໂຄງ­ການ​ດັ່ງ­ກ່າວ ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ກະ­ຊວງ​ສຶກ​ສາ​ທິ​ການ ແລະ ກີ­ລາ ໃນ​ສົກ­ຮຽນ 2017-2018 ໄດ້​ເປີດ​ກວ້າງ​ໃຫ້​ເຍົາ­ວະ​ຊົນ​ລາວ​ທົ່ວ​ປະ­ເທດ ສົ່ງ​ຜົນ­ງານ​ຮູບ­ແຕ້ມ​ເຂົ້າ​ຮ່ວມ​ການ​ຄັດ​ເລືອກ 5.064 ຜົນ­ງານ ການ​ຄັດ​ເລືອກ​ຮອບ​ທຳ​ອິດ​ໄດ້​ຄັດ​ເລືອກ​ໄດ້ 30 ຜົນ­ງານ ຮອບ​ຮອງ 15 ຜົນ­ງານ ແລະ ຮອບ​ຊະ­ນະ​ເລີດ​ຄັດ​ເລືອກ​ໄດ້ 9 ຜົນ­ງານ ຈາກ​ແຕ່​ລະ​ປະ­ເພດ​ອາ­ຍຸ ຈາກ​ນັ້ນ ຄະ­ນະ​ຮັບ­ຜິດ­ຊອບ​ໂຄງ­ການ​ກໍ​ໄດ້​ນຳ​ເອົາ 9 ຜົນ­ງານ​ໃນ​ຮອບ​ສຸດ​ທ້າຍ ສົ່ງ​ໄປ​ຄັດ​ເລືອກ​ໃນ​ລະ­ດັບ​ໂລກ​ຢູ່​ປະ­ເທດ​ຍີ່­ປຸ່ນ ເຊິ່ງ​ມີ 76 ຜົນ­ງານ​ເຂົ້າ​ຮ່ວມ ຜ່ານ​ການ​ຄັດ​ເລືອກ​ຮູບ­ແຕ້ມ​ຂອງ​ນາງ ສຸກ​ສະ­ຫວັນ ມະ­ນີ​ວົງ​ໄຊ ອາ­ຍຸ 15 ປີ ສປປ ລາວ ໄດ້​ຮັບ​ຊະ­ນະ​ເລີດ​ການ​ແຂ່ງ­ຂັນ Toyota Dream Car Art Contest ປະ­ຈຳ​ປີ 2018.

    ສຳ­ລັບ​ກິດ­ຈະ­ກຳ​ໃນ­ຕໍ່­ໜ້າ ບໍ­ລິ­ສັດ ໂຕ​ໂຢ​ຕ້າ​ລາວ ຈຳ­ກັດ ຈະ​ສືບ­ຕໍ່​ສະ­ໜັບ­ສະ­ໜູນ​ໂຄງ­ການ​ດ້ານ​ການ​ສຶກ​ສາ ແລະ ສິ­ລະ​ປະ-ວັດ­ທະ­ນະ­ທຳ ເພື່ອ​ເປີດ​ໂອ­ກາດ​ໃຫ້​ເຍົາ­ວະ​ຊົນ​ລາວ​ທົ່ວ​ປະ­ເທດ ໄດ້​ສະ­ແດງ​ຄວາມ​ຮູ້-ຄວາມ​ສາ­ມາດ​ດ້ານ​ສິ­ລະ​ປະ​ຂອງ​ຕົນ ໂດຍ​ສະ­ເພາະ ການ​ເຂົ້າ​ຮ່ວມ​ໂຄງ­ການ​ຄັດ​ເລືອກ​ຮູບ­ແຕ້ມ​ລົດ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ