ຮ່ວມກັນໃຫ້ຄວາມຮູ້ອັນຕະລາຍ ຈາກລະເບີດບໍ່ທັນແຕກ

502 08 ກ.ພ. 2019 ຂ່າວໜ້າ​ໜຶ່ງ
ຮ່ວມກັນໃຫ້ຄວາມຮູ້ອັນຕະລາຍ ຈາກລະເບີດບໍ່ທັນແຕກ

    ກົມ​ສາ­ມັນ​ສຶກ​ສາ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ແລະ ອົງ­ການ​ການ​ສຶກ​ສາ​ໂລກ ຮ່ວມ​ມື​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ທີ່​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ 88 ເມືອງ​ໃນ 10 ແຂວງ (ຫົວ­ພັນ ຫຼວງ​ພະ​ບາງ ຊຽງ​ຂວາງ ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ ສາ­ລະ​ວັນ ເຊ​ກອງ ຈຳ­ປາ​ສັກ ແລະ ອັດ​ຕະ​ປື) ສປປ ລາວ ເພື່ອ​ຮັບ­ປະ­ກັນ​ໃຫ້​ນັກ­ຮຽນ​ຊັ້ນ​ປະ­ຖົມ ແລະ ຊຸມ​ຊົນ​ທີ່​ມີ​ຄວາມ​ສ່ຽງ ໄດ້​ຮັບ​ການ​ຮຽນ​ຮູ້​ເຖິງ​ຄວາມ​ອັນ­ຕະ­ລາຍ​ຂອງ​ລະ­ເບີດ​ບໍ່​ທັນ​ແຕກ ໂດຍ​ຜ່ານ​ການ​ສ້າງ​ຄວາມ​ສາ­ມາດ​ໃຫ້​ຄູ​ສອນ.

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ໂຄງ­ການ​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ ຈັດ​ຂຶ້ນ​ວັນ​ທີ 6 ກຸມ­ພາ 2019 ຢູ່​ກະ­ຊວງ ສສກ ລະ­ຫວ່າງ ທ່ານ​ນາງ ສີ​ສຸກ ວົງ​ວິ­ຈິດ ຫົວ­ໜ້າ​ກົມ​ສາ­ມັນ​ສຶກ​ສາ ແລະ ທ່ານ​ນາງ ຊາ​ຣາ ບຣູ​ນາ​ກີ ຫົວ­ໜ້າ​ອົງ­ການ​ການ​ສຶກ​ສາ​ໂລກ ປະ­ຈຳ ສປປ ລາວ ມີ​ທ່ານ ບົວ​ລານ ສີ​ລິ​ປັນ­ຍາ ຮອງ​ລັດ­ຖະ­ມົນ­ຕີ ກະ­ຊວງ ສສກ ທ່ານ​ນາງ ຣີ​ນາ ບິດ​ເຕີ້ ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ປະ­ຈຳ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ນີ້ ເປັນ​ໂຄງ­ການ​ທີ່​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ ຈາກ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ ເພື່ອ​ຮັບ­ປະ­ກັນ​ໃຫ້​ນັກ­ຮຽນ​ຊັ້ນ​ປະ­ຖົມ ແລະ ຊຸມ​ຊົນ​ທີ່​ມີ​ຄວາມ​ສ່ຽງ ໄດ້​ຮັບ​ການ​ຮຽນ​ຮູ້​ຄວາມ​ອັນ­ຕະ­ລາຍ​ຂອງ​ລະ­ເບີດ​ບໍ່​ທັນ​ແຕກ ໂດຍ​ຜ່ານ​ການ​ສ້າງ​ຄວາມ​ສາ­ມາດ​ໃຫ້​ຄູ​ສອນ​ຜູ້​ທີ່​ສົ່ງ​ຄວາມ​ຮູ້ ຜ່ານ​ກິດ­ຈະ­ກຳ​ການ­ສະ­ແດງ​ລະ­ຄອນ​ຕຸກ­ກະ­ຕາ​ແບບ​ສ້າງ­ສັນ ແລະ ດຶງ​ດູດ​ຄວາມ​ສົນ­ໃຈ ໂດຍ​ຮັບ​ການ​ສະ­ໜັບ­ສະ­ໜູນ​ຈາກ​ກະ­ຊວງ​ການ​ຕ່າງ­ປະ­ເທດ ສ ອາ​ເມ​ຣິ​ກາ ມູນ​ຄ່າ​ປະ­ມານ 17 ຕື້​ກວ່າ​ກີບ ຫຼື 2.018.471 ໂດ​ລາ​ສະ­ຫະ­ລັດ ຈະ​ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ຫຼວງ​ພະ​ບາງ 12 ເມືອງ ແຂວງ​ຊຽງ​ຂວາງ 7 ເມືອງ ແຂວງ​ຫົວ­ພັນ 10 ເມືອງ ແຂວງ​ບໍ​ລິ​ຄຳ​ໄຊ 7 ເມືອງ ແຂວງ​ຄຳ​ມ່ວນ 10 ເມືອງ ແຂວງ​ສະ­ຫວັນ​ນະ​ເຂດ 15 ເມືອງ ແຂວງ​ສາ­ລະ​ວັນ 8 ເມືອງ ແຂວງ​ເຊ​ກອງ 4 ເມືອງ ແຂວງ​ຈຳ­ປາ​ສັກ 10 ເມືອງ ແລະ ແຂວງ​ອັດ​ຕະ​ປື 5 ເມືອງ.

    ສຳ­ລັບ​ກິດ­ຈະ­ກຳ​ຫຼັກ​ຂອງ​ໂຄງ­ການ ແມ່ນ​ເຊື່ອມ​ສານ​ຫຼັກ­ສູດ​ການ​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ບໍ່​ທັນ​ແຕກ ທີ່​ໄດ້​ປັບ­ປຸງ​ໃນ​ຫຼັກ­ສູດ​ແຫ່ງ​ຊາດ ຊັ້ນ​ປະ­ຖົມ​ສຶກ​ສາ ພັດ­ທະ­ນາ​ຫຼັກ­ສູດ​ການ​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ບໍ່​ທັນ​ແຕກ ສຳ­ລັບ​ຫຼັກ­ສູດ​ແຫ່ງ​ຊາດ ຊັ້ນ​ມັດ­ທະ­ຍົມ​ສຶກ​ສາ ພັດ­ທະ­ນາ​ຫຼັກ­ສູດ​ການ​ໃຫ້​ຄວາມ​ຮູ້​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ບໍ່​ທັນ​ແຕກ ເອ­ກະ­ສານ ແລະ ແຜນ­ການ​ສອນ ສຳ­ລັບ​ວິ­ທະ­ຍາ­ໄລ​ຄູ ແລະ ສົ່ງ​ຄວາມ​ຮູ້​ໃຫ້​ນັກ​ສຶກ​ສາ​ສາຍ​ຄູ​ຊັ້ນ​ປະ­ຖົມ​ສຶກ​ສາ ເຊິ່ງ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ນັບ​ແຕ່​ມື້​ໄດ້​ຮັບ​ອະ­ນຸ­ມັດ-ວັນ​ທີ 30 ເມ­ສາ 2021.

ຂ່າວທີ່ກ່ຽວຂ້ອງ