ລັດຈະສືບຕໍ່ອອກລະບຽບການຕ່າງໆ ໃຫ້ການດຳເນີນທຸລະກິດສະດວກປອດໃສ

526 08 ກ.ພ. 2019 ຂ່າວໜ້າ​ໜຶ່ງ
ລັດຈະສືບຕໍ່ອອກລະບຽບການຕ່າງໆ ໃຫ້ການດຳເນີນທຸລະກິດສະດວກປອດໃສ

    ກະ­ຊວງ​ແຜນ­ການ ແລະ ການ​ລົງ­ທຶນ​ຈັດ​ກອງ​ປະ­ຊຸມ​ປັບ­ປຸງ​ຄວາມ​ສະ­ດວກ​ໃນ​ການ​ດຳ­ເນີນ​ທຸ­ລະ​ກິດ ແລະ ການ​ລົງ­ທຶນ​ຢູ່ ສປປ ລາວ ຕາມ​ຄຳ​ສັ່ງ​ເລກ​ທີ 02/ນຍ ວັນ​ທີ 7 ກຸມ­ພາ 2019 ທີ່ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຮ່ວມ​ຂອງ​ທ່ານ ຄຳ​ລຽນ ພົນ​ເສ­ນາ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ​ນາງ ວາ­ລີ ເວດ​ສະ​ພົງ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ແລະ ທ່ານ ນິ​ໂຄ​ລາ ພອນ​ທາ​ຣາ ຫົວ­ໜ້າ​ຫ້ອງ­ການ​ທະ­ນາ­ຄານ​ໂລກ ປະ­ຈຳ​ລາວ ມີ​ຂະ­ແໜງ­ການ​ກ່ຽວ­ຂ້ອງ ບໍ­ລິ­ສັດ​ທີ່​ປຶກ­ສາ ຜູ້­ຕາງ­ໜ້າ​ຈາກ​ອົງ​ການ­ຈັດ­ຕັ້ງ​ສາ­ກົນ ແລະ ຊ່ຽວ­ຊານ​ເຂົ້າ​ຮ່ວມ.

    ເພື່ອ​ຮັບ​ຟັງ​ການ​ລາຍ​ງານ​ກ່ຽວ​ກັບ​ບັນ­ດາ​ລະ­ບຽບ​ການ ແລະ ນິ­ຕິ​ກຳ​ຕ່າງໆ​ທີ່​ໄດ້​ຮັບ​ການ​ປັບ­ປຸງ ເພື່ອ​ອຳ­ນວຍ​ຄວາມ​ສະ­ດວກ​ແກ່​ການ​ດຳ­ເນີນ​ທຸ­ລະ​ກິດ​ຢູ່ ສປປ ລາວ ຕາມ​ຄຳ​ສັ່ງ​ເລກ​ທີ 02/ນຍ ເປັນ­ຕົ້ນ ດຳ­ລັດ​ວ່າ​ດ້ວຍ​ການ​ຮັບ­ຮອງ​ເອົາ​ບັນ­ຊີ​ກິດ­ຈະ­ການ​ຄວບ​ຄຸມ ແລະ ກິດ­ຈະ­ການ​ສຳ​ປະ­ທານ​ຂອງ ສປປ ລາວ ສະ­ບັບ​ເລກ​ທີ 03/ນຍ ທີ່​ຈະ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ອະ­ນຸ­ຍາດ​ລົງ­ທຶນ​ໃຫ້​ສະ­ດວກ ແລະ ໄວ​ຂຶ້ນ ບົດ​ແນະ­ນຳ​ວ່າ​ດ້ວຍ​ການ​ໃຫ້​ນະ­ໂຍ­ບາຍ​ສົ່ງ­ເສີມ​ການ​ລົງ­ທຶນ​ດ້ານ​ພາ­ສີ ແລະ ອາ­ກອນ​ມູນ​ຄ່າ​ເພີ່ມ​ສຳ­ລັບ​ແຜນ​ນຳ​ເຂົ້າ­ຂອງ​ວິ​ສາ​ຫະ​ກິດ ສະ­ບັບ​ເລກ​ທີ 01/ຄລທ.ສ ລົງ​ວັນ​ທີ 2 ມັງ­ກອນ 2019 ຈະ​ເຮັດ​ໃຫ້­ການ​ຜ່ານ​ແຜນ​ນຳ​ເຂົ້າ​ແຜນ​ປະ­ຈຳ​ປີ​ໃຫ້​ຮັດ­ກຸມ ແຕ່​ສະ­ດວກ ວ່ອງ­ໄວ ປອດ​ໃສ​ກວ່າ​ເກົ່າ ແລະ ຍັງ​ມີ​ການ​ປັບ­ປຸງ​ອື່ນໆ​ອີກ​ເຊັ່ນ: ການ​ອອກ​ເລກ​ປະ­ຈຳ​ຕົວ​ຜູ້​ເສຍ​ອາ­ກອນ ພ້ອມ​ກັບ​ໃບ​ທະ­ບຽນ​ວິ​ສາ​ຫະ​ກິດ​ເລີຍ ການ​ຍົກ­ເລີກ​ໃບ​ອະ­ນຸ­ຍາດ​ຄວັດ​ກາ​ປະ​ທັບ ແລະ ບໍ່​ມີ​ຂັ້ນ​ຕອນ​ຂໍ­ອະ­ນຸ­ຍາດ​ນຳ​ໃຊ້​ກາ​ປະ​ທັບ​ອີກ.

    ທ່ານ ຄຳ​ລຽນ ພົນ​ເສ­ນາ ກ່າວ​ວ່າ: ລັດ­ຖະ­ບານ​ຈະ​ສືບ­ຕໍ່​ຄົ້ນ­ຄວ້າ​ປັບ­ປຸງ ແລະ ອອກ​ລະ­ບຽບ​ການ​ຕ່າງໆ​ທີ່​ຈຳ­ເປັນ ເພື່ອ​ເຮັດ​ໃຫ້­ການ​ດຳ­ເນີນ​ທຸ­ລະ​ກິດ​ມີ​ຄວາມ​ສະ­ດວກ ແຕ່​ອັນ​ສຳ­ຄັນ​ອີກ​ອັນ​ໜຶ່ງ ຄະ­ນະ​ນຳ​ຂອງ​ແຕ່​ລະ​ຂະ­ແໜງ­ການ ຈະ​ຕ້ອງ​ໄດ້​ຊີ້​ນຳ​ຢ່າງ​ໃກ້­ຊິດ​ໃນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ນິ­ຕິ​ກຳ ແລະ ລະ­ບຽບ​ການ​ຕ່າງໆ​ຢ່າງ​ເຂັ້ມ​ງວດ​ກວ່າ​ເກົ່າ ພ້ອມ​ທັງ​ພັດ­ທະ­ນາ​ເຄື່ອງ­ມື ໃນ​ການ​ຕິດ­ຕາມ​ຂອງ​ຂະ­ແໜງ­ການ​ທີ່​ກ່ຽວ­ຂ້ອງ​ໃຫ້​ມີ​ຄວາມ​ວ່ອງ­ໄວ ປອດ​ໃສ ແລະ ມີ​ຜົນ​ສັກ­ສິດ ພິ­ເສດ​ພາກ​ລັດ​ເຮົາ​ຈະ​ຕ້ອງ​ໄດ້​ປະ­ສານ​ກັບ​ພາກ​ທຸ­ລະ​ກິດ ແລະ ງ່ຽງ​ຫູ​ຟັງ​ຄຳ​ສະ­ເໜີ​ຂອງ​ເຂົາ­ເຈົ້າ​ຢູ່​ສະ­ເໝີ ເພື່ອ​ປຶກ­ສາ​ຫາ­ລື ຊອກ​ວິ­ທີ​ແກ້​ໄຂ​ຮັບ­ປະ­ກັນ​ທັງ​ສອງ​ຝ່າຍ​ໄດ້​ຮັບ​ຜົນ​ປະ­ໂຫຍດ​ຮ່ວມ​ກັນ.

    ທ່ານ​ນາງ ວາ­ລີ ເວດ​ສະ​ພົງ ຍັງ​ໄດ້​ເນັ້ນ​ຕື່ມ​ວ່າ: ຄວາມ​ພະ­ຍາ­ຍາມ​ຂອງ​ລັດ­ຖະ­ບານ​ໃນ​ການ​ປັບ­ປຸງ 10 ຕົວ​ຊີ້​ວັດ​ໃນ​ການ​ດຳ­ເນີນ​ທຸ­ລະ​ກິດ​ນີ້ ບໍ່​ພຽງ​ແຕ່​ເຮັດ​ໃຫ້​ອັນ​ດັບ​ຂອງ ສປປ ລາວ ດີ​ຂຶ້ນ ແຕ່​ຍັງ​ສົ່ງ​ຜົນ​ຕໍ່​ສະ­ພາບ​ແວດ​ລ້ອມ​ການ​ລົງ­ທຶນ​ໂດຍ​ລວມ ເຊິ່ງ​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ແຫ່ງ​ຊາດ​ລາວ ກໍ​ຈະ​ປະ­ກອບ­ສ່ວນ​ເປັນ​ແຮງ​ໜຶ່ງ ໃນ​ການ​ລະ­ດົມ​ພາກ​ທຸ­ລະ​ກິດ​ໃຫ້​ມີ​ຄວາມ​ຮັບ​ຮູ້ ແລະ ເຂົ້າ­ໃຈ​ກ່ຽວ​ກັບ​ນິ­ຕິ​ກຳ​ລະ­ບຽບ​ການ​ຕ່າງໆ​ທີ່​ໄດ້​ຮັບ​ການ​ປັບ­ປຸງ ແລະ ສະ­ໜອງ​ຂໍ້​ຄິດ​ເຫັນ​ຂອງ​ພາກ​ທຸ­ລະ​ກິດ ເພື່ອ​ຊ່ວຍ​ພາກ​ລັດ­ຖະ­ບານ​ໃນ​ການ​ວາງ​ນະ­ໂຍ­ບາຍ​ໃຫ້​ຖືກ­ຕ້ອງ.

ຂ່າວທີ່ກ່ຽວຂ້ອງ